ޔުނައިޓެޑް ނޭޝަންސް ވޯރލްޑް ޓޫރިޒަމް އޯގަނައިޒޭޝަން (ޔޫ.އެންޑަބްލިއު.ޓީ.އޯ) ކޮމިޝަން ފޮރ ސައުތް އޭޝިއާ ގެ ރިޔާސަތަށް ދިވެހިރާއްޖެ ދެވަނަ ދައުރަކަށް ހޮވިއްޖެއެވެ.
ޔުނައިޓެޑް ނޭޝަންސް ވޯރލްޑް ޓޫރިޒަމް އޯގަނައިޒޭޝަން (ޔޫ.އެން.ޑަބްލިއު.ޓީ.އޯ)ގެ ކޮމިޝަން ފޮރ ސައުތު އޭޝިއާގެ 58 ވަނަ ބައްދަލުވުން އިއްޔެ ވަނީ ބާއްވައިފައެވެ. މި ބައްދަލުވުމުގައި ޔޫ.އެން.ޑަބްލިއު.ޓީ.އޯ ގެ ސްޓެޗުއަޓަރީ އޯރގަންސް އަދި ސަބްސިޑަރީ ބޮޑީސްއަށް ވަނީ ޤައުމުތައް ހޮވާފައެވެ. މީގެ ތެރޭގައި ޖެނެރަލް އެސްމްބްލީގެ ވައިސް ޕްރެޒިޑެންޓްގެ މަޤާމަށް އިންޑިއާ އަދި ކްރެޑެންޝިއަލްސް ކޮމިޓީއަށް ބޫޓާން ވަނީ ހޮވާފައެވެ.
މީގެ އިތުރުން، ސައުތް އޭޝިއާއަށް ކަނޑައަޅުއްވާފައިވާ އެގްޒެކެޓިވް ކައުންސިލްގެ 2 ގޮނޑިއަށް އީރާން އަދި އިންޑިޔާ ވަނީ ހޮވާފައެވެ. މިނިސްޓަރ އޮފް ޓޫރިޒަމް، ޑރ. ޢަބްދުﷲ މައުސޫމް ރިޔާސަތު ބެލެހެއްޓެވި މިބައްދަލުވުމުގައި ސައުތު އޭޝިއާގެ 7 ޤައުމަކުން 25 ބައިވެރިން ވަނީ ބައިވެރިވެފައެވެ. އަދި ބައްދަލުވުމުގައި ރީޖަނަލް ކޮމިޝަން ފޮރ ސައުތު އޭޝިއާގެ ރިޔާސަތަށް ދެވަނަ ދައުރަކަށް ދިވެހިރާއްޖެ އިންތިޚާބުކޮށް، ވައިސް ޗެއަރ ގެ މަޤާމަށް ބަންގްލަދޭޝް އަދި އިރާން ވަނީ އައްޔަނުކޮށްފައެވެ.
