އއ.ތޮއްޑޫގައި އެންމެ އިސްކޮށް ޖުމްހޫރީ ޕާޓިގައި ހަރަކާތްތެރިވި ތިން މީހަކު އިދިކޮޅު ޕީޕީއެމްއާއި ގުޅިއްޖެއެވެ.
އެމީހުން ޕީޕީއެމްއާއި ގުޅިފައިވަނީ މިރޭ ޕީޕީއެމް އޮފީހުގައި އޮތް ޕާޓީ ހަރަކާތުގެ ތެރެއިންނެވެ. ޕާޓީއާއި އަލަށްގުޅު މީހުންގެ ފޯމާއި ހަވާލުވެވަޑައިގަތީ ޕީޕީއެމް ޕީއެންސީ ކޯލިޝަން ހިންގުމާއި މިވަގުތު ހަވާލުވެވަޑައިގެން ހުންނެވި ޢަބްދުއްރަހީމް ޢަބްދުﷲ (އަދުރޭ/)އެވެ.
އިދިކޮޅު ޕީޕީއެމްގެ ނާއިބު ރައީސް އަދި ނައިފަރު ދާއރާގެ މެންބަރު އަޙްމަދު ޝިޔާމް ދާދި ފަހުން ވިދާޅުވެފައިވަނީ، ފާއިތުވި 3މަހެއްހާ ދުވަހުގެ ތެރޭގައި 12،000އަށް ވުރެ ގިނަ މީހުން އިދިކޮޅާއި ގުޅިފައިވާކަމަށެވެ.
އިދިކޮޅާއި ބައެއް މީހުން ގުޅެމުން އަންނައިރު، އިދިކޮޅު ކޯލިޝަންގެ ސިޔާސީ ހަރަކާތްތައްވެސް އަންނަނީ ފުޅާކުރަމުންނެވެ. އެގޮތުން މާލޭގައި ބާއްވާ ސިޔާސީ ހަރަކާތްތަކުގައި ބައިވެރިވާ މީހުންގެ ޢަދަދުވެސް އިތުރުވަމުން އަންނަކަން ބައެއް ފަރާތްތަކުން ފާހަގަކުރެއެވެ. ޚާއްޞަކޮށް ކާނިވާ ސަރަހައްދުގައި ބާއްވާ ޖަލްސާގައި ގިނަ ޢަދަދެއްގެ ބަޔަކު ބައިވެރިވެއެވެ.
މިގޮތުން މާދަމާ ރޭވެސް އިދިކޮޅުން އަންނަނީ ކާނިވާ ސަރަހައްދުގައި ޖަލްސާއެއް ބޭއްވުމަށް ތައްޔާރުވަމުންނެވެ.
