ސީރިއާގެ އިދްލީބު ސަރަހައްދުގެ ހުޅަގު އުތުރުގައި، ފާއިތުވި ސެޕްޓެމްބަރު މަހުގެ 23ވަނަ ދުވަހު ދިން ވައިގެ ހަމަލާތަކުގައި، އަލްގައިދާގެ އިސް ކޮމާންޑަރެއް ކަމުގައިވާ، ސާލިމް އަބޫ އަހުމަދު، މަރާލާފައިވާކަން އެމެރިކާއިން ހާމަކޮށްފިއެވެ.
ސިރީއަން އޮބްޒަވޭޓަރީ ފޯރ ހިއުމަން ރައިޓްސްއިން ބުނެފައިވަނީ، މިހަމާ ދީފައިވަނީ ޑްރޯންއެއް ބޭނުންކޮށްގެން، ސީރިއާގެ އިދުލިބް ސިޓީއިން ބިއްނިޝްއަށް ދުއްވަމުންދިޔަ ކާރަކަށް ކަމަށެވެ. އަދި ބުނެފައިވަނީ މިހަމަލާގައި ޖިހާދީންގެ 2 ކޮމާންޑަރަކު މަރުވެފައިވާ ކަމަށެވެ.
މިހަމަލާގައި އަލްގައިދާގެ އިސް ކޮމާންޑަރަކު މަރުވެފައިވާކަން އެމެރިކާއިން މިހާތަނަށް ހާމަ ކޮށްފައިވި ނަމަވެސް އެއީ ކޮން ކޮމާންޑަރެއްކަން މިހާތަނަށް ހާމަ ކޮށްފައެއް ނުވެއެވެ.
ހުކުރުދުވަހު ނެރުނު ބަޔާނެއްގައި ސެންޓްކޮމްގެ ތަރުޖަމާން ޖޯން ރިގްސްބީ ވިދާޅުވެފައިވަނީ، އަބޫ ސާލިމް އަހުމަދަކީ "އެއްރީޖަނުން އަނެއް ރީޖަން ހުރަސްކޮށް އަލްގައިދާއިން ދޭ ހަމަލާތައް ރާވާ ހިންގުމުގައާއި، ފަންޑު ކުރުމުގައާއި، އަދި މިހަމަލާތަކަށް ހުއްދަ ދިނުމުގައިވެސް ޒިންމާ އުފުލަންޖެހޭ ފަރާތެއް" ކަމުގައެވެ.
"މިހަމަލާގެ ސަބަބުން އާންމު އެއްވެސް ރައްޔިތަކަށް އަނިޔާއެއް ލިބިފައިވާ ކަމަކަށް ނުބެލެވޭ،" ބަޔާނުގައި ބުނެފައި ވެއެވެ.
ސީރިއާގެ އިދުލިބް ސަރަހައްދަކީ، ސީރިއާގެ ކުރީގެ އަލްގައިދާއާއި ވަރަށް ބޮޑަށް ގުޅުން އޮތް ސަރަަހައްދެކެވެ. އެހެންނަމެވެސް ސިރިއާ ސަރުކާ ދެކޮޅަށް ހަގުރާމަކުރާ ފަރާތްތަކާއި، އަދި އިތުރު ޖިހާދީ ހަގުރާމަވެރިންވެސް މިސަރަހައްދުގައި އުޅެމުން ދެއެވެ.
ސީރިއާގައި ހަރަކާތްތެރިވަމުންދާ ޖިހާދީ ހަގުރާމަވެރިންނަކީ، ފާއިތުވެދިޔަ ތަނުގައި، ސީރިއާ ސަރުކާރުގެ އިތުރުން، ސީރިއާގައި ތިބޭ ރަޝިއާ ސިފައިންނާއި، އެމެރިކާގެ އިތުރުން ބައިނަލްއަގުވާމީ ކޯލިޝަންގެ އަސްކަރީ ހަމަލާތައްވެސް އަމާޒުވެފައިވާ ފަރާތްތަކެކެވެ.
ސީރިއާގައި އަލްގައިދާގެ އިސް ކޮމާންޑަރަކު މަރާލާފައިވާކަމަށް އެމެރިކާއިން ބުނެފި
