ކޮވިޑްގެ ބަލި މީހުންނަށް ފަރުވާ ކުރުމުގައި ޢާއިލާތަކާ ވަކިން، ރެޔާއި ދުވާލުގެ ހުރިހާ ވަގުތެއް ހޭދަކުރެއްވި އަންހެން ބޭފުޅުން އަޅުގަނޑުމެންގެ ތެރޭގައި ވަރަށް ގިނަކަން ފާހަގަ ކުރައްވާ އެބޭފުޅުންގެ ހިދުމަތުގެ އަގު ރައީސުލްޖުމްހޫރިއްޔާ އިބްރާހިމް މުހައްމަދު ސޯލިހް ވަޒަން ކުރައްވައިފިއެވެ.
އަންހެނުން ކުރާ މަސައްކަތްތަކާއި ހާސިލުކޮށްފައިވާ ކާމިޔާބީތަކުގެ އަގުވަޒަންކޮށް ސަރުކާރުންދޭ ރެހެންދި އެވޯޑް ދިނުމުގެ ހަފްލާގައި ވާހަކަދައްކަވަމުން ރޭ ރައީސް ވިދާޅުވީ އަންހެނުންނަކީ ހަމައެކަނި މުޖްތަމައުގެ ދެބައިކުޅަ އެއްބައި ނޫން ކަމަށާއި އެއީ މުޅި އިންސާނިއްޔަތުގެ ވެސް ދެބައިކުޅަ އެއްބައި ކަމަށެވެ.
ކޯވިޑުގެ ބަލިމީހުންނަށް ފަރުވާކުރުމުގައި، ޢާއިލާތަކާ ވަކިން، ރެޔާއި ދުވާލުގެ ހުރިހާ ވަގުތެއް ހޭދަކުރެއްވި އަންހެން ބޭފުޅުންގެ ތެރޭގައި ވަރަށް ގިނަ ކަމަށާއި، އެބޭފުޅުން ޤައުމަށްޓަކައި އެ ވެވަޑައިގަތީ ވަރަށް މަތިވެރި ޤުރުބާނީއެއް. ކޯވިޑުން ރައްކާތެރިވުމަށް ހިންގާ ވެކްސިން ޕްރޮގްރާމްގައިވެސް އަންހެން ބޭފުޅުންގެ ޙިއްޞާ ވަރަށް ބޮޑުކަމަށް ރައީސް ވިދާޅުވިއެވެ.
މިދިޔަ ދޮޅު އަހަރެއްހާ ދުވަހުގެ ތެރޭގައި، އެންމެ ގިނަ ބައެއްގެ ކަންފަތުގައި ހަރުލާފައި ހުރި ނަންތަކަކީ، ޑިރެކްޓަރ ޖެނެރަލް އޮފް ޕަބްލިކް ހެލްތު، މައިމޫނާގެ ނަންފުޅު. އަދި ޑޮކްޓަރ ނަޒްލާ ރަފީޤާއި، ޑޮކްޓަރ ނަޒްލާ މުޞްޠަފާ ފަދަ ބޭފުޅުންގެ ނަންފުޅު. އޭގެ އިތުރުންވެސް އެތައް އަންހެން ބޭފުޅުންނެއްގެ ނަންފުޅު، ކޯވިޑުގެ ތެރޭގައި އަޅުގަނޑުމެންނަށް އެނގިގެން ހިނގައްޖެ.
– ރައީސް ވިދާޅުވިއެވެ.
ރައީސް ވިދާޅުވީ މިފަދަ ޚިދުމަތްތެރި އަދި މިފަދަ އަގުހުރި ބަޔަކު، ޤައުމީ ޚިދުމަތުގެ ދާއިރާގައި ބައިވެރިވާ މިންވަރު އިތުރުނުކޮށް، އަޅުގަނޑުމެންނަށް ޙަޤީޤީ ކުރިއެރުމެއް ނުހޯދޭނެކަމަށެވެ.
އަޅުގަނޑުމެން މިކުރާ މަސައްކަތުން، މާތް ﷲގެ ވާގިފުޅާއެކު، އެކަން ޙާޞިލުވާނެކަމުގެ ވަރަށް ބޮޑު އުންމީދެއް އަޅުގަނޑުގެ އެބައޮތް. އެކަމަށް އިތުރު ހިތްވަރު ދިނުމަކީ ކުރަންޖެހޭ ކަމެއް.
– ރައީސް ވިދާޅުވިއެވެ.
މިހާރުވެސް ވަރަށް މަތީ މަޤާމުތައް ފުރުއްވާ، ވަރަށް ޚިދުމަތްތެރި ވަރަށް ޤާބިލް އަންހެން ބޭފުޅުން އެބަތިއްބެވި ކަމަށާއި، ސަރުކާރުގެ މަޤާމެއްގައި ނޫނަސް، މުޖުތަމަޢަށް ވަރަށް އަގުހުރި ޚިދުމަތްތަކެއް ކުރައްވާ ވަރަށް ހުނަރުވެރި އަންހެން ބޭފުޅުން އެބަތިއްބެވި ކަމަށް ރައީސް ވިދާޅުވިއެވެ. އަދި މިހާރު ފޯދެމުން އަންނަ ޒުވާން ޖީލުގައިވެސް، އެފަދަ އުންމީދީ ޒުވާން އަންހެން ބޭފުޅުންތަކެއް ތިއްބަވާނެކަމަށް ރައީސް ވިދާޅުވިއެވެ.
ކޮމެންޓު ފޮނުވާ