ކުރީގެ ރައީސް މުހައްމަދު ނަޝީދަށް ރައްކާތެރިކަމާއި ހިމާޔަތް ދިނުމަށްޓަކައި ރައްޔިތުންގެ ފައިސާއިން ޚަރަދުކޮށް ހޮޓަލެއްގައި ބެހެއްޓުމަށްވުރެ ސިފައިންގެ މަރުކަޒުގައި ބެހެއްޓުން މާ ރަނގަޅުވާނެކަމަށް ދީނީ އިލްމުވެރިޔާ ޑރ.މުހައްމަދު އިޔާޒު ވިދާޅުވެއްޖެއެވެ.

ރައްޔިތުންގެ މަޖިލީހުގެ ރައީސް މުހައްމަދު ނަޝީދު، ސަލާމަތީ ސަބަބުތަކަކަށްޓަކައި ދިރިއުޅުއްވުން ޖެން ހޮޓަލުގައި ހަމަޖައްސަވައި ހަރަދު ބަލަހައްޓަވަނީ ދައުލަތުގެ ބަޖެޓުންނެވެ. ނަމަވެސް މިކަމަށް ކުރާ ޚަރަދުތަކުގެ ތަފްސީލެއް ސަރުކާރުން ހާމަކޮށްފައި ނުވެއެވެ. ސިފައިންގެ ބެލުމުގެ ދަށުން ޖެންގައި ނަޝީދު ހުންނަވާ ގޮތަށް ސަރުކާރުން ހަމަޖެއްސީ މިދިޔަ މެއި މަހުގެ ތެރޭގައި އެމަނިކުފާނު އަވަހާރަކޮށްލަން ދިން ބޮމުގެ ހަމަލާ އަށް ފަހު ބޭރުގައި އުޅުއްވައި ރާއްޖެ ވަޑައިގަތުމުންނެވެ. މިދިޔަ މަހުގެ ތެރޭގައި ނަޝީދު މާލެ ވަޑައިގަތީ ފަރުވާ އަށް ފަސް މަސް ވަންދެން ބޭރުގައި ހުންނެވުމަށް ފަހުއެވެ.

މިކަމާއި ގުޅިގެން ޑރ.އިޔާޒު ވިދާޅުވީ ރައީސް ނަޝީދަށް ސަލާމަތާއި ރައްކާތެރިކަން ދިނުމަށް ރައްޔިތުންގެ މާލިއްޔާއިން ބޮޑު ޚަރަދެއްކުރުމަށްވުރެ ރައްކާތެރި ގޮތަކީ މަދު ފައިސާ ޚަރަދުކޮށްގެން ސަލާމަތީކަންކަން ފުރިހަމައަށް ދެވޭނެ ގޮތަކަށް އެކަންކަން އިންތިޒާމު ކުރުންކަމަށެވެ. އެކަން ކުރެވޭނީ ނަޝީދު ސިފައިންގެ މައި މަރުކަޒުގައި ބަހައްޓައިގެންކަމަށް އިޔާޒު ވިދާޅުވިއެވެެ.

ޙިމާޔަތާއި ރައްކާތެރިކަން ދިނުމުގެ ނަމުގައި ރަޢްޔިތުންގެ ޓެކްސް ފައިސާ ބޭކާރު ކުރެވިގެން ނުވާނެ. އަގުބޮޑު ހޮޓަލެއްގައި ބެހެއްޓުމަށްވުރެ ސިފައިންގެ މަރުކަޒުގައި ބެހެއްޓި ނަމަ ރައްކާތެރިކަން ބޮޑުވެފައި ޚަރަދުވެސް ކުޑަވީސް.

– ޑރ.އިޔާޒު ވިދާޅުވިއެވެ.

ޖެންގައި ނަޝީދު ހުންނަވާ ގޮތަށް ދައުލަތުން ހަމަޖެއްސެވީ މަޖިލިސް އިދާރާއާ ކައިރިވެފައި ސެކިއުރިޓީ ބެލެހެއްޓުމުގެ ފަސޭހަތަކަކާ ވެސް އެކުގައެވެ. ކުރީގެ ރައީސަކަށް ވެފައި އެ އިނާޔަތަތްކާއި މަޖިލީހުގެ ރައީސްގެ އިތުރުން ޖެންގައި ހުންނެވުމަށް އިތުރު ބޮޑު ހޭދައެއް ހިނގާތީ ތަފްސީލްތައް އާއްމުކުރަން ޖެހޭ ކަަމުގެ ފާޑުކިއުންތައް ވަނީ ބޮޑުވެފައެވެ.

މަޖިލީހުގެ ރައީސްގެ ގެކޮޅު އަޅަނީ ސުޕްރީމް ކޯޓު ކުރިމަތީގައި އޮންނަ ދަންޑަހެލު ގޭގެއެވެ. ދާއިމީ ގެކޮޅެއް އިމާރާތް ކުރެވެންދެން އެމަނިކުފާނު ދިރިއުޅުއްވަން ވަގުތީ ގެކޮޅުގެ ގޮތުގައި މުރައިދޫގެ އަންނަނީ މަރާމާތުކުރަމުންނެވެ. އުއްތަމަ ފަނޑިޔާރުގެ ގެކޮޅު އަޅަނީ ކުރީގެ ސްކައުޓް އެސޯސިއޭޝަން ހިންގި އިމާރާތުގައެވެ. ދާއިމީ ގެކޮޅެއް އިމާރާތްކުރެވެންދެން އެމަނިކުފާނު ވަގުތީގޮތުން ދިރިއުޅުއްވާ ގޮތަށް ހަމަޖައްސާފައި ވަނީ ރެހެންދި ފްލެޓުގައެވެ.

ބަޖެޓުގައި މަޖިލީހުގެ ރައީސްގެ ގެކޮޅުގެ ހަރަދަށް 6.8 މިލިއަން ރުފިޔާ ހިމަނާފައިވެއެވެ. މީގެ ތެރޭގައި ހިމެނެނީ ބިއުރޯ ހިދުމަތްތަކަށް، 1،293،136 ރުފިޔާ، ކޯޕަރޭޓް ހިދުމަތްތައް 3،210،812 ރުފިޔާގެ އިތުރުން، ހައުސްހޯލްޑް ހިދުމަތްތައް 2،357،668 ރުފިޔާއެވެ.

މަޖިލީހުގެ ރައީސާއި އުއްތަމަ ފަނޑިޔާރު ދިރިއުޅުއްވަން ރަސްމީ ގެކޮޅެއް ކަނޑައެޅުވުމަށް ސަރުކާރުން ވަކިވަކިން ހުށައެޅުއްވި ދެބިލުގައި ބުނެފައިވަނީ، މަޖިލީހުގެ ރައީސާއި އުއްތަމަ ފަނޑިޔާރަށް ހަމަޖައްސަވާ ގެއަށް ބޭނުންވާ އެކަށީގެންވާ ޢަދަދެއްގެ މުވައްޒަފުންނާއި އެގެއަށް ހިނގާނެ ޚަރަދު ދައުލަތުގެ ފަރާތުން ހަޖައްސައިދޭންވާނެކަމަށެވެ. އަދި އެދެބޭފުޅުން ދިރިއުޅުއްވަން ހަމަޖައްސަވާ ތަނަކީ ސަލާމަތީގޮތުން އަޅަންޖެހޭ ފިޔަވަޅުތައް އެޅޭނެފަދަ ގޮތަކަށް ހުރި ގެއެއްކަމުގައި ވާންވާނެކަމަށްވެސް ވަނީ ބުނެފައެވެ.