އޭއެފްސީ ވިމެންސް އޭޝިއަން ކަޕް ކޮލިފައިންއަށް ރާއްޖޭގެ ގައުމީ އަންހެން ފުޓްބޯޅަ ޓީމު ތަޖިކިސްތާނަށް ފުރައިފިއެވެ.
އޭއެފްސީ ވިމެންސް އޭޝިއަން ކަޕުގެ ކޮލިފައިން މެޗުތައް ކުރިޔަށްދާނީ މިމަހުގެ 23 އިން 29 ގެ ނިޔަލަށެވެ.
އަންނަ އަހަރު އިންޑިއާގައި ބާއްވާ އޭއެފްސީ ވިމެންސް އޭޝިއަން ކަޕްގެ ކޮލިފައިންގައި ރާއްޖެ ހިމެނެނީ ގްރޫޕް ބީ ގައެވެ. ރާއްޖެއާއެކު ދެން މި ގްރޫޕްގައި ހިމެނޭ ގައުމުތަކަކީ، ވިއެޓްނާމް އަފްޣާނިސްތާން އަދި ގްރޫޕް ބީގެ ކޮލިފައިން މެޗުތައް ކުޅޭ ވިއެޓްނާމްއެވެ. މި ގްރޫޕްގައި އަފްޣާނިސްތާން ހިމެނުނު ނަމަވެސް، އެ ގައުމުން ފަހުން ވަނީ ކޮލިފައިންއިން ވަކިވެފައެވެ. އެހެންކަމުން ކޮލިފައިންގައި ރާއްޖެ ދެން ވާދަކުރަން ޖެހޭނީ ވިއެޓްނާމް އަދި ތަޖިކިސްތާނާއެވެ.
ކޮލިފައިންގައި ރާއްޖެ ކުޅޭ ފުރަތަމަ މެޗުގައި މިމަހުގެ 23 ވަނަ ދުވަހު ނުކުންނާނީ ވިއެޓްނާމާއި ދެކޮޅަށެވެ. އަދި ދެވަނަ މެޗުގައި މިމަހުގެ 26 ވަނަ ދުވަހު ބައްދަލުކުރަން ޖެހޭނީ ތަޖިކިސްތާނާއެވެ.
ކޮލިފައިންގައި ވާދަކުރުމަށް ގައުމީ އަންހެން ޓީމު ތަޖިކިސްތާނަށް ފުރިއިރު، މިދިޔަ އޯގަސްޓް މަހު އެ ޓީމުން ވަނީ ޔުނައިޓެޑް އަރަބި އެމިރޭޓްސް (ޔޫއޭއީ) ގައި ޓްރެއިނިން ކޭމްޕެއް ފުރިހަމަ ކޮށްފައެވެ. މި ޓްރެއިނިން ކޭމްޕްގައި ދެ މެޗު ކުޅެފައިވާއިރު ފުރަތަމަ މެޗުގައި 1-5 އިން ބަލިވިއިރު ދެވަނަ މެޗުން ބަލިވީ 1-2 ގެ ނަތީޖާއަކުންނެވެ. މި ދެ މެޗުގައި ގައުމީ ޓީމާއި ދެކޮޅަށް ކުޅުނީ ޔޫއޭއީގެ ގައުމީ ސީނިއަރ އަންހެން ޓީމެވެ.
ކޮލިފައިން މެޗުތަކަށް ފަހު ގައުމީ އަންހެން ފުޓްބޯޅަ ޓީމު އެނބުރި ރާއްޖެ އައުމަށް ހަމަޖެހިފައިވަނީ މިމަހުގެ 29 ވަނަ ދުވަހުއެވެ.
