ކޮމިއުނިޓީ އެމްޕަވަރމެންޓް ލިންކޭޖް (ސެލް) ޖަމިއްޔާއަކީ، މ. މުލަކުގެ ޒުވާނުންތަކެއް އިސްނަގައިގެން އުފައްދާފައިވާ ޖަމިއްޔާއެކެވެ. އެގޮތުން، 6 ސެޕްޓެމްބަރ 2020ގައި ރަސްމީކޮށް ޔޫތު މިނިސްޓްރީގެ ދަށުން މިޖަމިއްޔާ ވަނީ ރަޖިސްޓްރީ ކޮށްފައެވެ. އޭގެ ކުރިންވެސް "ރެހެންދި" ޓީމްގެ ނަމުގައި ޓީމެއް އެކުލަވާލައިގެން، މުލަކުގައި ތަފާތު ގިނަ އިޖްތިމާޢީ ޙަރަކާތްތަކެއް ވަނީ ކުރިއަށް ގެންގޮސްފައެވެ.
އިޖުތިމާޢީ ގުޅުން ވަރުގަދަކޮށް، ކުޅިވަރުގެ ތެރެއިން އެއްބައިވަންތަކަން އިތުރުކޮށް އެކުވެރި މުޖުތަމައެއް މުލަކުގައި ބިނާކުރުމުގެ މަޤްސަދުގައި އުފެދުނު މި ޖަމިއްޔާއިންވަނީ ފާއިތުވި ދުވަސްތަކުގައި މުލަކުގައި ތަފާތު ގިނަ ޙަރަކާތްތަކެއް ކުރިއަށް ގެންގޮސްފައެވެ. ކުޅިވަރުގެ ތެރެއިން އަޚުލާޤު ރަނގަޅު، ހަރުދަނާ ދުޅަހެޔޮ ޒުވާނުންތަކެއް ބިނާކުރުމުގެ މަޤުސަދުގައި ފާއިތުވި އަހަރުވަނީ، މުލަކުގެ ދެޖިންސްގެ ޒުވާނުންނަށް އަމާޒުކޮށްގެން ވޮލީބޯލް މުބާރާތަކާއި، ފިރިހެނުންނަށް ޚާއްސަކޮށްގެން ފުޓްސަލް މުބާރާތަކާއި އަދި އަންހެނުންނަށް ޚާއްސަކޮށްގެން ހޭންޑްބޯލް މުބާރާތެއް ކުރިއަށް ގެންގޮސްފައެވެ.
ހަމައެއާއިއެކު މުލަކުގައި ދީނީ ހޭލުންތެރިކަން އިތުރުކޮށް، ރައްޔިތުންގެ ހިތުގައި ދީނީ ލޯބި އާލާކުރުމުގެ ގޮތުން މުޅި ރަށަށް ހުޅުވާލައިގެން ދީނީ ހޭލުންތެރިކުރުުމުގެ ޕްރޮގްރާމްތައް ހިންގާފައިވެއެވެ. އެގޮތުން ފާއިތުވި ރަމަޟާން މަހު މުލަކު ސުކޫލުގެ ދަރިވަރުންގެ ތެރެއިން 10 އަހަރާއި 12އަރާއި ދެމެދުގެ ދަރިވަރުންނަށް އަމާޒުކޮށްގެން "ޖަމާޢަތުގެ ނަމާދު-1442″ ގެ ނަމުގައި ބޭއްވުނު ނަމާދު ކޭމްޕް ފާހަގަކޮށްލެވެއެވެ. ހަމައެއާއިއެކު ރަށުގެ އިޖުތިމާޢީ ޙަރަކާތްތަކުގެ ތެރެއިން ބީޗް ސާފުކުރުމާއި، އިލެކްޝަންގެ ކަންކަމާއި ގުޅޭގޮތުން ރައްޔިތުން ހޭލުންތެރި ކުރުމުގެ ޕްރޮގްރާމަކާއި ފ. ނިލަންދޫ "ޔަންގް ޖެންރޭޝަން" އާއި ގުޅިގެން މުލަކު ސުކޫލަށް ފޮތް ހަދިޔާކުރުމުގެ ޕްރޮގްރާމެއްގެ އިތުރުން ފުރަބަންދާއި ގުޅިިގެން މުލަކު ރައްޔިތުންނަށް އާންމުކޮށް ހުޅުވާލައިގެން ކުއިޒް މުބާރާތެއްވެސް ބާއްވާފައިވެއެވެ. މި ހުރިހައި ޙަރަކާތަކީވެސް ސެެލްއިން އިސްނަގައިގެން އަދި ރަށުގެ އެކި މުވައްސަސާތަކާއި ގުޅިގެން ކުރިއަށް ގެންދެވުނު ޙަރަކާތްތަކެވެ.
ސެލް ޖަމިއްޔާ ރަޖިސްޓްރީ ކުރުމަށް ފަހު އެއްއަހަރު ފުރުމުގެ މުނާސަބާތާއި ގުޅުވައިގެން، މުލަކުގައި މިހާރު އެޖަމުއިއްޔާގެ ފަރާތުން އަންހެން ކަންބަލުންނަށް ޚާއްސަކޮށްގެން ވޮލީބޯލް މުބާރާތެއް ކުރިއަށް ގެންދެއެވެ. މިމަހުގެ 4 އިން 10ގެ ނިޔަލަށް ކުރިއަށްދާ މި މުބާރާތުގައި، މުލަކުގެ އަންހެން 4ޓީމެއް ބައިވެރިވެފައިވެއެވެ. މިމުބާރާތަކީ، އަންހެން ކަނބަލުންގެ މެދުގައި އެކުވެރިކަން އާލާކޮށް ކުޅިވަރު މެދުވެރިކޮށް ރިވެތި އަޚުލާޤާއި ސުލޫކު ދެމެހެއްޓުމާއި ރަނގަޅު ސިއްޙަތެއްގައި އަންހެން ކަނބަލުން ތިބުމަށް ހިތްވަރު ދިނުމުގެ ގޮތުން، އެޖަމުއިއްޔާއިން ބާއްވާ ދެވަނަ ވޮލީ މުބާރާތެވެ.
މި މުބާރާތުގެ ގުރޫޕް ސްޓޭޖް ގެ މެޗުތައް މިއަދު ކުޅުމަށް ހަމަޖެހިފައިވާއިރު މުބާރާތުގެ ސެމީ ފައިނަލް މެޗް ކުޅުމަށް ރޭވިފައިވަނީ އަންނަ ބުދަ ދުވަހުއެވެ. އަދި ފައިނަލް މެޗް ކުޅުމަށް ހަމަޖެހިފައިވަނީ އަންނަ ހުކުރު ދުވަހުއެވެ. ޖަމިއްޔާއަށް އަހަރު ފުރުމުގެ މުނާސަބަތުގައި އިތުރު ޙަރަކާތްތަކެއް ރޭވިފައިވާއިރު ޖަމިއްޔާ އިތުރަށް ހަރުދަނާކުރުމުގެ މަސައްކަތް މިހާރުވެސް ކުރިއަށްދާ ކަމުގައި ސެލްއިން މައުލޫމާތު ދެއެވެ.
