އުމުރުން 112 އަހަރު ވެފައިވާ، ސްޕެއިންގެ ސަޓާނިނޯ ޑީ ލާ ފުއެންޓެ ގާސިއާއަކީ ދުނިޔޭގައި މިވަގުތު ހުރި އުމުރުން އެންމެ ދުވަސްވީ ފިރިހެން މީހާ ކަމުގައި ދުނިޔޭގެ ރެކޯޓު ފޮތުން ނިންމައިފިއެވެ.
ގިނެސް ވާރލްޑް ރެކޯޑްއިން ނިންމާފައިވަނީ ސަޓާނިނޯ އުފަންވެފައިވަނީ، ސްޕެއިންގެ ހުޅަގު އުތުރުގައި އޮންނަ އަވަށެއް ކަމުގައިވާ ޕުއެންޓޭ ކާސްޓްރޯއަށް 1909ވަނަ އަހަރުގެ ފެބްރުއަރީ މަހުގެ 11 ވަނަ ދުވަހުގައި ކަމަށެވެ. އެހެންނަމަވެސް ފާއިތުވި މުއްދަތުގައި އޭނާ އޭނާގެ ހުރިހާ އުފަންދުވަހެއްވެސް ފާހަގަ ކޮށްފައިވަނީ މިދުވަހުގެ 3 ދުވަސް ކުރިން، ފެބްރުއަރީ މަހުގެ 8 ވަނަ ދުވަހުއެވެ.
އުމުރުން 112 އަހަރުވެފައިވާ ސަޓާނިނޯގެ ގާތުން އޭނާގެ ދިގު އުމުރުގެ ސިއްރަކީ ކޮބައިތޯ ސުވާލުކުރުމުން ޖަވާބުގައި ބުނެފައިވަނީ، އޭގެ ސިއްރަކީ "ހާސްކަމެއް ނެތް ދިރިއުޅުން" ކަމުގައެވެ.
އިސްކޮޅުން 4.92 ފޫޓު ހުންނަ ސަޓާނިނޯ ބުނެފައިވަނީ، 1936ވަނަ އަހަރު ފެށިގެންދިޔަ ސްޕެއިންގެ އަހުލީ ހަގުރާމައިގައި ބައިވެރިވުމުގެ ފުރުސަތު އޭނާއަށް ލިބިގެން ގޮސްފައި ނުވަނީ، އޭނާ އިސްކޮޅުން ކުރުވުމުގެ ސަބަބުން ކަމުގައެވެ.
ނަތީޖާއެއްގެ ގޮތުން ސްޕެއިންގެ އެތެރޭގެ މައްސަލަތައް ބޮޑު އެދުވަސްވަރުވެސް އޭނާ ހޭދަކޮށްފައިވަނީ، އޭނާގެ އަންހެނުންނާއެކީ އެއްވެސް ހާސްކަމެއް ނެތް ދިރިއުޅުމެއްގައެވެ. އަދި އޭރުވެސް އޭނާ އަދާ ކުރަމުން ގެންގޮސްފައިވާ ވަޒީފާއަކީ، ހަޔާތުގެ ބޮޑު ބައެއްގައި އޭނާ ކޮށްފައިވާ މަސައްކަތް ކަމަށްވާ ބޫޓު ހެދުމެވެ.
މީގެ އިތުރުން އުމުރުން 112 އަހަރުގެ ސަޓާނިނޯއަކީ ފުޓުބޯޅައަށް ވަރަށް ލޯބިކުރާ މީހެކެވެ. މިގޮތުން އޭނާވަނީ އެތައް އަހަރެއް ވަންދެން ފުޓުބޯޅަ ކުޅޭ، އަދި ލޯކަލް ޓީމެއް ކަމުގައިވާ ޕުއެންޓެ ކާސްޓްރޯ ނަމަކަށް ކިޔާ ޓީމެއްވެސް އޭނާގެ ހިއްސާ އޮވެގެން އުފައްދާފައެވެ. އަދި މީގެ ދެއަހަރު ކުރިން މިކުލަބުންވަނީ މިހާރު ދުނިޔޭގައި ހުރި މިކުލަބުގެ އެންމެ ދުވަސްވީ މީހާގެ ޝަރަފުވެސް ސަޓާނިނޯއަށް އަރުވާފައެވެ.
ބޮޑެތި ކުލަބްތަކުގެ ތެރެއިން އޭނާ އެންމެ ސަޕޯޓު ކުރާ ކުލަބަކީ ކުލަބް ކަލްޗުރަލް ލިއޮނެސާއެވެ.
ICYMI: We verified the world's oldest living man at the age of 112.
— Guinness World Records (@GWR) September 30, 2021
ސަޓާނިނޯއާއި އޭނާގެ އަންހެނުން، އެންޓޯނިނާ ބަރިއޯ ގުޓިއަރޭޒްއަށް 7 އަންހެން ކުދިންނާއި އެއް ފިރިހެން ކުއްޖަކު ލިބިފައި ވެއެވެ. އެހެންނަމަވެސް އޭނާއަށް ލިބިނު ހަމައެކަނި ފިރިހެން ދަރިފުޅުވަނީ ލަފަތުގައި މަރުވެފައެވެ. މިއަދު ސަޓާނިނޯ ބަލަހައްޓަމުންދަނީ އޭނާގެ އެއް އަންހެން ދަރިއަކާއި ދަނބިދަރިއެކެވެ.
އުމުރުން 112 އަހަރުގެ ސަޓާނިނޯގެ އާއިލާ ބޮޑުވެ ފުޅާވަމުގޮސް އެނާގެ މިހާރު 14 ކާފަ ދަނިންނާއި އަދި 22 މުނިކާފަ ދަރިން އެބަ ތިއްބެވެ.
ދުނިޔޭގައި މިވަގުތު ހުރި އެންމެ އުމުރުން ދުވަސްވީ މީހަކީ ޖާޕާންގެ ކަނެ ޓަނަކާއެވެ. ކަނެގެ މިހާރުގެ އުމުރުކީ 118 އަހަރެވެ. އަދި ދުނިޔޭގައި ދިރިއުޅެފައިވާ އުމުރުން އެންމެ ދުވަސްވީ މީހެއްގެ ރެކޯޑު މުގުރާލުމަށް އޭނާ ދުނިޔޭގައި އިތުރަށް ދިރިއުޅެން ޖެހެނީ އެންމެ 4 އަހަރަށެވެ.
މިރެކޯޑު މިހާރު އޮންނަނީ ފްރާންސްގެ ރައްޔިތެއް ކަމުގައިވާ ޖީންނެ ލުއިސް ކޯލްމެޓްގެ އަތުގައެވެ. އޭނާ އުފަންވީ 1875 ވަނަ އަހަރުގެ ފެބްރުއަރީމަހުގެ 22 ވަނަ ދުވަހުއެވެ. އަދި އޭނާ މަރުވެފައިވަނީ އުމުރުން 122 އަހަރުގައެވެ.
