މޫސުން ވަރަަށް ބޮޑަށް ގޯސްވެފައި ވަނިކޮށް މާލެއިން ފުރައިގެން ވ. ފުލިދޫއަށް ދަތުރު ކުރަނިކޮށް ބަންޑުން ޖަހާލި ލޯންޗުން ކަނޑު މައްޗަށް ގެއްލުނު ކުޑަ ކުއްޖާ ހޯދުމުގައި ކޯސްޓް ގާޑުން ވައިގެ މަގުންނާއި، ކަނޑު މަގުން ބޮޑު ސަރަހައްދެއް ބަލައިފިއެވެ.
އެމްއެންޑީއެފުން ވިދާޅުވީ ކުއްޖާ ހޯދުމަށް މެދު ކެނޑުމެއްނެތި ކުރަމުންދާ މަސައްކަތުގައި މިއަދު މަޑުމަގުން 131 ސްކޮއެރ ނޯޓިކަލް މޭލު ބަލާފައިވާކަމަށެވެ. އަދި ވައިގެ މަގުން 4512 ސްކޮއެރ ނޯޓިކަލް މޭލު ބަލާފައިވާކަމަށެވެ. ނަމަވެސް އަދި މިހާތަނަށް ކުއްޖާ ފެންނަ ގޮތެއް ނުވެއެވެ. މޫސުން ގޯސްވެ ގަދަވަޔާއިއެކު ކަނޑުވެސް އާދަޔާއި ޚިލާފަށް ގަދަވުމުން އާންމު އުޅަދުފަހަރަށް އެސަރަހައްދަށް ދަތުރު ކުރުމަކީ ފަސޭހަ ކަމަކަށް ނުވެއެވެ. ނަމަވެސް ސިފައިން ދަނީ ކުއްޖާ ހޯދުމުގައި ގެއްލުނު ވަގުތުން ފެށިގެން މިހާތަނަށްވެސް އެއްވެސް ވަރުބަލި ކަމެއްނެތި މަސައްކަތް ކުރަމުންނެވެ.
މިދިޔަ ހޮނިހިރު ދުވަހުގެ ހަވީރު 5:00 ޖަހާ އެހާކަންހާއިރު އައި ކޮޅިގަނޑެއްގެ ތެރޭ ރާުޅުގައި ޖެހި ލޯންޗު ބަންޑުން ޖެހީ ކ. އޮޅުވެލި ރިސޯޓުގެ އިރުދެކުނު ބޭރަށެވެ. ލޯންޗް ބަންޑު ޖަހާލި ހާދިސާގައި އެކަކު މަރުވެފައި ވެއެވެ. އެއީ ގެއްލުނު ކުޑަ ކުއްޖާގެ މަންމަ، މ. ގްރީން ޕީކު، މަރިޔަމް ނާހިދާއެވެ.
މި ހާދިސާއަށް ފަހު ކުޑަ ކުއްޖާ ހޯދުމަށް ކުރަމުން އަންނަ މަސައްކަތުގައި ރެޔާ ހަމައަށް 60 އަކަ ކިލޯމީޓަރުގެ ސަރަހައްދެއް ބަލައިފައިވާ ކަމަށް ކޯސްޓުގާޑުން މައުލޫމާތު ދެ އެވެ. އަދި އެ ސަރަހައްދަށް އަދިވެސް ވަރަށް ކަނޑުގަދަ ކަމަށް ވަނީ ފާހަގަކޮށްފައެވެ.
