މިސްކިތްތަކަށް ކުޑަކަމު ގޮސް ހަތިމަށް ކުޅު ޖެހި މީހާގެ ދިފާޢުގައި މަސައްކަތް ކުރުމުގެ ބަދަލުގައި އެމީހާއަށް ޙައްޤު އަދަބު ދިނުމަށް އިދިކޮޅު ޕްރޮގްރެސިވް ކޮންގްރެސް ކޯލިޝަނުން ގޮވާލައިފިއެވެ.
އިދިކޮޅުން މިގޮތަށް ގޮވާލާފައިމިވަނީ، މިސްކިތްތަކަށް ކުޑަކަމު ގޮސް ހަތިމަށް ކުޅު ޖެހި މީހާއަކީ ނަފްސާނީ ބަލިމީހެއްކަމަށް ބުނެ އޭނާ މުޖުތަމަޢުއަށް ދޫކޮށްލާތީ އެކަން ކުށްވެރިކޮށް ނެރުނު ބަޔާނެއްގައެވެ. އޭނާ އަކީ ނަފްސާނީ ބަލި މީހެއްކަމަށް ފުލުހުން ބުނިނަމަވެސް ޖެންޑަރ މިނިސްޓްރީން ވަނީ އެމީހާއަކީ އެފަދަ މީހެއްނޫންކަމަށްް ބުނެފައެވެ.
އެކަމާއި ގުޅިގެން އިދިކޮޅު ޕްރޮގްރެސިވް ކޮންގްރެސް ކޯލިޝަނުން ބުނީ، ދިވެހި ފިރިހެނަކު މިސްކިތްތަކަށް ކުޑަކަމުގޮސް ހަތިމަށް ކުޅު ޖަހާ ހިންގި ޢަމަލާއި އަދި އެ ޢަމަލު ހިންގި މީހާގެ ޢަމަލުތައް ދިފާޢު ކުރުމަށް ސަރުކާރުގެ ފަރާތުން ދައްކަމުން ގެންދާ ތަފާތު ވާހަކަތަކާއި ބަހަނާތައް އެންމެ ހަރުކަށި އިބާރާތުން ކުށްވެރި ކުރާކަމަށެވެ. ދިވެހި ފުލުހުންގެ ޚިދުމަތުގެ ފަރާތުން އެމީހާއަކީ ނަފްސާނީ ބަލީގެ މީހެއްކަމަށް ބުނިނަމަވެސް، އެމީހާގެ ނަފްސާނީ އެއްވެސް މައްސަލައެއް ހުރި ކަމަށް ފާހަގަވެފައި ނުވާ ކަމަށް ޖެންޑަރ މިނިސްޓްރީއިން ވަނީ ބުނެފައެވެ.
ދީނީ ކަންކަމަށް ހަޖޫ ޖަހާ، ދީނީ ޝިޢާރުތަކާއި ދެކޮޅަށް އަޑު އުފުލަމުން ގެންދާ އެންމެހާ ފަރާތްތަކުގެ ހިމާޔަތުގައި މިސަރުކާރުން ކުރަމުން ގެންދާ މަސައްކަތް ތަކުރާރުކޮށް މިސްކިތްތަކަށް ކުޑަކަމުގޮސް ހަތިމަށް ކުޅު ޖެހި މީހާގެ ވެސް ދިފާޢުގައި ސަރުކާރުން މަސައްކަތް ކުރާކަމީ ވަރަށް ހިތާމަ ހުރި އަދި އެހާމެ ލަދުވެތި ކަމެއްގެ ގޮތުގައި މިކޯލިޝަނުން ފާހަގަ ކުރަމެވެ. އޭނާއަކީ އެއްވެސް ކަހަލަ ބައްޔެއް ހުރި މީހަކަށް ނުވާއިރު އޭނާއަކީ ނަފްސާނީ ބަލި ހުރި މީހެއްކަމުގައި ދައްކާ މުޖުތަމަޢުގެ ތެރެއަށް ދޫކޮށްލާފައި ހުރި ހުރުންވެސް މިކޯލިޝަނުން ބަލައެއް ނުގަންނަވަމެވެ.
– ޕްރޮގްރެސިވް ކޮންގްރެސް ކޯލިޝަން
އެހެންކަމުން ދީނަށް ފުރައްސާރަކޮށް މާތްﷲ ގެ ކަލާމްފުޅަށް ކުޅު ޖަހާ ހެދި މީހެއްގެ ދިފާޢުގައި ތަފާތު ވާހަކަތައް ދެއްކުމުގެ ބަދަލުގައި، އެމީހާ މިހާރުން މިހާރަށް ހައްޔަރުކޮށް އެމީހާއަށް ޤާނޫނުތަކުން ކަނޑައަޅާފައިވާ އަދަބު ދިނުމަށް ސަރުކާރަށް ގޮވާލާކަމަށްވެސް އިދިކޮޅުގެ ބަޔާނުގައިވެއެވެ.
އިސްލާމީ މަރުކަޒުގެ އިމާމު މީހާ ނަމާދަށް ހުޓައި ކުރިމައްޗަށް ކުޑަކަމުގޮސް، ރައީސް އޮފީހުގެ ގޭޓަށްވެސް ކުޑަކަމު ދިޔަމީހާ އަކީ ނަފްސާނީ ބަލިމީހެއްކަމަށް ބުނެ ފުލުހުން އޭނާ ދޫކޮށްލިއެވެ. ނަމަވެސް އޭގެ ފަހުން އޭނާ ވަނީ މިސްކިތުގައި ޚަތިމަށް ކުޅުޖަހާފައެވެ. މި މައްސަލާގައި އޭނާ އަނެއްކާވެސް ވަނީ ފުލުހުންގެ ބެލުމުގެ ދަށަށް ގެންގޮސްފައެވެ. މި މައްސަލާގައި ހައްޔަރުކޮށްފައިވަނީ ޢުމުރުން 40 އަހަރުގެ ދިވެހި ފިރިހެނެކެވެ.
