ތޭވީސް އަހަރުން ދަށުގެ އޭއެފްސީ އޭޝިއަން ކަޕުގެ ކޮލިފައިންގައި ރާއްޖޭގެ ޒުވާން ގައުމީ ފުޓްބޯޅަ ޓީމު ކުޅުނު ދެވަނަ މެޗުގައި ބަހްރޭން އަތުންވެސް ބަލިވެއްޖެއެވެ.
ބަހްރޭންގެ އަލް މުހައްރައްގު ސްޓޭޑިއަމްގައި ކުޅުނު މި މެޗުން ރާއްޖެ ބަލިވީ 0-3 ގެ ނަތީޖާއަކުންނެވެ.
މި މެޗުގެ ކުރިން ކޮލިފައިންގައި ކުޅުނު ފުރަތަމަ މެޗުގައި އިރާގު އަތުން 0-4 އިން ބަލިވެފައެވެ. މިރޭ ބަހްރޭން އާއި ދެކޮޅަށް ކުޅުނު މެޗަށްފަހު ރާއްޖެއަށް ކޮލިފައިން މެޗުތައް މިވަނީ ނިމިފައެވެ. މި ގްރޫޕްގައި ދެން ވާދަކުރަން އޮތް އަފްގާނިސްތާނަށް ބަހްރޭނަށް އާދެވޭގޮތް ނުވެ އެ ޓީމުގެ މެޗުތައް ނުކުޅެ ކުރިއަށްދާން ނިންމީއެވެ.
ބަހްރޭން އާއި ރާއްޖެ ބައްދަލުކުރި މެޗު ފަށައިގެން 16 ވަނަ މިނެޓުގައި ބަހްރޭނުން ވަނީ ލަނޑު ޖަހާ ލީޑު ނަގާފައެވެ. މި ލަނޑު ބަހްރޭނަށް ކާމިޔާބުކޮށްދިނީ، އަދްނާން ފަވާޒްއެވެ. މެޗުގެ ފުރަތަމަ ހާފް ނިމުނީ 0-1 ގެ ނަތީޖާއަކުންނެވެ.
މެޗުގެ ދެވަނަ ހާފް ފަށައިގެން މާ ގިނައިރުތަކެއް ނުވަނީސް ބަހްރޭނަށް ވަނީ ޕެނަލްޓީއެއް ލިބިފައެވެ. ނަމަވެސް ރާއްޖޭގެ ގޯލް ބަލަހައްޓަން ހުރި ޒުވާން ކީޕަރ ނާޖިހް ވަނީ ހުށިޔާރު ކަމާއެކު މި ޕެނަލްޓީ ދިފާއުކޮށްފައެވެ. މި މެޗުގައި ބަހްރޭނުން ލީޑު ފުޅާކުރީ 55 ވަނަ މިނެޓުގައެވެ. މި ލަނޑަކީ އެޓީމަށް ލިބުނު ހިލޭ ޖެހުމެއްގައި އޭރިޔާ ތެރެއަށް ނަގައިދިން ބޯޅައިން މުހައްމަދު ގައްޔޫމް ބޮލުން ޖަހާ ގޯލުގެ ތެރެއަށް ފޮނުވާލި ލަނޑެކެވެ. ބަހްރޭންގެ ތިންވަނަ ލަނޑަކީ އެޓީމަށް ލިބުނު ޕެނަލްޓީއަކުން ކާމިޔާބުކުރި ލަނޑެކެވެ. މެޗުގެ 70 ވަަނަ މިނެޓުގައި މި ޕެނަލްޓީ ކާމިޔާބުކޮށްދިނީ، އައްބާސް ފަދޭލްއެވެ.
