ޒަމާނުއްސުރެ ގައުމުގެ ހިންގުމުގެ ނިޒާމުގައި އަށަގަނެފައިވަނީ ސިއްރިއްޔާތުގެ ސަގާފަތެއް ކަމުގައި އިންފޮމޭޝަން ކަމިޝަނަރ އަލްއުސްތާޛް އަހުމަދު އާހިދު ރަޝީދު ވިދާޅުވެއްޖެއެވެ.
މައުލޫމާތު ހޯދައި ލިބިގަތުމުގެ ހައްގުގެ ބައިނަލްއަގުވާމީ ދުވަހުގެ މުނާސަބަތުގައި ދެއްވި ޚިތާނުގައި އާހިދު ވިދާޅުވީ މައުލޫމާތުގެ ހައްގު ޔަގީންވުމަކީ ދައުލަތް ޖަވާބުދާރީކޮށް، ދައުލަތުގެ ހިންގުމުގައި ބައިވެރިވެ، އެންމެންގެ ވިސްނުމާ ބައިވެރިވުމާއެކު ދައުލަތް ހިންގުމަށް ފުރުސަތު ލިބޭކަމެއްކަމަށެވެ.
މިގޮތުން އިންފޮމޭޝަން ކޮމިޝަނަރަށް ހުށަހެޅޭ ހުރިހާ މައްސަލަތަކެއް ގާނޫނުގައި ކަނޑައެޅިފައިވާ މުއްދަތުގެ ތެރޭގައި ނިންމައި، ދިވެހި ރައްޔިތުންނަށް މި ގާނޫނުން ލިބިދޭ ހައްގު ކަށަވަރުކޮށްދިނުމަކީ އޭނާގެ އަމާޒެއްކަމަށެވެ. އަދި މައުލޫމާތު ހޯދައި ލިބިގަތުމުގެ ހައްގު ލިބިގަތުމަށް ޓަކައި، ވީހާ ފަސޭހަ އަދި ޒަމާނީ، އަވަސް މަގުތައް ރައްޔިތުންނަށް ތަނަވަސްކޮށްދިނުމަކީ ވެސް ހަމަ އެހާ މުހިންމު އަމާޒެއްކަމަށެވެ.
މައުލޫމާތު ބޭނުންވާ ފަރާތްތަކުން މައުލޫމާތަށް އެދުމަށާއި މުއައްސަސާތަކުން މައުލޫމާތު ފޯރުކޮށްދިނުމުގައި ފަސޭހަކަމާއެކު އަވަހަށް ޚިދުމަތް ފޯރުކޮށްދެވޭނޭ ގޮތަށް ފަރުމާކުރެވިފައިވާ ޕޯޓަލްއެއްގެ މަސައްކަތް ވެސް މިހާރު ވަނީ ނިމުމުގެ މަގުމަތީގައި ކަމަށްވެސް އާހިދު ވިދާޅުވިއެވެ.
ޒަމާނުއްސުރެ ގައުމުގެ ހިންގުމުގެ ނިޒާމުގައި އަށަގަނެފައިވަނީ ސިއްރިއްޔާތުގެ ސަގާފަތެއް. ސިއްރިއްޔާތުގެ ސަގާފަތަކުން ހާމަކަމާއި ޖަވާބުދާރީވުމުގެ ސަގާފަތަކަށް ކުއްލިއަކަށް ބަދަލު ނުވާނެކަން ގަބޫލު ކުރަން. އެހެންނަމަ ވެސް ސިއްރިއްޔާތުގެ ސަގާފަތެއް ޚިޔާރު ކުރުމަކީ މުއައްސަސާއާމެދު އިތުބާރު ގެއްލި، ކޮރަޕްޝަނަށް މަގުފަހިވާނެ ކަމެއް.
– އާހިދު ވިދާޅުވިއެވެ.
އާހިދު ވިދާޅުވީ ގާނޫނުގައި ހުދާއި ކަޅުން ލިޔެވިފައި އޮތް ނަމަވެސް ދައުލަތުގެ ބައެއް މުއައްސަސާތަކުން ގާނޫނު މާނަކުރުމުގައި ހާމަކަމާއި ޖަވާބުދާރީވުމަށް ހުރަސް އެޅޭ ވިސްނުން ގެންގުޅުއްވާކަމީ ހިތާމަހުރިކަމެއްކަމަށެވެ. ދައުލަތުގެ މުއައްސަސާތަކުގެ ތެރޭގައި ދައުލަތުގެ ޒިންމާއެއް އަދާނުކުރާ އެއްވެސް މުއައްސަސާއެއް ހުރެދާނެކަމީ، ގަބޫލުކުރަން ފަސޭހަކަމެއް ނޫންކަމަށް އޭނާ ވަނީ ވިދާޅުވެފައެވެ.
