ރައްޔިތުންގެ މަޖިލީހުގެ ރައީސް މުހައްމަދު ނަޝީދު އެމަޤާމުން އިސްތިއުފާ ދެއްވަން އެއްބަސް ވެފައިވާކަމަށް ރައްޔިތުންގެ މަޖިލީހުގެ ކާށިދޫ ދާއިރާގެ މެމްބަރު އަބްދުﷲ ޖާބިރު ވިދާޅުވެއްޖެއެވެ.

ރައްޔިތުންގެ މަޖިލީހުގެ މިއަދުގެ ޖަލްސާގައި ވާހަކަ ދައްކަވަމުން ޖާބިރު ވިދާޅުވީ، މިއަދަކީ ރާއްޖެއަށް ވަރަށް އުފާވެރި ދުވަހެއް ކަމަށެވެ. ރައީސް ނަޝީދު މަޖިލިސްގެ ރައީސްކަން ދޫކޮށްލަން ނިންމާފައިވާކަމަށެވެ. ރައީސް ނަޝީދަކީ ރާއްޖޭގެ ޖުޑިޝަރީ މިނިވަން ކުރެއްވި ބާނީކަމަށް ވިދާޅުވެ ޖާބިރު ވަނީ ރައީސް ނަޝީދަށް ތަޢުރީފް ކުރައްވާ ވާހަކަ ދައްކަވާފައެވެ.

އަޅުގަނޑު ވަރަށް އުފާވޭ ގ.ކެނެރީގޭ މުހައްމަދު ނަޝީދު ރައްޔިތުންގެ މަޖިލީހުގެ އަޅުގަނޑުމެންގެ ކަރަންޓް ސްޕީކަރު އެމަޤާމު ދޫކޮށްލަން އެއްބަސްވެއްޖެ. އެމަނިކުފާނަށް ފަށްފަށުން ށުކުރު ދަންނަވަން. އެމަނިކުފާނަށް އަޅުގަނޑު ދޭނީ ބާނީގެ ލަގަބު. ދިވެހި ރާއްޖޭގެ ޖުޑިޝަރީ މިނިވަން ކުރި ބާނީގެ ލަގަބު.

– ޖާބިރު ވިދާޅުވިއެވެ.

ޖާބިރު ވިދާޅުވީ ރައީސް ޔާމީނަށްވެސް ޖުޑިޝަރީ މިނިވަން ކުރުން ފުރުސަތު އޮތް ކަމަށާއި، ނަމަވެސް އެކަން ނުކުރެވުނުކަމަށެވެ. ނަމަވެސް ޖާބިރު ވިދާޅުވީ މިހާރު ޖޭއެސްސީގެ ރައީސް ހިސާން ހުސެއިންގައި ޖޭއެސްސީގައި ތިއްބެވި ސިޔާސީ ބޭފުޅުން ވަގުތުން ވަގުތަށް އިސްތިއުފާ ދެއްވަން ޖެހޭކަމަށެވެ.

ރައީސް ނަޝީދު މަޖިލިސް ރައީސްގެ މަޤާމުން ވަކިވާން ނިންމާފައިވާކަމަށް ޖާބިރު ވިދާޅުވި ނަމަވެސް އެކަން ރައީސް ނަޝީދުވެސް އަދި މަޖިލީހުންވެސް ހާމަކޮށްފައި ނުވެއެވެ. މިއަހަރުގެ ފަހު ދައުރު ހުޅުވުމަށް ބޭއްވި ފުރަތަމަ ޖަލްސާގައި ރައީސް ނަޝީދު ވަނީ އިނގިރީސި ވިލާތުގައި ހުންނަވައި ސިޓީ ފުޅެއް މަޖިލިސްއަށް ފޮނުވާފައެވެ.

