ކުރީގެ ރައީސް ޢަބްދުﷲ ޔާމީންގެ މައްޗަށް ކްރިމިނަލް ކޯޓުން ހުކުމްކުރި ފަސް ފަނޑިޔާރުންގެ ތެރެއިން ތިން ފަނޑިޔާރުންގެ ލީކުވެފައިވާ އޯޑިއޯތަކުގެ ތަހުލީލް ލަސްވުމަކީ އިންސާފަށް އޮތް ބޮޑު ހުރަހެއް ކަމުގައި އިދިކޮޅު ޕްރޮގްރެސިވް ކޯލިޝަން ހިންގުމާއި ހަވާލުވެ ހުންނެވި ޕީއެންސީގެ ރައީސް އަބްދުއްރަހީމް އަބްދުﷲ (އަދުރޭ) ވިދާޅުވެއްޖެއެވެ.
އިދިކޮޅު ކޯލިޝަނުން މިއަދު ބޭއްވި ނޫސްވެރިންގެ ބައްދަލުވުމުގައި އަދުރޭ ވިދާޅުވީ އޯޑިއޯގެ ޞައްޚަކަން ދެނެގަތުމަށް ފުލުހުންނަށް ހުށަހަޅައިގެން އުޅޭތާ އެތައް ދުވަހެއް ވެގެންދާއިރުވެސް އެކަން ނުވެ ލަސްވާ ކަމަކީ ނުހަނު ކަންބޮޑުވާކަމެއްކަމަށެވެ. މިކަމުގައި ފުލުހުންނާއި، ޕީޖީއާއިވެސް ބައްދަލު ކުރުމަށް އެދިފައިވާނެކަމަށާއި، ނަމަވެސް އެވެސް ފަރާތަކުން އެދޭ ޖަވާބެއް ދީފައި ނުވާކަމަށެވެ. ރައީސް ޔާމީން ދެ އަހަރު ދުވަހު އަނިޔާގައި ހޭދަކުރަމުންދާއިރު މިކަަކީ ބަލައި ގަނެވޭނެ ކަމެއްނޫންކަމަށް އޭނާ ވިދާޅުވިއެވެ.
އަބްދުއްރަހީމް ވިދާޅުވީ މިއޯޑިއޯތަކުގެ ޞައްޚަކަން ކަށަވަރު ނުވެއޮއްވައި ސްޕްރީމް ކޯޓުން ރައީސް ޔާމީންގެ ހުކުމް ހައިކޯޓުން ކޮށްފައިވާގޮތަށް ދަމަހައްޓަން ނިންމާފަހުން އޯޑިއޯގެ ޞައްޚަކަން ކަށަވަރުވެ ފަނޑިޔާރުންގެ އަޑު ކަށަވަރުވެއްޖެނަމަ މިއީ ރައީސް ޔާމީނަށް ދެވޭ ބޮޑު އަނިޔާއަކަށް ވެގެންދާނެކަމަށެވެ. މިހާ ދުވަސް މިކަން ކަށަވަރު ކުރުމަށް ހޭދަ ކުރާކަމީ ކަންބޮޑުވާ ކަމެއްކަމަށާއި، އޯޑިއޯ މިރޭ ސިންގަޕޫރަށް ފޮނުވާކަމުގެ ޚަބަރު ލިބިފައިވާކަމަށް އޭނާ ވިދާޅުވިއެވެ.
ނަމަވެސް އޯޑިއޯގެ ކަށަވަރުކަން ލިބޭނެ ދުވަހެއް އަދި މިކަން ހިނގާ ގޮތެއް ނޭގި އޮތުމަކީ ނުހަނު ކަންބޮޑުވާ ކަމެއްކަމަށް އޭނާ ވިދާޅުވިއެވެ.
ޢާންމުވެފައިވާ އޯޑިއޯގައި ރަހުމަތްތެރިޔަކާއިއެކު ގާޒީ ހުސެއިން ފާއިޒް ދެއްކެވި ވާހަކަފުޅު ޤާޟީ ވަނީ ރައީސް ޔާމީންގެ މައްޗަށް ފަސް އަހަރުގެ ޖަލު ހުކުމެއް އިއްވީ އޭނާ އަށް ބިރުދެއްކުމުންކަމަށެވެ. ބިރު ދެއްކުމުން އޮތީ ދެގޮތެއް ކަމަށާއި އެއްގޮތަކީ ބިރާއި ދެކޮޅު ހެދުންކަމަށާއި އަނެއް ގޮތަކީ ބިރާއި އެއްކޮޅަށް ހުކުމް ކުރުން ކަމަށް ހުސެއިން ފާއިޒް ވިދާޅުވެފައިވެއެވެ.
ކުރިމަތިވި ހާލަތުގައި ޔާމީންގެ މަސްލަހަތު ހިމާޔަތް ކުރެވޭނީ ޔާމީންގެ މައްޗަށް ޖަލު ހުކުމެއް ކޮށްގެން ކަމަށް ހުސެއިން ފާއިޒް ވިދާޅުވިއެވެ. އެއީ ހުކުމް ނުކޮށްފިނަމަ ޔާމީނަށް އެއަށްވުރެ ބޮޑު ގެއްލުމެއް ލިބިދާނެތީ ކަމަށްވެސް ހުސެއިން ފާއިޒް ވިދާޅުވެފައިވެއެވެ.
މިފަދައިން ފާއިޒް ވިދާޅުވެފައިވާއިރު، ރައީސް ޔާމިންގެ މައްޗަށް ކްރިމިނަލް ކޯޓުން ޙުކުމްކުރަން ތަޢާވަލުކޮށްފައިވަނިކޮށް އެމައްސަލަ ފުރަތަމަ ބެއްލެވި އެކޯޓްގެ ކުރީގެ އިސް ޤާޟީ އަޙްމަދު ޙައިލަމް ސަސްޕެންޑްކުރުމަށްފަހު ދެން ބެއްލެވީ ފަސް ގާޒީންގެ ބެންޗަކުންނެވެ. އެބެންޗްގައި ތިއްބެވީ ގާޒީ އަލީ ރަޝީދު ހުސެއިނާއި، ގާޒީ އަހުމަދު ޝަކީލާއި ގާޒީ މުހައްމަދު ސަމީރާއި ގާޒީ އަލީ އާދަމް އަދި ގާޒީ ހުސެއިން ފާއިޒް ރަޝާދެވެ.
