މިހާރު ވެރިކަން ކުރަމުންދާ އެމްޑީޕީގެ އަސްލު ސައިޒު ދިވެހި ރައްޔިތުންނަށް އެގިއްޖެ ކަމަށާއި، ވެރިކަމުގެ ބާކީ އޮތް ދުވަސްތަކުގައި މިސަރުކާރުގެ ވެރިން ލައިޓް އޮންކޮށްގެން ނެށުން ނޫން ގޮތެއް ނެތްކަމަށް ކާށިދޫ ދާއިރާގެ މެމްބަރު އަބްދުﷲ ޖާބިރު ވިދާޅުވެއްޖެއެވެ.
ސިވިލް ސާވިސްގައި މަސައްކަތްކުރާ މުވައްޒަފުންގެ މުސާރަތަކަށް ހެޔޮ ބަދަލެއް ގެނެސްދިނުމަށް ގޮވާލައި ރައްޔިތުންގެ މަޖިލީހަށް ހުށަހެޅި ކުއްލި މައްސަލާގެ ބަހުސްގައި ވާހަކަ ދައްކަވަމުން ޖާބިރު ވިދާޅުވީ މިސަރުކާރަކީ ދިވެހި ރައްޔިތުންގެ ތައީދެއް އޮތް ސަރުކާރެއް ނޫންކަމަށެވެ. ވެރިކަން ލިބޭ ކޮންމެ ފަހަރު އެމްޑީޕީގެ ވެރިކަން އެބޯޓްވީކަމަށް ބުނެ ވެފައިވާ އެއްވައުދެއް ނުފުއްދާކަމަށެވެ.
ވެރިކަމަށް އަންނަ އޖުޑިޝަރީއާއި، ސިވިލްސާވަންޓުންގެ މުސާރައާއި، އެހެންވެސް ކަންކަން ހުށަހަޅާ ކަމަށާއި، ވެރިކަން ލިބުމުން އެމްޑީޕީއަށް މިކަންކަން ކޮށްދޭން ނޭގޭކަމަށެވެ. މިއަދު ރައްޔިތުންގެ ކުރީގައި އެމްޑީޕީގެ އަސްލު ސައިޒު ހާމަވެފައިވާކަމަށާއި، އެމްޑީޕީއަކީ ދިވެހި ރައްޔިތުންގެ ތާއީދު އޮތް ބައެއް ނޫންކަމަށް ޖާބިރު ވިދާޅުވިއެވެ.
އަޅުގަނޑުމެން ހިނގާ ގަބޫލު ކުރަމާ އެމްޑީޕީ ވެރިކަމެއްގައި މިޤައުމުގައި އެއްކަމެއްވެސް ނުވިއޭ. ހަމައެއާއި އެކީގައި މިތާ އަންބާ ކިޔައި ލަވަޖަހާނެ ކަމެއްނެތޭ. ޑިސްކޯއަކަށް ބަދަލުކޮށްލައި، ލައިޓްތައް އޮންކޮށްލަންވީއޭ. އޭރު އަޅުގަނޑުމެން އެންމެން ނަށަންވީ. ވެރިކަން ލިބޭ ކޮންމެ ފަހަރަކު ކަންކަން ނުވީމާ ބުނަނީ ވެރިކަން އެބޯޓްވީއޭ. މިހާރު އެމްޑީޕީގެ ސައިޒު ރައްޔިތުންނަށް އެގިއްޖެ. އެމްޑީޕީއަށް ރައްޔިތުންގެ ތާއީދެއްނެތް.
– ޖާބިރު ވިދާޅުވިއެވެ.
އޭނާ ވިދާޅުވީ ވެރިކަމަށް އައީ މިނިވަން ވޭޖް ކަނޑައެޅުމަށް ކަމަށްބުނެކަމަށާއި، ނަމަވެސް އެކަންވެސް ނުކުރަން ބަހަނާ ދައްކަމުންދާކަމަށެވެ. އެމްޑީޕީއަށް ރައްޔިތުންގެ ތައީދެއްނެތް ކަމަށް ޖާބިރު ވަނީ ތަކުރާރުކޮށް ވިދާޅުވެފައެވެ. އޭނާ ވިދާޅުވީ ރައްޔިތުންނަށް އޮޅުވާލައި، މަކަރާއި ހީލަތް ހަދަމުންދާކަމަށާއި، މިދައުރު ނިމި ދެން އަންނަ ދައުރަށްވެސް އިތުރު ދޮގު ތަކެއް ހަދަން މިހާރު ތައްޔާރު ވަމުންދާކަމަށެވެ.
ޖާބިރު ވަނީ ސިވިލްސާވަންޓުގެ މުސާރަ ވަގުތުން ވަގުތަށް 10،000 ރުފިޔާގެ މުސާރައެއް ކަނޑައަޅުމަށް ގޮވާލާފައެވެ.
