ހއ.ފިއްލަދޫ ކައުންސިލްގެ އިހްތިސާސްތެރޭގައި ދައްޕަރު އަލުން ހިމެނުމަށް ނިންމި ނިންމުމާއިއެކު ދައްޕަރުގައި ފަތުރުވެރިކަން ތަރައްޤީ ކުރުމަށް ކައުންސިލަށް އެއްބާރުލުން ދެއްވާނެކަމަށް ޓުވަރިޒަމް މިނިސްޓަރ ޑރ.އަބްދުﷲ މައުސޫމް ވިދާޅުވެއްޖެއެވެ.
ދައްޕަރަކީ ފިއްލަދޫއާ އެއް ބިމެއްގައި އޮންނަ ރަށެއްނަމަވެސް، ސަރުކާރުން ވަނީ ދައްޕަރުން ނަފާ ހޯދުމަށްކުރަންޖެހޭ މަސައްކަތްތައް ކުރުމަށް މިދިޔަ އޮގަސްޓްމަހުގެ ތެރޭގައި ފިއްލަދޫގެ އިހްތިސާސުން ދައްޕަރު ވަކިކޮށްފައެވެ. ފިއްލަދޫގެ އިހްތިސާސުން ދައްޕަރު ވަކިކުރަން ސަރުކާރުން ނިންމީ އިންޓަރގްރޭޓަޑް ރިއަލް އެސްޓޭޓް ޕްރޮޖެކްޓެއްގެ ގޮތުގައި އެރަށް ތަރައްޤީކޮށް ނަފާ ހޯދުމަށެވެ. ނަމަވެސް ފިއްލަދޫގެ އިހްތިސާސުން ދައްޕަރު ވަކިކުރުމާއި ގުޅިގެން އެރަށު ކައުންސިލާއި ރައްޔިތުން ވަނީ ކަންބޮޑުވުން ފާޅުކޮށްފައެވެ. އެކަމާއި ގުޅިގެން ސަރުކާރުން އޭރު ވިދާޅުވީ ދައްޕަރު މައްސަލައިގައި ރައްޔިތުންގެ ޝުޢޫރާއި ދެކޮޅަށް ސަރުކާރުން އެއްވެސް މަސައްކަތެއް ނުކުރާނެކަމަށާއި، އެކަމުގައި ގޮތެއް ނިންމަވާނީ ފިއްލަދޫ ރައްޔިތުންނާއި މަޝްވަރާކުރުމަށްފަހުކަމަށެވެ.
މިކަމާއި ގުޅިގެން ޑރ.މައުސޫމް ކުރެއްވި ޓުވީޓުގައި ވިދާޅުވީ ފިއްލަދޫގެ އިއްތިޞާޞްގައި ދައްޕަރު ހިމެނުމަކީ ރައީސް ޞާލިހު ނިންމެވި ސަތޭކައިގެ ނިންމެވުމެއް ކަމަށެވެ. ރަށްރަށުގެ ރަށްވެހިންނާއި ކައުންސިލްތައް ބާރުވެރިކުރުމަކީ ރަށްރަށަށް ނަފާވެރިކަން ލިބިގެންދާނެކަމެއްކަމަށް މައުސޫމް ވިދާޅުވިއެވެ. ދައްޕަރުގަ ފަތުރުވެރިކަން ތަރައްގީކުރުމަށް ފިއްލަދޫ ކައުންސިލަށް އުފަލާއިއެކު އެއްބާރުލުން ދެއްވާނެކަމަށް ޑރ.މައުސޫމް ވިދާޅުވިއެވެ.
ފިއްލަދޫގެ އިހުތިސޯސުގަ ދައްޕަރު ހިމެނުން. ރައީސް ޞާލިޙުގެ ސަތޭކައިގެ ނިންމެވުމެއް. ޝުކުރިއްޔާ ރައީސް! ރަށްވެހިންނާއި ކައުންސިލަށް މަރުހަބާ! ދައްޕަރުގަ ފަތުރުވެރިކަން ތަރައްގީކުރުމަށް ފިއްލަދޫ ކައުންސިލަށް އުފަލާއިއެކު އެއްބާރުލުން ދޭނަން!
– ޑރ.މައުސޫމް ވިދާޅުވިއެވެ.
ފިއްލަދޫގެ މީހުން ދިރިނޫޅޭ ސަރަހައްދު ވަކިކޮށް އެއީ ފަޅު ރަށެއްގެ ގޮތުގައި ކަނޑައެޅީ 2010 ވަނަ އަހަރު ސަރުކާރުން އޮތީ ކަނޑައަޅާފައެވެ. އޭރުގެވެސް ސަރުކާރުގެ ވިސްނުން ހުރީ ފަތުރުވެރިކަމަށް އެރަށް ބޭނުންކުރުމަށެވެ. ނަމަވެސް އެފަދަ މަސައްކަތެއް ނުފެށި އުޅެނިކޮށް، ފިއްލަދޫގެ ކައުންސިލުގެ އިހްތިސާސްގެ ތެރޭގައި ދައްޕަރު ހިމެނުއްވީވެސް ރައީސް ސާލިހުގެ ވެރިކަމުގައި މިދިޔަ އަހަރުގެ ޖުލައިމަހުގެ ތެރޭގައެވެ.
