އިންފޮމޯޝަން ކޮމިޝަނަރުގެ މަޤާމާއި އަލްއުސްތާޛް އަހުމަދު އާހިދު ރަޝީދު ހަވާލުވިތާ 23 ދުވަހުގެ ތެރޭގައި 12 މައްސަލަ ނިންމާފައިވާކަމަށް އޭނާ ވިދާޅުވެއްޖެއެވެ.
2021 ވަނަ އަހަރުގެ މަޢުލޫމާތު ހޯދައި ލިބިގަތުމުގެ ޙައްޤުގެ ބައިނަލްއަޤުވާމީ ދުވަހުގެ މުނާސަބަތުގައި އިންފޮމޭޝަން ކޮމިޝަނަރު ދެއްވި ޚިޠާބުގައި ވިދާޅުވީ މި މަހުގެ 6 ވަނަ ދުވަހު، މި މަގާމުގެ މަސްއޫލިއްޔަތާއި ހަވާލުކުރެއްވިއިރު، އިންފޮމޭޝަން ކޮމިޝަނަރެއް ނެތުމުގެ ސަބަބުން އޮފީހުގެ ގާނޫނީ ޒިންމާތައް އަދާކުރުމަށް އޮތީ ގާނޫނީ ހުސްކަމެއް ކުރިމަތިވެފައިކަމަށެވެ
އެހެންކަމަށް ވުމާއެކު އެންމެ އިސް މަސްއޫލިއްޔަތަކަށް ހެދީ، ކުރިޔަށް ނުގެންދެވި ހުއްޓިފައިވާ މައްސަލަތައް ވީހާ އަވަހަށް ނިންމޭތޯ ބެލުމަށް ކަމަށެވެ. އެ ގޮތުން ކުރިޔަށް ނުގެންދެވިފައިވާ 12 މައްސަލަ މިވޭތުވެ ދިޔަ 23 ދުވަހުގެތެރޭގައި ވަނީ ނިންމިފައިވާކަމަށެވެ. ދައުލަތުގެ ޒިންމާއެއް އަދާކުރައްވާ އެންމެހާ މުއައްސަސާތަކުން މި ގާނޫނަށް އަމަލުކުރެއްވުމުގައި ފަސްޖެހިވަޑައިނުގެން، ގާނޫނު ބުނާ އެންމެ ފުޅާ ދާއިރާގައި ރައްޔިތުންގެ މި އަސާސީ ހައްގަށް އިހުތިރާމް ކުރެއްވުމަށް މިއަދުގެ މުނާސަބަތުގައި އާހިދުވަނީ އިލްތިމާސް ކުރައްވާފައެވެ.
ގާނޫނުގެ އިމުގެ ތެރެއިން ދޫކުރައްވަންޖެހޭ އެންމެހާ މައުލޫމާތު، ކަނޑައެޅިފައިވާ މުއްދަތުގެ ތެރޭގައި ދޫކުރެއްވުމަކީ، އަދި ހާމަކުރައްވަން ޖެހޭ އެންމެހާ މައުލޫމާތު އަމިއްލަ އިސްނެންގެވުމުގެ މަތީން ހާމަކުރެއްވުމަކީ، އެ މުއައްސަސާއެއްގެ މައްޗަށް ރައްޔިތުންގެ އިތުބާރު ލިބިގެން ދާނޭކަމެއް ކަމާމެދަކު ޝައްކެއްނެތްކަމަށް އާހިދު ވަނީ ވިދާޅުވެފައެވެ.
