މިއަހަރުގެ މެއި މަހުން ފެށިގެން ރ.މަޑުއްވަރީގައި ޕްރިންސިޕަލެއް ނެތް މައްސަލަގައި އެދާއިރާގެ މެމްބަރު އާދަމް ޝަރީފް މިނިސްޓަރ އައިޝަތު އަލީ އާއި ސުވާލު ކުރެއްވުމަށް ހުށަހަޅައިފިއެވެ.

އާދަމް ޝަރީފް ވަޒީރާއި ސުވާލު ކުރުމަށް ފޮނުވި ނޯޓިސްގައި ބުނެފައިވަނީ މިއަހަރުގެ ކުރީކޮޅުން ފެށިގެން ރ. މަޑުއްވަރީ ސްކޫލް ހިނގަމުންދަނީ ޕްރިންސިޕަލަކު ނެތި ކަމަށެވެ. އެ ސްކޫލަށް ޕްރިންސިޕަލަކު ލިބޭނީ ކޮން ތާރީޚެއްގައިތޯ؟ އާއި، އެ ސްކޫލަށް ޕްރިންސިޕަލެއް ނުލިބިގެން އުޅޭ ސަބަބުތަކަކީ ކޮބައިތޯ؟ އާއި، ޕްރިންސިޕަލުން ނުލިބޭ ރަށްރަށް ނުވަތަ ޕްރިންސިޕަލުން ހަރުލުން ދަތި ރަށްރަށާމެދު ރާއްވަވާގޮތްތަކަކީ ކޮބައިތޯ؟ އާދަމް ޝަރީފް ކުރައްވާ ސުވާލުތަކުގެ ތެރޭގައި ހިމެނެއެވެ.

މިމައްސަލާގައި އާދަމް ޝަރީވް ވިދާޅުވީ، މަޑުއްވަރީގައި މިހާ ދުވަހު ޕްރިންސިޕަލެއްނެތި ކިޔަވައި ދެމުންދާއިރު މިއީ ވަރަށް ކަންބޮޑުވާން ޖެހޭ ކަމެއްކަމަށެވެ. ރަށްރަށުގައި ޕްރިންސިޕަލުން ހަރުނުލާ މައްސަލައާއި، ޕްރިން ސިޕަލުން ތިބެން ބޭނުން ނުވާ މައްސަލަ ބަލައި އެކަން މިނިސްޓްރީން ސާފުކޮށް ދޭންޖެހޭކަމަށް އާރަމް ޝަރީފް ވަނީ ވިދާޅުވެއެވެ.

މިއަހަރުގެ މޭ މަހުން ފެށިގެން ރ.މަޑުއްވަރީގައި ޕްރިންސިލެއްނެތް. އެއީ ވަރަށް ކަންބޮޑުވާ ކަމެއް. ބައެއް ރަށްރަށަށް ޚާއްސަ އިންތިޒާމު ތަކެއް ހަމަޖައްސައިގެން ނަމަވެސް ރަނގަޅު ޕްރިންސިޕަލުން ތިބޭނެ ގޮތެއް ކޮންމެހެން ހަދަންޖެހޭ. އަދި ބައެއް ރަށްރަށުގައި ޕްރިން ސިޕަލުން ހަރުނުލާ މައްސަލަ ބަލަންޖެހޭ.

– އާދަމް ޝަރީފް ވިދާޅުވިއެވެ.

މިއަހަރުގެ ކިޔެވުން ފެށިއިރުވެސް އަތޮޅު ތެރޭގެ ބައެއް ސްކޫލުތަކަށް ޓީޗަރުންނާއި، ޕްރިންސިޕަލުން ހަމަ ނުވާ މައްސަލަ ބޮޑުވިއެވެ. އަދި ބައެއް ފޮތްތައްވެސް ހަމަނުވާ މައްސަލަ ފެންމަތިވިއެވެ.