136 މިލިއަން ޑޮލަރުގެ އަގުހުރި، 500 ކިލޯގެ ކޮކެއިން ދުބާއީ ޕޮލިހުން އަތުލައިގެންފިއެވެ. މިއީ މި މިހާތަނަށް ހިފެހެއްޓި މި ސަހައްދުގައި ގައުމަކަށް އެތެރެކުރަން މަސައްކަތް ކޮށްފައިވާ އެންމެ ގިނަ އަދަދެއްގެ މަސްތުވާ ތަކެއްޗެވެ.
ދުބާއީގެ ފުލުހުންގެ ބުނެފައިވަނީ، ބައިނަލް އަގުވާމީ ބޮޑު ނެޓްވާރކަކުން ދުބާއީއަށް އެތެރެކުރަން މަސައްކަތް ކޮށްފައިވާ މަސްތުވާތަކެތީގެ މިބޮޑު ޝިޕްމަންޓާއެކީ ހައްޔަރު ކޮށްފައިވަނީ އެންމެ މީހެއްކަމުގައެވެ. އަދި ފުލުހުން ބުނެފައިވަނީ މި މަސްތުވާތަކެތި ރައްކާ ކޮށްފައިހުރީ ކަނޑު މަގުންއައި ކޮންޓެއިނަރއެއްގެ ޕެނަލްތަކުގެ ތެރޭގައި ކަމުގައެވެ.
ދުބާއީ ފުލުހުންނަށް ލިބުނު ސިއްރު މައުލާމާތަކާއި ގުޅިގެން، "އޮޕަރޭޝަން ސްކޯޕިއަން"ގެ ނަމުގައި ކުރިޔަށް ގެންދެވުނު މި އޮޕަރޭޝަންގައި ޝަކުކުރެވުނު މީހާގެ ހަރަކާތްތައް ފުލުހުންވަނީ އޭނާ މި ކޮންޓެއިނަރ ވެއަރ ހައުސްއަށް ގެންދަންދެން ބަލަހައްޓާފައެވެ.
#DubaiPolice foils Drug Smuggling Attempt of 500 Kilograms of Cocaine. pic.twitter.com/bdv4wFaUsJ
— Dubai Policeشرطة دبي (@DubaiPoliceHQ) October 10, 2021
އަދި ފުލުހުން ބުނެފައިވަނީ، ކޮންޓެއިނަރ ވެއަރހައުސްއަށް ގެންދިއުމަށްފަހު އޭނާވަނީ ކޮންޓެއިނަރުގެ ތެރޭގައި ރައްކާ ކޮށްފައިހުރި މަސްތުވާތަކެތި ނެގުމަށްޓަކާ، ޕަވަރ ޓޫލްތައް ކަމުގައިވާ ދަގަނޑު ކަފާ ގްރައިޑަރުތައް ފަދަ ތަކެތި ގަނެފައެވެ.
ފުލުހުންވަނީ މި ކޮންޓެއިނަރ ގެންދެވުނު ވެއަރ ހައުސް ރެއިޑް ކުރުމަށްފަހު، މިމީހާ "ރެޑް ހޭންޑް"ކޮށް ހައްޔަރުކޮށް، އަދި މަސްތުވާތަކެތިވެސް އަތުލައިގެންފައި ކަމަށް އެންޓި ނާރކޮޓިކްސްގެ ޖެނެރަލް ޑިޕާޓްމަންޓްގެ ޑެޕިޓީ ޑިރެކްޓަރ ކާނަލް ޚާލިދު ބިން މުވައިޒާ، ދުބާއީ ޕޮލިސްގެ ފޭސްބުކް ޕޭޖުގައި އާންމުކޮށްފައިވާ ބަޔާނެއްގައި ވިދާޅުވެފައި ވެއެވެ.
ހައްޔަރު ކޮށްފައިވާ މީހާއަކީ ކާކުކަން ފުލުހުން ހާމަކޮށްފައި ނުވިނަމަވެސް، އޭނާއަކީ އަރަބި ގައުމަކަށް ނިސްބަތްވާ މީހެއްކަން ފުލުހުން ވަނީ ހާމަކޮށްފައެވެ.
މިއަހަރުގެ ސެޕްޓެމްބަރުމަހުގެ ކުރީކޮޅު އަބޫދާބީ ފުލުހުންވަނީ، ސޯޝަލް މީޑިއާގެ މެސެޖްތަކުގެ ޒަރީއާއިން މައުލޫމާތު އެއްކޮށް، 815 ކިލޯގެ މަސްތުވާތަކެތި އަތުލައިގެންފައެވެ.
މިމަސްތުވާތަކެތި އަތުލައިގަތުމަށްފަހު ފުލުހުން ބުނެފައިވަނީ، މި ތަކެތި ޑީލްކުރަމުންދިޔަ ފަރާތްތަކުން ދިޔައީ، ޔޫއޭއީގެ ކޮންމެ ހިސާބަކަށްވެސް މަސްތުވާތަކެތި ފޯރުކޮށްދޭ ކަމަށް ބުނެ، އެމީހުންގެ ޚިދުމަތްތައް އިސްތިހާރު ކުރަމުން ކަމުގައެވެ.
ކޮމެންޓު ފޮނުވާ