ރައީސް ނަޝީދަށް ދިން ނުރައްކާތެރި ޓެރަރިސްޓް ހަމަލާއަށްފަހު ފަރުވާ ހޯއްދެވުމަށް މިހާރު ހުންނެވީ އިނގިރޭސިވިލާތުގައެވެ. ރައީސް ނަޝީދުގެ ސިޓީގައި ވިދާޅުވީ އެމަނިކުފާނަށް ދިން ޙަމަލާ ރާވައި ހިންގި ފަރާތްތަކުގެ ތަޙްޤީޤު އަދި ނުނިމި ކުރިއަށްދާކަމަށް ދިވެހި ފުލުހުންގެ ޚިދުމަތުން ބުނެފައިވާކަމެވެ. އެ ތަޙްޤީޤު ނިމި، އެކަން ރާވައި ހިންގި ފަރާތްތައް އިންސާފުގެ ކުރިމައްޗަށް ގެނެވި، ހައްޔަރުގައި ބޭތިއްބުމުގެ ކުރިން ރާއްޖެ ދިޔުމަކީ އެމަނިކުފާނުގެ އާއިލާއާއި، ހެޔޮއެދޭ އެތައް ބަޔަކާއި ޚުދު އެމަނިކުފާނުވެސް ޖެހިލުންވާ ކަމެއްކަމަށެވެ.

މަޖިލީހުގެ ރައީސް ވަނީ ޗުއްޓީގެ މުއްދަތު އިތުރުކޮށްދެއްވައި، ރާއްޖެއިން ބޭރުގައި ދިރިއުޅުމަށް ހިތް ޚަލާޞްކުރައްވައި، އެފުރުސަތު ފަހިކޮށްދެއްވުމަށް މަޖިލީހުގެ ކިބައިން އެދިވަޑައިގެންފައެވެ. އަދި ރާއްޖެއިން ބޭރުގައި ހުންނައިރު މަޖިލީހުގެ އެންމެހައި ކަންކަން ޤާނޫނު އަސާސީ އާއި މަޖިލީހުގެ ގަވާއިދުގައިވާ ގޮތުގެމަތިން މަޖިލީހުގެ މެންބަރުންގެ އިރުޝާދުގެ ދަށުން މަޖިލީހުގެ ނައިބު ރައީސް އިސްވެ ހުންނަވައި މަޖިލީހުގެ އިދާރާއިން ހިންގާނެކަމީ ހިތުގައި އެއްވެސް ޝައްކެއް އުފެދޭކަމެއްނޫން ކަމަށް ވަނީ ވިދާޅުވެފައެވެ.

މަޖިލީހަށް ފޮނުއްވި ސިޓީއަކީ ސަރުކާރާއި ދައުލަތުގެ އިދާރާއަކާ ނުރުހިގެން ފޮނުވި ސިޓީއެއް ނޫންކަމަށްވެސް މަޖިލީހުގެ ރައީސް ވަނީ ވިދާޅުވެފައެވެ. ރާއްޖެއިން ބޭރުގައި ހުންނައިރު ރައްޔިތުންގެ މަޖިލީހަށާއި ދިވެހި ދައުލަތަށް ޚިދުމަތްކުރުމުގައި މަސައްކަތް ކުރިއަށް ގެންދާނެކަމަށާއި، ޚާއްޞަ ގޮތެއްގައި އިންޓަރޕާލަމެންޓަރީ ޔޫނިއަންއާއި، ކޮމަންވެލްތު ޕާލިމަންޓަރީ އެސޯސިއޭޝަން މެދުވެރިކޮށް ހިންގާ މަސައްކަތްތަކާއި މޫސުމަށް އަންނަ ބަދަލުތަކާ ގުޅޭގޮތުން ކްލައިމެޓް ވަލްނަރަބަލް ފޯރަމްއާއެކު މަސައްކަތްތައް ކުރިއަށް ގެންދާނެ ކަމަށް މަޖިލީހުގެ ރައީސް ވަނީ ވިދާޅުވެފައެވެ.