އިދިކޮޅު ޕްރޮގްރެސިވް ކޯލިޝަނުން މިރޭ މާލޭގައި ބޮޑު ޖަލްސާއެއް ބޭއްވުމަށް ނިންމައިފިއެވެ.
އެކޯލިޝަނުން ބުނެފައިވަނީ މިޖަލްސާއަކީ އިންސާފު ހޯދުމަށް ގޮވާލައި، އެކޯލިޝަނުން އިންތިޒާމު ކުރާ ހަރަކާތްތަކުގެ މައުލޫމާތާއި، ލީޑަރޝިޕްގެ މުހިންމު މެސެޖްތަކެއް ދިނުމަށް ބާއްވާ ޚާއްސަ ޖަލްސާއެއް ކަމަށެވެ. މާލެ ސިޓީ ކައުންސިލްގެ ހުޅުމާލެ ދާއިރާގެ ކައުންސިލަރު އަދި ޕީއެންސީގެ ނާއިބް ރައީސް އިބްރާހިމް ޝުޖާއު ވިދާޅުވީ މިނިވަންކަމާއި އިސްތިގުލާލު ގެއްލި، އިސްލާމްދީނަށް ފުރައްސާރަކޮށް، އަދުލު އިންސާފުގެ ތެރެއަށް އަތްބާނާ ފަދަ ކަންތައްތަކާއި ގުޅިގެން ރައްޔިތުންގެ ހުރި ކަންބޮޑުވުންތައް މިރޭގެ ޖަލްސާގައި ހާމަ ކުރާނެކަމަށެވެ.
ޖަލްސާގެ ބޭނުމަކީ މި ކަންބޮޑުވުންތައް ސަރުކާރަށް ތިލަކޮށްދިނުން ކަމަށް ވެސް ސުޖާއު ވިދާޅުވިއެވެ. ޖަލްސާގައި ހާއްސަ ކަންތަކެއް ހިނގާނެ ކަމަށް ވެސް ސުޖާއު ވިދާޅުވިއެވެ.
ސުޖާއު ވިދާޅުވީ ޖަލްސާ ބޭއްވުމަށް ކާނިވާ ސަރަހައްދު ލިބިފައިވާކަމަށާއި ކޯވިޑާއި ގުޅިގެން މިހާރު ޖަލްސާތައް ބޭއްވުމަށް ހުރަހެއް ނެތް ކަމަށެވެ. ރާއްޖޭގެ ހުރިހާ ރައްޔިތުންނަށް ޖަލްސާގައި ބައިވެރިވުމަށް ފުރުސަތު އޮތް ކަމަށާއި ނަމަވެސް ކޯލިޝަނަށް ތާއީދު ކުރާ ރަށްރަށުގެ މީހުން މާލެ އަންނަން ބާރު ނާޅާނެ ކަމަށް ވިދާޅުވިއެވެ.
ޖަލްސާގެ މައިގަނޑު މަގްސަދަކީ ރައްޔިތުންނަށް ގުޅުންހުރި މައްސަލަތަކާއި ކަންބޮޑުވުންތައް ސަރުކާރާ ހަމަޔަށް ތިލަކުުރުން ކަމަށް ޝުޖާއު ވިދާޅުވިއެވެ. ކާނިވާ ސަރަހައްދުގައި ބާއްވާ ޖަލްސާ ފަށާނީ މިރޭ 20:15 ގައެވެ.
