އެއްގަމު އުޅަނދު ދުއްވުމުގެ ލައިސަންސް ނަގާ ޑްރައިވިން ޓްރެކެއް އުޅުމުގެ މަސައްކަތް މިއަދު ފަށައިފިއެވެ.
މިމަސައްކަތް ކުރުމަށް ޓްރާސްޕޯޓް މިނިސްޓްރީން ހަވާލުކޮށްފައިވަނީ މާލެ ސިޓީ ކައުންސިލާއިއެވެ. މާލެ ސިޓީ ކައުންސިލްގެ މޭޔަރު ޑރ.މުއިއްޒު ވިދާޅުވީ މިނިސްޓްރީން މަސައްކަތް ހަވާލުކުރުމުން ހުޅުމާލޭ ފޭސް އެކެއްގައި ޑްރައިވިންގ ޓްރެކް އެޅުމުގެ އަމަލީ މަސައްކަތް މިއަދު ފަށާފައިވާކަމަށެވެ.
މާލެ ސިޓީ ޑްރައިވިން ލައިސަންސް ސެންޓަރ ހެދުމުގެ މަސައްކަތް ޓްރާސްޕޯޓް މިނިސްޓްރީން މާލެ ސިޓީ ކައުންސިލާއި ހަވާލު ކުރުމުން އެ މަސައްކަތުގެ އަމަލީ މަސައްކަތް މާލެ ސިޓީ ކައުންސިލްގެ މުވައްޒިފުން މިއަދު ވަނީ ފަށާފަ. މި ސެންޓަރ ހަދަނީ ހުޅުމާލޭ ފޭސް އެކެއްގައި.
– މުއިއްޒު ވިދާޅުވިއެވެ.
މިމަސައްކަތް ކުރަނީ އެމްޑަބްލިއުއެސްސީގެ އެހީތެރި ކަމާއިއެކުގައެވެ. ހުޅުމާލޭގައި އެއްގަމު އުޅަނދު ދުއްވުމުގެ ލައިސަންސް ނަގާ ޑްރައިވިން ޓްރެކެއް ހެދުމަށް، އެމްޑަބްލިއުއެސްސީން އެހީ ދީފައިވަނީ އެ ކުންފުނީގެ އިޖްތިމާޢީ ޒިންމާގެދަށުންނެވެ. އެމްޑަބްލިއުއެސްސީން ބުނެފައިވަނީ މިމަސައްކަތް ކުރިއަށްގެންދިއުމަށް 1 މިލިއަނަށްވުރެ ގިނަ ރުފިޔާގެ ތަކެތި ހަވާލުކޮށްފަވާކަމަށެވެ. މި އެހީ މިނިސްޓްރީ އޮފް ޓްރާންސްޕޯޓް އެންޑް ސިވިލް އޭވިއޭޝަނާ ހަވާލުކޮށްދެއްވީ އެމްޑަބްލިއެސްސީގެ މެނޭޖިން ޑިރެކްޓަރ ޙަސަން ޝާހުއެވެ. ޓްރާންސްޕޯޓް މިނިސްޓްރީގެ ފަރާތުން އެހީއާ ހަވާލުވެވަޑައިގަތީ، މިނިސްޓަރ އައިޝަތު ނަހުލާއެވެ.
އެމްޑަބްލިއުއެސްސީން ބުނެފައިވަނީ މިފަދަ ކަމަކަށް އެކުންފުނިން އިސްނެގީ، އިންޖީނުލީ އެއްގަމު އުޅަނދުގެ ލައިސަންސްނަގާ މީހުންނަށް ޓެސްޓު ހެދުމުގައި ދިމާވެފައިވާ ދަތިތައް ޙައްލުކޮށްދިނުމަށްކަމަށެވެ. ޑްރައިވިން ލައިސަންސް ނެގުމަށް ބޭނުންވާ އެކަށީގެންވާ ޖާގައެއް ނެތުމަކީ ޑްރައިވިން ސްކޫލްތަކަށްވެސް އޮތް ގޮންޖެހުމެއް ކަމަށް އެ ކުންފުނިން ފާހަގަކުރެއެވެ.
