ރާއްޖޭގެ ބައިނަލް އަޤުވާމީ ވައިގެ ބަދަރު (ވެލާނާ އިންޓަރ ނޭޝަނަލް އެއާޕޯޓް) ގުޅިފައިވަނީ، ދިވެހިންގެ މިނިވަން ކަމާއި ކަމުގައި ޕީޕީއެމްގެ ނާއިބް ރައީސް އަހުމަދު ޝިޔާމް ވިދާޅުވެއްޖެއެވެ.
އިންޑިއާގެ ޖީއެމްއާރު އަތުން އެއާޕޯޓު އަތުލުމަކީ ރާއްޖޭގެ އިގްތިސޯދީ ކުރިއެރުމަށް މިހާތަނަށް އެޅުނު އެންމެ ބޮޑު ހުރަސް ކަމަށް ވިދާޅުވެ ފިނޭންސް މިނިސްޓަރު އިބްރާހިމް އަމީރު ވިދާޅުވި ވިދާޅުވުމަށް ރައްދު ދެއްވަމުން ޝިޔާމް ވިދާޅުވީ، އަނެއްކާވެސް ވެލާނާ އިންޓަރބޭޝަނަލް އެއާޕޯޓްގެ ވާހަކަ ދައްކައިގެން މަސައްކަތް ކުރަނީ އިންޑިއާއަށް އެއާޕޯޓް ދިނުމަށް ކަމަށެވެ. ރާއްޖޭގެ މައި ދޮރޯއްޓަކީ ދިވެހިންގެ މިނިވަންކަމާއި ގުޅިފައިވާ އެއާޕޯޓަށް ވާއިރު ދިވެހިން މިކަމުގައި އަބަދުވެސް ބަސް ބުނާނެކަމަށް ޝިޔާމް ވިދާޅުވިއެވެ.
ބޮޑުތަނުން ދައުލަތް ދަރުވާފަ ލާރިކޮޅެއް ހޯދުމުގެ ނަމުގައި އިންޑިއާގެ ކުންފުޏަކަށް ދިވެހިންގެ މައި ދޮރޯށި ދިނުމުގެ ނުބައި ވިސްނުން މިއީ. ރައީސް ޞާލިހު ކޮން އަޖުމައެއް ބައްލވަންތޯ އަމީރު ލައްވާ ޓުވީޓު ކުރައްވަނީ. އިޤްތިޞާދާއި އެއްވަރަށް ވެލާނާ އެއާޕޯޓް ގުޅިފައިވަނީ ދިވެހިންގެ މިނިވަންކަމާއި.
– ޝިޔާމް ވިދާޅުވިއެވެ.
ފިނޭންސް މިނިސްޓަރ އިބްރާހިމް އަމީރު ޓްވިޓަރގައި އާއްމުކުރެއްވި ބަޔާނެއްގައި ވިދާޅުވީ ޖީއެމްއާރު އަތުން އެއަރޕޯޓު އަތުލުމަކީ އެމަނިކުފާނު ދެކޭ ގޮތުގައި ރާއްޖޭގައި މިހާތަނަށް އިގުތިސާދީ ގޮތުން ހިންގުނު އެންމެ ބޮޑު ޖަރީމާކަމަށެވެ. މިނިސްޓަރ ވިދާޅުވީ އެއަރޕޯޓު އަތުލުމުގެ ސަބަބުން ރާއްޖެއިން 270 މިލިއަން ޑޮލަރު ދައްކަން ޖެހުނުކަމަށެވެ. އަދި އެއަރޕޯޓު ނުހެދި ޓޫރިޒަމް ސިނާއަތުގެ ކުރިއެރުމަށް ހުރި ހުރަސްތައް ގިރާކުރުމަށް އޭރުގެ ސަރުކާރަށް ދެން ޖެހުނީ ބަޖެޓުން އެއަރޕޯޓް މަޝްރޫއަށް ފައިނޭންސް ކުރަންކަމަށްވެސް އަމީރު ވިދާޅުވިއެވެ.
މާލޭ ބައިނަލްއަޤްވާމީ ވައިގެ ބަނދަރު، އިންޑިއާގެ ޖީއެމްއާރު ކުންފުންޏަށް ކުއްޔަށް ދެއްވުމަށް 2010 ވަނަ އަހަރުގެ ޖޫން މަހުގެ 28 ވަނަ ދުވަހު، ވެވިފައިވާ އެއްބަސްވުން ރޫޅާލައްވަން ދިވެހި ސަރުކާރުން ނިންމެވީ 2012 ވަނަ އަހަރުގެ ނޮވެމްބަރު މަހުގެ 27 ވަނަ ދުވަހުއެވެ.
