ތޭވީސް އަހަރުން ދަށުގެ އޭއެފްސީ އޭޝިއަން ކަޕުގެ ކޮލިފައިންގައި ރާއްޖޭގެ ޒުވާން ޓީމު ކުޅުނު ފުރަތަމަ މެޗުން ބަލިވެއްޖެއެވެ.
ބަހްރެއިންގައި ކުރިޔަށްދާ ކޮލިފައިންގައި ޒުވާން ޓީމު ކުޅުނު ފުރަތަމަ މެޗުގައި އިއްޔެ ނުކުތީ އިރާގާއި ދެކޮޅަށެވެ. މި މެޗު އިރާގުން ކާމިޔާބުކުރީ 0-4 ގެ ނަތީޖާއަކުންނެވެ.
މި މެޗުގެ ފުރަތަމަ ހާފުގައި އިރާގުން ވަނީ ރާއްޖެ ކޮޅަށް ދެ ލަނޑު ޖަހާފައެވެ. އެގޮތުން އިރާގުން ލީޑު ނެގި ލަނޑު މެޗުގެ ދިހަ ވަނަ މިނެޓުގައި އެޓީމަށް ކާމިޔާބުކޮށްދިނީ، މޯމެލް އަބްދުލްރިދާއެވެ. އަދި މެޗުގެ ތިރީސް ފަސް ވަނަ މިނެޓުގައި ލިބުނު ޕެނަލްޓީއަކުން އިރާގަށް ލީޑު ފުޅާކޮށްދިން ލަނޑު ކާމިޔާބުކޮށްދިނީ، އަޙްމަދު ސަރްތީޕްއެވެ.
މެޗުގެ ދެވަނަ ހާފުގައި އިރާގުން ޖެހި ތިންވަނަ ލަނޑާއި ހަތަރު ވަނަ ލަނޑު އެޓީމަށް ކާމިޔާބުކޮށްދިނީ، ވަކާ ރަމްދާން ޖުމާހެވެ.
ތޭވީސް އަހަރުން ދަށުގެ އޭޝިއަން ކަޕްގެ ކޮލިފައިންގެ ގުރޫޕް ސީގެ މެޗުތައް މިމަހުގެ 27 އިން 31 އަށް ކުރިއަށްދާއިރު ރާއްޖެއާއި އިރާގުގެ އިތުރުން ގުރޫޕްގައި ދެން ހިމެނެނީ ބަހްރޭނާއި އަފްޣާނިސްތާނެވެ. މި ގްރޫޕުގައި އަފްޣާނިސްތާން ހިމެނުނު ނަމަވެސް، ފަހު ވަގުތު އަފްޣާނިސްތާނުން ބަހްރޭނަށް ގޮސްފައެއް ނުވެއެވެ. އެހެންކަމުން ކޮލިފައިންގެ ފަހު މެޗުގައި އަންނަ ބުރާސްފަތި ދުވަހު ރާއްޖެ ނުކުންނާނީ ބަހްރޭނާ ދެކޮޅަށެވެ.
