އައްޑޫ ސިޓީގައި މިއަދު ހަވީރުން ފެށިގެން ކުރަމުންދިޔަ މުޒާހަރާ ކޮންޓްރޯކުރުމަށް ބާރުގެ ބޭނުންކޮށް މުޒާހަރާ ރޫޅާލުމަށްފަހު، ކުޑަކުއްޖައަށް ޖިންސީ ގޯނާ ކުރިކަމަށް ބުނާ ފުލުސް މީހާ ފުލުހުންގެ ބެލުމުގެ ދަށަށް ގެންގޮސްފިއެވެ.
މިއަދު ހަވީރުން ފެށިގެން އައްޑޫ ސިޓީ ހިތަދޫގައި ކުރި މުޒާހަރާގައި އާންމުންވަނީ ޖިންސީ ގޯނާކުރިކަމަށް ބުނާ ފުލުސް މީހާ ދިރިއުޅޭ ގޭގެކައިރިއަށް ގޮސް އެކި ޝުއޫރުތައް ފާޅުކޮށްފައެވެ. މިއާއުއެކު ގިނަ އަދަދެއްގެ ފުލުހުން ވަނީ އެސަރަހައްދަށް އައިސް ބާރުގެ ބޭނުންކޮށް، އާންމުން އެސަރަހައްދުން ދުރަށް ޖައްސާފައެވެ.
މިކަމުގައި މިރޭ ހައްޔަރުކުރި ފުލުސް މީހާ އުމުރުން 14 އަހަރުގެ އަންހެން ކުއްޖެއް، އެކުއްޖާގެ އުމުރުން 16 އަހަރާއި ހަމައަށް ޖިންސީ ގޯނާކޮށްފައިވާ ކަމުގެ ތުހުމަތުތަކެއް ވަނީ ކުރެވިފައެވެ. އަދި އެ ފުލުސް މީހާ އެގޭގެ ފާހަނާއިގައި ކެމެރާ ހަރުކޮށްގެން އެކުއްޖާގެ ވީޑިއޯކޮށް ބްލެކްމެއިލްވެސް ކޮށްފައިވާ ކަމަށް ވަނީ ތުހުމަތު ކުރެވިފައެވެ. މައުލޫމާތު ލިބިފައިވާ ގޮތުގައި އެ ފުލުސް މީހާ އަކީ ފޮރެންސިކް ޑިޕާޓްމެންޓުގައި މަސައްކަތް ކުރަމުންދާ ފަރާތެކެވެ.
މިހަމަ ނުޖެހުމާއި ގުޅިގެން ފުލުހުން ބުނެފައިވަނީ އައްޑޫ ސިޓީގައި މިއަދު ކުރި އިހުތިޖާޖުގައި ފުލުހުންގެ ދަޢުރު އަދާކުރުމަށް ހުރަސްއަޅަން މަސައްކަތްކުރުމާ ގުޅިގެން ފުލުހުން ވަނީ ބާރުގެ ބޭނުންކޮށްފައި ވާކަމަށެވެ އެގޮތުން އެތަނުގައި އެއްވެ ތިބި މީހުން ދުރަށް ޖެއްސުމުގެ ގޮތުން ފުލުހުން ޕެޕަރ ސްޕްރޭ ބޭނުންކޮށްފައިވާކަމަށެވެ.
ފުލުހުން ޕެޕަރ ސްޕްރޭ ބޭނުންކުރުމުގެ ސަބަބުން ބައެއް މީހުންނަށް ވަނީ އަނިޔާވެފައެވެ. އަނިޔާވި މީހަކަށް ފަރުވާ ދިނުމަށް ހޮސްޕިޓަލަށް ވެސް ވަނީ ގެންގޮސްފައެވެ.
