ދުވަސް ނުފުރާ އުފަންވި އެއްމާބަނޑު ތިން ފިރިހެން ކުއްޖަކު މިއަދު އައިޖީއެމްއެޗުގައި ނިއާވެއްޖެއެވެ.

ނިޔާވެފައިވަނީ ދުވަސް ނުފުރާ އައިޖީއެމްއެޗްއަށް ވިހެއި ތިން ފިރިހެން ކުދިންނެވެ. އެނގިފައިވާގޮތުން މިއަދު އެކުދިން ވިހެއީ ފަސްމަހުގައެވެ. މިކުދިން ނިޔާވީ އަންހެންމީހާގެ ފެންދުލި ފަޅައިގެން ގޮސްގެން، ދުވަސް ނުފުރާ ވިހެއުމަށްފަހު ފަރުވާދެމުން ދަނިކޮށް ކަމަށް މައުލޫމާތު ލިބެއެވެ. މި ތިން ކުދިންނަކީ އައްޑޫ ސިޓީ ހިތަދޫއަށް ނިސްބަތްވާ ދެމަފިރިއަކަށް ލިބުނު ތިން ކުދިން ކަމަށް މަޢުލޫމާތު ލިބެއެވެ. މި ދެމަފިރިންގެ އުމުރުން ފަސް އަހަރުގެ އަންހެން ކުއްޖަކު އެބަހުއްޓެވެ.

މި ތިން ކުދިންގެ ބަރުދަނުގައިވެސް 400 ގްރާމް ހަމަނުވެއެވެ. އެއްމާބަނޑު ތިން ކުދިންގެ ޖަނާޒާ މިއަދު ހަވީރު 5 ޖެހިއިރު ވަނީ ކުރިއަށް ގެންގޮސްފައެވެ. އެ ކުދިންގެ ޖަނާޒާގެ ކަންކަން ކުރިއަށް ގެންދިޔައީ ކުދިންނަށް ނަން ކިޔުމަށް ފަހު އެވެ. ތިން ފިރިހެން ކުދިންނަށް މިޒުވާން، މާޒިން އަދި މާކިންގެ ނަމުން ވަނީ ނަން ކިޔާފައެވެ.

ވިހެއުމަށްފަހު ތިން ކުދިން ނިޔާވިނަމަވެސް އަންހެން މީހާގެ ހާލު ރަނގަޅެވެ. ތިން ކުދިން މިއަދު ވިހެއިފަހުން މާގިނައިރެއް ނުވަނީސް ނިޔާވެފައި ވާއިރު، ވިހެއުމާހަމަޔަށްވެސް އެކުދިންގެ ހާލު ރަނގަޅު ކަމަށް މަޢުލޫމާތު ލިބިފައި ވެއެވެ.

މި ތިން ކުދިންގެ ޖަނާޒާ ކުރިއަށް ގެންގޮސްފައިވަނީ މިއަދުގެ އަސްރުގެ ނަމާދުގެ ކުރިންނެވެ. މި ހިތާމަވެރި ހާދިސާ އާއި ގުޅިގެން ގިނަ ބަޔަކު އަންނަނީ އެކުދިންގެ އާއިލާއާއި އެކީ ވާކަން ހާމަކޮށް، އާއިލާއަށް ތައުޒިޔާ ރައްދުކުރަމުންނެވެ.