1988 ވަނަ އަހަރުގެ ނޮވެންބަރު މަހުގެ ތިންވަނަ ދުވަހު ދިވެހި ރާއްޖެއަށް ކުރިމަތިވި އުދުވާނީ ހަމަލާއަކީ ދިވެހި ރާއްޖޭގެ މިނިވަންކަމަށް ކުރިމަތިވި އެންމެބޮޑު ނުރައްކާ ކަމުގައި އެދުވަހު ރާއްޖޭގެ ވެރިކަމުގައި ހުނެނެވި ކުރީގެ ރައީސް އަލް އުޘްތާޒު މައުމޫން އަބްދުލް ޤައްޔޫމް ވިދާޅުވެއްޖެއެވެ.
ސްރީލަންކާގައި ހަރަކާތްތެރިވަމުންދިޔަ ބާޣީ ޖަމާއަތެއްކަމަށްވާ "ޕްލޮޓް"ގެ ހަނގުރާމަވެރި ސިފައިން ކުއްލިއަކަށް މާލެ އަރައިގަތުމުން ދިވެހި ސިފައިން 18 ގަޑިއިރު ބާޣީންނާ ހަނގުރާމަކުރިއެވެ. 1988 ވަނަ އަހަރުގެ ނޮވެމްބަރ 3 ވަނަ ދުވަހުގެ ފަތިހު ޕްލޮޓް ޖަމާޢަތުގެ ޢުދުވާނީ ޙަމަލާތަކާ ދިވެހި ސިފައިން ކުރިމަތިލާންޖެހުނީ ކުށްލިއަކަށެވެ. އެފަދަ ޙަމަލާއެއް ކުރިމަތިވެދާނެކަމުގެ އެއްވެސް މައުލޫމާތެއް ދިވެހި ސިފައިންނަށް ކުރިން ލިބިފައެއްނުވެއެވެ.
ނަސްރުގެ ދުވަހުގެ ފަތްފުއްތައް ހުޅުވައި ބަލާލުމުން، ދިވެހި ސިފައިންގެ ހިއްވަރާއި، އެނުރައްކާތެރި ދަނޑިވަޅުގައި ދިވެހި ޤައުމުގެ ދިފާޢުގައި ކުރެއްވި މަތިވެރި ޖިހާދުގެ ހަނދާން އާވެގެންދެއެވެ.
ދުވަހުގެ މުނާސަބަތާއި ގުޅިގެން ރައީސް މައުމޫން ކުރެއްވި ޓްވީޓެއްގައި ވިދާޅުވީ 1988 ނޮވެމްބަރު މަހުގެ ތިން ވަނަ ދުވަހަކީ ދިވެހި ރާއްޖޭގެ ފަހުގެ ތާރީހެއްގައި ދިވެހިންގެ މިނިވަންކަމަށް އެންމެ ބޮޑު ނުރައްކާ ކުރިމަތިވި ދުވަސް ކަމުގައެވެ. އެދުވަހު ދިވެހި ސިފައިން ވެފައިވާ އަގުނުކުރެވޭ ޤުރުބާނީއަކީ ތާއަބަދު ހާދާން އާކުރަންޖެހޭ ކަމެއްކަމަށް ރައީސް މައުމޫން ވިދާޅުވިއެވެ.
ނޮވެމްބަރު 3 ގެޢުދުވާނީ ހަމަލައަކީ ފަހުގެ ތާރީޚެއްގައި ރާއްޖޭގެ މިނިވަންކަމަށް ކުރިމަތިވި އެންމެބޮޑު ނުރައްކާ. އެހެންކަމުން އެދުވަހު މާތްﷲ ދެއްވި ނަޞްރަށް ޙަމްދުކޮށް ދިވެހި ރައްޔިތުންނާއި ސިފައިން ވީޤުރްބާނީގެ ވާހަކަ އަންނަންއޮތް ޖީލުތަކަށް ކިޔައިދިނުމަކީ އަޅުގަނޑުމެންގެ ވާޖިބެއް.
– ރައީސް މައުމޫން ވިދާޅުވިއެވެ.
1988 ވަނަ އަހަރުގެ ނޮވެމްބަރ މަހުގެ ޢުދުވާނީ ޙަމަލާގައި ދިވެހި ސިފައިންނާއި މާލޭގެ ރައްޔިތުން ދެއްކި ހިތްވަރާއެކު، ރަށްރަށުގެ ރައްޔިތުން ކުރި ދުވާ އިޖާބަކުރައްވައި ޚާއިނުންގެ މައްޗަށް ދިވެހި ސިފައިންނާއި ދިވެހި އެންމެހާ ރައްޔިތުން ނަސްރު ލިބިގެން ދިޔައެވެ. ދިވެހި ތާރީޚުގައިވެސް ބިރުވެރިކަމާއި އަނދިރިކަމާ ނާމާންކަމުން ފުރިގެންވާ ދުވަހެއްގެ ގޮތުގައި ފަވާލާފައިވާ މިދުވަސް ދިވެހިންގެ ނަސްރުގެ ދުވަހުގެ ގޮތުގައި ކަނޑައަޅުއްވާ ސަރުކާރުން މިދުވަސް ފުރަތަމަ ފަހަރަށް ފާހަގަކުރަން ފެށީ 1989 ނޮވެމްބަރު 3 ވަނަ ދުވަހުން ފެށިގެންނެވެ.
