ވެރިކަން ލިބި ރައްޔިތުންނަށް ޚިދުމަތް ކުރަން ފުރުސަތު ލިބުމުން، ކުރީގެ ސަރުކާރުން ހިންގަންފަށާފައިވާ ޕްރޮޖެކްޓުތަކުގެ ނަން ބަދަލު ނުކޮށް، އަމިލަ މަޝްރޫޢުތަކެއް ފައްޓަވައި ނަންދެއްވުމަށް އިދިކޮޅު ޕީއެންސީގެ ނާއިބް ރައީސް މުހައްމަދު ސައީދު ސަރުކާރަށް ގޮވާލައިފިއެވެ.
ސައީދު މިފަދަ ގޮތަކަށް ވިދާޅުވީ ރައީސް ޔާމީންގެ ވެރިކަމުގައި މަސައްކަތް ފެށި ފްލެޓް މަޝްރޫއެއްގެ ނަން "ވިނަރެސް" އަށް ބަދަލުކޮށް މިސަރުކާރުން ކުރަމުންދަ މަސައްކަތަށް ފާޑުވިދާޅުވެއެވެ. ސައީދު ވިދާޅުވީ ވެރިކަން ލިބި ޤައުމީ ތަރައްޤީގެ މަޝްރޫޢު ހިންގުމުގެ މަތިވެރި އަޒުމުގައި ރައީސް ޔާމީން ކޮށްދެއްވި ޚިދުމަތްތަކަކީ ދިވެހި ރައްޔިޔުން ބަލައި ގަންނަ ޚިދުމަތްތަކެއް ކަމަށެވެ.
ސަޢީދު މިއަދު ވިދާޅުވީ، ރައީސް ޔާމީން އެންމެ 5 އަހަރުގެ ތެރޭގައި ހުޅުމާލޭ ދެވަނަ ފިޔަވަހީގެ ގޮތުގައި 255 ހެކްޓަރުގެ ބިން ހިއްކާ، ވަށާ ތޮށި ލާ، މަގު ހަދާ މުޅީން އައު ސިޓީއެއް ޤާއިމު ކުރެއްވި ކަމަށެވެ. އަދި ޤައުމީ ތަރައްޤީ ހާސިލުވާނީ ވެރިކަން ލިބުމުން މަސައްކަތެއް ކޮށްގެން ކަމަށާއި އެކަން ވާނީ ނަން ބޯޑު ބަދަލު ކޮށްގެން ނޫންކަމަށް ސަޢީދު ވިދާޅުވެފައިވެއެވެ.
ރައީސް ޔާމީގެ އެންމެ 5 އަހަރު. ހުޅުމާލޭ ފޭސް ދޭއްގެ ގޮތުގައި 225 ހެކްޓަރުގެ ބިން ހިއްކި. ވަށާތޮށިލައި، މަގު ހަދައި މުޅީން އާސިޓީއެއް! ޤައުމީ ތަރައްޤީ ހާސިލްވާނީ ވެރިކަން ލިބުމުން މަަސައްކަތް ކޮށްގެން. ނަންބޯޑް ބަދަލު ކޮށްގެނެއްނޫން. ކަމެއް ފައްޓަވާފަ ނަންދެއްވާ.
– ސައީދު ވިދާޅުވިއެވެ.
ވިނަރެސް މަޝްރޫއުގެ ދަށުން ތައްޔާރު ކުރާ 1،344 ފްލެޓް ހުންނާނީ 10 ޓަވަރަށް ބަހާފައެވެ. އަދި ކޮންމެ ޓަވަރެއްގައި 13 ފަންގިފިލާ ހުންނަ އިރު ކޮންމެ އެޕާޓްމެންޓެއްގައި ތިން ކޮޓަރި އާއި ތިން ފާހާނާ އާއި ބެލްކަންޏެއް ހުންނާނެއެވެ. މި ސަރުކާރުން ވަނީ ހިޔާ މަޝްރޫއުގެ ދަށުން ފްލެޓް ލިބުނު މީހުން އެ ފްލެޓުތައް ދޫކޮށްލަން ބޭނުން ނަމަ، ވިނަރެސް ފްލެޓަށް ބަދަލުވާން ހުށަހެޅުމުގެ ފުރުސަތު ދީފައެވެ.
އެގޮތުން މިހާތަނަށް 250 މީހަކު ވިނަރެސްއަށް ބަދަލުވާން އެދިފައިވާ ކަމަށް އެޗްޑީސީން ބުންޏެވެ. އޭގެ ތެރެއިން ޝަރުތު ހަމަވާ މީހުން ބެލުމަށް ފަހު، އެމީހުންނަށް ވިނަރެސްއިން އެޕާޓްމެންޓު ހިޔާރު ކުރުމަށް ފުރުސަތު ދޭނެ ކަމަށް ވެސް އެޗްޑީސީން ބުނެފައިވެއެވެ. ވިނަރެސް ފްލެޓުތަކުގެ ޖާގަ ބޮޑުވި ނަމަވެސް އޭގެ އަގު ހިޔާ ފްލެޓުތަކަށް ވުރެ ބޮޑު ވާނެ ކަމަށް ހައުސިން މިނިސްޓްރީން ވަނީ މީގެ ކުރިން ބުނެފައެވެ.
