މީހުން މަރާ މީހުންގެ މައްޗަށް ޤިސާސް ހިފުމާއެކު މަސްތުވާ އެއްޗެތީގެ މައްސަލައަށް ދާއިމީ ޙައްލެއް ގެނެސްދޭނެ ކަމުގައި ކުރިއަށް އޮތް 2023ގެ ރިޔާސީ އިންތިޚާބުގައި ވާދަކުރައްވާނެކަމަށް އިއުލާން ކުރައްވާފައިވާ ކުރީގެ ހޯމް މިނިސްޓަރ އުމަރު ނަސީރު ވިދާޅުވެއްޖެއެވެ.
ހޯމް މިނިސްޓަރު ކަމުގައި ހުންނެވި ދުވަސްވަރު މަރުގެ އަދަބު ތަންފީޒު ކުރުމަށް ގިނަ މަަސައްކަތްތަކެއް ކުރެއްވި އުމަރު ވިދާޅުވީ ރާއްޖޭގެ އަމާން ރަށްތަކުގެ އަމާންކަން ގެއްލި ހުރިހާ ރަށްތައް ނާމާން ވެފައި ވަނީ ގިސާސް ހިފުމަށް ވެރިން ފަސްޖެހުމާ މަސްތުވާ އެއްޗެތި ހުއްޓުވުމަށް ފަސްޖެހިގެން ކަމަށެވެ.
ރާއްޖޭގެ އަމާން ރަށްތަކުގެ އަމާންކަން ގެއްލި ހުރިހާ ރަށްތަށް ނާމާން ވެފައިމިވަނީ ޤިސާސް ހިފުމަށް ވެރިން ފަސްޖެހުމާ، މަސްތުވާ އެއްޗެތި ހުއްޓުވުމަށް ފަސްޖެހިގެންނެވެ. އިރާދަކުރެއްވިއްޔާ ޤިސާސް ހިފުމާއެކު މަސްތުވާ އެއްޗެތީގެ މައްސަލައަށް ދާއިމީ ޙައްލެއް ގެނެސްދޭނަމެވެ.
– އުމަރު ވިދާޅުވިއެވެ.
އުމަރު މިހެން ވިދާޅުވީ މަރާލާފައި އޮއްވާ އިއްޔެ ފެނުނު އދ. ދަނގެތީ މޮނަލާޒް، މަހްމޫދު އަބޫބަކުރުގެ މަރާއި ގުޅޭގޮތުން ކުރެއްވި ޓްވީޓެއްގައެވެ. ރަހުމުކުޑަ ހަމަލާތަކެއްދީ މަހުމޫދު އަބޫބަކުރު މަރާލާ ގޯންޏެއްގެ ތެރެއަށްލާ އޭނާގެ މާމަގެ ގެ، މަންޒަރު ގޭގެ ވަޅުތެރެއަށް އެއްލާލާފައިވަނިކޮށް ފެނިފައިވަނީ ބުދަ ދުވަހުގެ ހަވީރުވާން އުޅެނިކޮށެވެ.
މަރުތަކުގެ އިތުރުން މަސްތުވަތަކެތި އާންމުވެ ފުލުހުން ދަނީ ގިނަ އަދަދެއްގެ މަސްތާތަކެތި އަތުލައިގަންނަމުންނެވެ. އެގޮތުން މިވީ 48 ގަޑިއިރުގެ ތެރޭގައި ފުލުހުން ވަނީ 350 ކިލޯގެ މަސްތުވާތަކެތި އަތުލައިގަނެފައެވެ. އުމަރު ވިދާޅުވެފައިވަނީ މިކަން ހައްލުވަނީ މިކަން ކުރުމަށް އަޑީގައި ހުންނަ މީހާއަކީ ކޮބައިތޯ ބަލައި އޭނާ ހައްޔަރު ކުރެވިގެން ކަމަށެވެ.