މި އެއްބަސްވުން އުވާލެއްވީ ރައީސް ޑރ. މުޙައްމަދު ވަޙީދު ޙަސަންގެ ސަރުކާރުން ކަމަށްވީނަމަވެސް، މި މަސައްކަތުގައި އޭރު ރައްޔިތުންގެ މަޖިލީހުގެ މުލަކު ދާއިރާގެ މެމްބަރު، އަދި ކުރީގެ ރައީސްޖުމްހޫރިއްޔާ ޢަބްދުﷲ ޔާމީން ޢަބްދުލްޤައްޔޫމް ވަނީ މުހިންމު ދައުރެއް އަދާކުރައްވާފައެވެ. އެމަނިކުފާނުގެ ޕާޓީ ޕީޕީއެމުންވެސް ވަނީ މިކަމުގައި މުހިންމު ދައުރެއް އަދާކޮށްފައެވެ. ރައީސް ޔާމީން 2013 ވަނަ އަހަރު ވެރިކަމަށް ވަޑައިގަތުމަށްފަހުވެސް ވަނީ މި މައްސަލަ ޙައްލުކުރެއްވުމަށް ގިނަ މަސައްކަތްޕުޅުތަކެއް ކުރައްވާފައެވެ.
އިބްރާހީމް ނާޞިރު އިންޓަރނޭޝަނަލް އެއަރޕޯޓަށް 50 އަހަރު ފުރުމުގެ މުނާސަބާ ފާހަގަކުރުމުގެ ގޮތުން 2016 ވަނަ އަހަރުގެ މެއިމަހުގެ 6 ވަނަދުވަހު ދަރުބާރުގޭގައި ބޭއްވި ރަސްމިއްޔާތުގައި ވާހަކަފުޅުދައްކަވަމުން ރައީސް ޔާމީން ވިދާޅުވެފައިވަނީ ރައީސް ނަޝީދުގެ ސަރުކާރުން އިބްރާހީމް ނާޞިރު އިންޓަރނޭޝަނަލް އެއަރޕޯޓް އިންޑިއާގެ ޖީއެމްއާރު ކުންފުންޏަށް ދެއްވި ދެއްވުމަކީ އިޤްތިޞާދީ ގޮތުން ހިންގެވި ބޮޑު ޖަރީމާއެއް ކަމަށެވެ. ރައީސް ވިދާޅުވީ އެއަރޕޯޓް ޖީއެމްއާރަށް ކުއްޔަށް ދެއްވިތާ އެއް އަހަރު ދުވަހުގެ ތެރޭގައި ސަރުކާރަށް ލިބިވަޑައިގަތީ އެންމެ 16 މިލިއަން ރުފިޔާ ކަމަށާއި، އެއީ އެންމެ އާދައިގެ ވިޔަފާރިއަކުންވެސް އަހަރު ދުވަހުގެ ތެރޭގައި ލިބޭނެ މިންވަރެއް ކަމަށެވެ.
އެއަރޕޯޓު ޖީއެމްއާރާ ޙަވާލުކުރެއްވުމުގެ ކުރިން ހަމައެކަނި 2000 ވަނަ އަހަރުން ފެށިގެން 2009 ވަނަ އަހަރަށް ބަލާއިރު ކޮންމެ އަހަރަކު އެވްރެޖްކޮށް 1.8 ބިލިއަން ރުފިޔާ ލިބޭކަމަށް ހިސާބުތަކުން ދައްކައެވެ. ޖީއެމްއާރާއި އެއަރޕޯޓު ޙަވާލުކުރެއްވުމުގެ ކުރިން އެއަރޕޯޓު ހިންގި ކުންފުންޏަށް މިވަރުގެ ޢާމްދަނީއަށް ލިބިފައިވާއިރު، ޖީއެމްއާރު އެއްބަސްވުން އުވާލެއްވުމަށްފަހުވެސް ގާތްގަނޑަކަށް މިހާވަރުގެ ޢާމްދަނީއެއް އެއަރޕޯޓުން ވަނީ ލިބިފައެވެ. ޖީއެމްއާރު މައްސަލަ މުޅިން ނިމި، ބަދަލުގެ ގޮތުގައި ދިވެހި ދައުލަތުން ދައްކަންޖެހޭ ޢަދަދު ކަނޑައެޅިގެންދިޔައީ މިދިޔަ މަހުގެ 21 ވަނަ ދުވަހުއެވެ. ދިވެހި ދައުލަތުން ޖުމުލަ ދައްކަންޖެހުނު 271 މިލިއަން ޑޮލަރު، އެމްއޭސީއެލްއިން ދައްކައި ޚަލާޞްކުރީވެސް ރައީސް ޔާމީންގެ ވެރިކަމުގައެވެ.
