މީގެ 25 އަހަރު ކުރިންފެށިގެން ހިނގަމުން އައި ބިދޭސީ ވަގުފާރީގެ މައްސަލަ މިސަރުކާރުން މިހާރު ހުއްޓުވާފައިވާކަމަށް އިކޮނޮމިކް މިނިސްޓަރ ފައްޔާޒް އިސްމާޢީލް ވިދާޅުވެއްޖެއެވެ.
ޤަވާއިދާއި ޚިލާފަށް ބިދޭސީން އުޅޭ ޢަދަދާއި ގުޅޭގޮތުން މެދު ހެންވޭރު ދާއިރާގެ މެންބަރު ޢަލީ ޢާޒިމް ހުށައެޅުއްވި ސުވާލަށް މަޖިލީހުގައި ޖަވާބުދެއްވަމުން މިނިސްޓަރ ފައްޔާޟް ވިދާޅުވި، ރާއްޖެއަށް ބިޑޭސީން އެތެރެވާ މިންވަރު ބަލަހައްޓާ ނިޒާމް މީގެ ކުރިން އެންމެ އެކަށީގެންވާގޮތުގައި ބެލެހެއްޓިފައިނުވާކަމަށެވެ. އެހެންކަމުން ޤަވާއިދާއި ޚިލާފަށް ރާއްޖޭގައި އުޅޭ ބިދޭސީންގެ ސީދާ ޢަދަދު ސާފުނުވާކަމަށާއި، ނަމަވެސް ސަރުކާރުން މިހާތަނަށް އެ ނިޒާމަށް ބަދަލުގެނެސް އިތުރު ބަދަލުތަކެއް ގެންނަމުން އަންނަކަން މިނިސްޓަރ ފާހަގަކުރެއްވިއެވެ.
މިކަމަކީ ވަރަށް ހަޑި މުޑުދާރު ހާލަތެއްގައި ދިވެހި ރާއްޖެ އޮތްކަމެއް. ތިބޭފުޅުންނަށް އަޅުގަނޑަކަށް ޔަގީނެއްނޫން، ތިޔަބޭފުޅުންނަށް ވަޒަން ކުރެވޭނެ ކަމެއްވެސް. ރެކޯޑެއް ބެލެހެއްޓިފައި ނެތް. ނޫނީ ގަސްތުގައި ބަލަހައްޓާފައިނެތީ. އަދިވެސް އަޅުގަނޑުމެން މިއުޅެނީ އެކްސްޕެޓް އޮންލައިން ސިސްޓަމޭ ކިޔާފަ އިންނަ ސިސްޓަމަކީ އޮންލައިން ސިސްޓަމެއްނޫން. އަދިވެސް އަޅުގަނޑުމެން މިއުޅެނީ އެއަށް ގެންނަވާ ބަދަލުތައް އެއްކޮށް ނުގެނެވިގެން.
– ފައްޔާޟް އިސްމާޢީލް
މިނިސްޓަރގެ ވާހަކަފުޅުގައި ބިދޭސީންގެ މައްސަލަ ހައްލުކުރުމަށް ރަނގަޅު މަސައްކަތެއް މިހާތަނަށް ކުރެވިފައިވާކަމަށް ވިދާޅުވިއެވެ. އެކަން ތަފާސް ހިސާބުތަކުން ވަރަށް ސާފުކޮށް ފެންނަން އެބަހުރިކަމަށާއި، ބިދޭސީންގެ މައްސަލައަކީ ފާއިތުވި 25 އަހަރުތެރޭގައި އުފެދިފައިވާ މައްސަލައެއްކަމަށްވެސް މިނިސްޓަރ ވިދާޅުވިއެވެ. އިންސާނީ ވަގުފާރީގެ މައްސަލައަށް އަލިއަޅުއްވާލައްވަމުން މިނިސްޓަރ ފައްޔާޟް ވިދާޅުވީ، ބިދޭސީންގެ ވަގުފާރިގެ މައްސަލަތައް އެންމެ ގިނައިން ހިނގަމުން އަންނަނީ ބަންގްލަދޭޝްގެ މަސައްކަތްތެރިންގެ ތެރޭގައިކަމަށެވެ. އެއީ ވަރަށް އަނިޔާވެރިކޮށް ހިނގަމުން އައިކަމެއްގެ ގޮތުގައި މިނިސްޓަރ ސިފަކުރެއްވިއެވެ. ނަމަވެސް މިސަރުކާރުން އެކަމަށް ހައްލު ގެނެސްފައިވާކަމަށާއި، އިންސާނީ ވަގުފާރި މިހާރު ރާއްޖޭގައި ހިނގަމުން ނުދާކަމަށް މިނިސްޓަރ ވިދާޅުވިއެވެ.
މިނިސްޓަރގެ ވާހަކަފުޅުގައި ވަނީ ރާއްޖެއަށް ބިދޭސީން ގެނައުމަށް ދޫކޮށްފައިވާ ކޯޓާގެ ތަފްސީލްވެސް ހިއްސާކުރައްވާފައެވެ. އެގޮތުން 2013 ވަނަ އަހަރުން ފެށިގެން 2018 ވަނަ އަހަރާއި ހަމައަށް ބަންގްލަދޭޝް މީހުންގެނައުމަށް އެވްރެޖުކޮށް 20،000 ކޯޓާ ދޫކޯށްފައިވާކަމަށެވެ. ނަމަވެސް މިސަރުކާރުން އެ ޢަދަދުތައް ފާއިތުވި ދެ އަހަރުގެ ތެރޭގައި 100އިން ދަށްކުރައްވާފައިވާކަމަށް މިނިސްޓަރ ވިދާޅުވިއެވެ.
މިނިސްޓަރ ވަނީ، ބިދޭސީން ރާއްޖެ ގެނައުމަށް ދޫކުރާ ކޯޓާގެ ޢަދަދު 2018 ވަނަ އަހަރަށްވުރެ ފާއިތުވި ތިން އަހަރުތެރޭ %55އަށް ދަށްކުރެވިފައިވާކަމަށް ވިދާޅުވެފައެވެ. އަދި ބިދޭސީން ޤަވާއިދުގެ ތެރެއަށް ވެއްދުމަށާއި، ޤަވާއިދާއި ޚިލާފަށް އުޅޭ ބިދޭސީން ފޮނުވާލުމަށް ހިންގޭ ޕްރޮގްރާމް އަދިވެސް ހަރުދަނާކުރައްވަމުން ގެންދަވާކަމަށް މިނިސްޓަރ ވިދާޅުވިއެވެ.
