ބޯޓުދަތުރުފަތުރު ކުރާ ފަރާތްތަކުގެ ހައްޤުތައް ރައްކާތެރި ކޮށްދޭނެ ބިލެއް ތައްޔާރުކުރުމުގެ މަސައްކަތް ޓްރާސްޕޯޓް މިނިސްޓްރީން ފަށައިފިއެވެ.
މިއަދު ފާހަގަ ކުރެވޭ ދުނިޔޭގެ ކަނޑުދަތުރު ފަތުރުގެ ދުވަހުގެ ހެޔޮ އެދުމާއި ތަހްނިޔާ ދިވެހިރާއްޖޭގެ ކަނޑު ދަތުރުފަތުރުގެ ސިނާއަތުގައި ޝާމިލްވާ އެންމެހާ ފަރާތްތަކަށް ފޮނުވައި، މިނިސްޓަރ ދެއްވި ޚިތާބުގައި ވިދާޅުވީ ބައިނަލްއަޤްވާމީ ކަނޑުދަތުރުފަތުރާ ބެހޭ ޖަމްއިއްޔާ އިންޓަރނޭޝަނަލް މެރިޓަމް އޯގަނައިޒޭޝަން (އައި.އެމް.އޯ) ވުޖޫދުވެގެން އައިސްފައިވަނީ 17 މާރިޗު 1948 ގައެވެ. ދިވެހިރާއްޖެއިން މިޖަމިއްޔާގެ މެމްބަރަކަށް ވެފައިވަނީ 31 މެއި 1967 ގައެވެ. އަދި ފުރަތަމަ ފަހަރަށް އައި.އެމް.އޯ އަށް ދިވެހިރާއްޖޭގެ ފަރާތުން ދާއިމީ މަމްދޫބެއް ކަނޑައެޅިގެން ދިޔައީ 06 ޖުލައި 2021 ގައެވެ.
ކަނޑުދަތުރުފަތުރު މެދުވެރިކޮށް މުދާ އުފުލުމަކީ ފާއިތުވެދިޔަ އެތައްހާސް އަހަރެއްގެތެރޭ ދުނިޔޭގެ ވިޔަފާރީގެ މައިބަދަ ކަމުގައި ވެގެންގޮސްފައިވާކަމުގައި ދަންނަވަންޖެހެއެވެ. ދުނިޔޭގެ ވިޔަފާރީގެ 90 އިންސައްތަ މުދާ އެއްބައްރުން އަނެއް ބައްރަށް އުފުލުމަށް ބޭނުންކުރެވޭ އެންމެ އިތުބާރުކުރެވޭ، ޚަރަދުކުޑަ ވަޞީލަތަކީ ކަނޑުމަގުން މުދާ އުފުލުމެވެ. އިޤްތިސާދީ މަންފާ ޤައުމީ އަދި ފަރުދީ ފެންވަރުގައި ލިބި، ފުދުންތެރި އިޤްތިސާދެއް ބިނާކުރުމަށް މިކަމުން އެހީތެރިކަން ލިބެއެވެ.
ކޮވިޑްގެ ބަލިމަޑުކަމުގައި ބޭހާއި، ކާބޯތަކެތި އަދި ޒަރޫރީ ބޭނުންތަކަށް ކޮންމެހެން ބޭނުންވާ ތަކެތި މުޅި ދުނިޔޭގެ އެކި ކަންކޮޅުތަކަށް ފޯރުކޮށް ދިނުމަށް ބޯޓު ދަތުރުކުރާ 2 މިލިއަނެއްހާ މީހުން ކުރި ބުރަ މަސައްކަތާއި ވީޤުރުބާނީ ވަރަށް ފާހަގަ ވެގެންދިޔައެވެ. މިބަލިމަޑުކަމުގެ ތެރޭގައި ގިނަ ގޮންޖެހުންތަކާ އެކުވެސް ޝިޕިންގް އިންޑަސްޓްރީން ކުރި މަސައްކަތް ބައިނަލްއަޤވާމީ ފެންވަރުގައި ފާހަގަ ކުރެވިގެންދެއެވެ. އައި.އެމް.އޯ އަދި އިންޓަރނޭޝަނަލް ލޭބަރ އޯގަނައިޒޭޝަން (އައި.އެލް.އޯ) ގެ އެދުމުގެ މަތިން އިންސާނިއްޔަތަށް ޚިދުމަތް ކުރުމުގެ ގޮތުން އަޅުގަނޑުމެންގެ ބަނދަރުތަކާއި ބޯޑަރު، ހުޅުވައި ޚިދުމަތްދޭން ފެށުނީ ކޮވިޑްގެ އެންމެ ދަތި އުނދަގޫ ވަގުތުގައެވެ.
ބައިނަލްއަޤްވާމީ ކަނޑުދަތުރުފަތުރާ ބެހޭ ދުވަހަށް މިއަހަރަށް ކަނޑަ އަޅާފައިވާ ޝިއާރަކީ "ސީފެއަރާސް: އެޓް ދަ ކޯ އޮފް ޝިޕިންގ ފިޔުޗަރ" އެހެންކަމުން މިސިނާޢަތް ތަރައްޤީކޮށް ކުރިއެރުވުމަކީ ވަރަށް މުހިއްމުކަމެއް. މިސިނާޢަތް ކުރިއެރުވުމަށް އެންމެ ބޭނުންވަނީ މިކަމުގެ ތަޢުލީމާއި ތަޖުރިބާ ލިބިފައިވާ ޤާބިލް މީހުން އުފެއްދުން. އެހެންކަމުން މިދާއިރާއަށް ބޭނުންވާ މީހުން އުފެއްދުމަށްޓަކައި ޤައުމީ ޔުނިވަރސިޓީއާއިއެކު އެމް.އޯ.ޔޫ އެއްގައި ސޮއިކޮށްފައިވާކަން އުފަލާއިއެކު ފާހަގަކުރަން. މި އެމް.އޯ.ޔޫގެ ދަށުން ޑެކް އޮފިސަރުންނާއި އިންޖީނު އޮފިސަރުން ތަމްރީނު ކުރެވިގެން ދާނެ. މިކަމުގެ ބޭނުމަކީ ޒުވާނުންނަށް މިދާއިރާއަށް ވަނުމަށް ހިތްވަރުދިނުމާއި މިކަމަށް މިދާއިރާގައި ހުރި ފުރުސަތުތައް ބުނެދިނުން.
– ނަހުލާ ވިދާޅުވިއެވެ.
ބޯޓުދަތުރުފަތުރު ކުރާ ފަރާތްތަކުގެ ހައްޤުތައް ރައްކާތެރި ކޮށްދޭނެ ބިލެއް ތައްޔާރުކުރުމުގެ މަސައްކަތް ސަރުކާރާއި ސީފެއަރާސް ރައިޓްސް އިންޓަރނޭޝަނަލް (އެސް.އާރު.އައި) އާއި ގުޅިގެންދަނީ ކުރެވެމުންނެވެ. މި ސިނާއަތުގައި މަސައްކަތްކުރާ ފަރާތްތަކުން މިދާއިރާއަށް މީހުން ބިނާ ކުރުމަށާއި މިދާއިރާ ތަރައްގީކުރުމަށް ކުރެވެން ހުރި ހުރިހާ މަސައްކަތްތަކަށް ސަރުކާރުގެ ފުރިހަމަ އެއްބާރުލުން ލިބޭނެކަމުގެ ޔަޤީންކަން މިނިސްޓަރ ވަނީ ދެއްވާފައެވެ.
