ދައުލަތް ހިންގުމުގެ ތިންބާރު ވަކި ކުރެވިފައިވާ ރިޔާސީ ނިޒާމު ފިޔަވައި އެހެން ނިޒާމަކަށް އެމް.އާރް.އެމް ތާއީދު ނުކުރާނެކަމަށް އެމްއާރުއެމައިން އަނެއްކާވެސް ވެސް ބުނެފިއެވެ.
ރައްޔިތުންގެ މަޖިލީހުގެ ރައީސް މުހައްމަދު ނަޝީދު އިއްޔެ ބޭއްވި ނޫސްވެރިންގެ ބައްދަލުވުމުގައިވަނީ ވެރިކަމަށް އައުމުގެ ކުރިން ބަރުލަމާނި ނިޒާމުގެ ވޯޓު ނެގުމަށް އެމްއާރުއެމްއިން އެއްބަސްވެފައިވާކަމަށް ވިދާޅުވެފައެވެ. ނަމަވެސް އިއްޔެވެސް އެޕާޓީން ވަނީ އެކަން ދޮގުކުރައްވާފައެވެ. އެމްއާރުއެމްއިން މިއަދު ރަސްމީކޮށް ނެރުނު ބަޔާނެއްގައި ބުނެފައިވަނީ 2018 ވަނަ އަހަރުގެ ރިޔާސީ އިންތިޚާބަށް ގުޅިފައިވާ ސިޔާސީ ޕާޓީތަކުގެ މެނިފެސްޓޯ އެކުލަވާލިއިރު، ވެރިކަން ހިންގުމުގެ ނިޒާމު ބަދަލު ކުރުމަށާއި ރިޔާސީ ދައުރުގެ މެދުތެރެއިން އިންތިޚާބެއް ބޭއްވުމަށް އެމް.ޑީ.ޕީން ހުށަހަޅައިގެން އެކަމާމެދު މަޝްވަރާ ކުރެވުނު ކަމަށެވެ.
ނަމަވެސް އެކަންކަމަށް އެމް.އާރް.އެމް އިން ވާނީ ކަނޑައެޅިގެން ދެކޮޅުހަދާފައިކަމަށެވެ. އަދި ގުޅިފައިވާ ސިޔާސީ ޕާޓީތަކުގެ މެނިފެސްޓޯ އެކުލަވާލާ ނިމުނުއިރު އެކަންކަން ހިމަނާފައެއް ނުވާނެއެވެ. ގުޅިފައިވާ ސިޔާސީ ޕާޓީ ތަކުގެ މެނިފެސްޓޯއަކީ ރައީސްއިބްރާޙިމް މުޙައްމަދު ސާލިޙާއި އަދި ގުޅިފައިވާ ހުރިހާ ސިޔާސީ ޕާޓީތަކުގެ ހިޔާލާއި މަޝްވަރާއަށް ފަހު، ހުރިހާ ފަރާތްތަކަށް އެއްބަސް ވެވުނު ގޮތަށް އެކުލަވާލާ އިއުލާން ކުރެވުނު މެނިފެސްޓޯއެއް ކަމަށާއި، 2018 ގައި ރައްޔިތުންގެ ވޯޓުން ކޯލިޝަން ސަރުކާރެއް އިންތިޚާބުކުރީ އެ ޖޮއިންޓް މެނިފެސްޓޯ ތަންފީޒު ކުރުމަށް ކަމުގައެވެ.
އެމް.އާރް.އެމް އިން އޭރުވެސް އަދި މިހާރުވެސް ތާއީދު ކުރަނީ ރިޔާސީ ނިޒާމަށެވެ. އަދި ރާއްޖޭގައި އޮންނަށް އެންމެ ކަމުދަނީ ރިޔާސީ ނިޒާމުކަމަށް 2007 ގައި ދިވެހި ރައްޔިތުންވެސް ވަނީ ނިންމާފައެވެ.
– އެމްއާރުއެމްއިން ބުނެފައިވެއެވެ.
އެމްއާރުއެމްއިން ބުނެފައިވަނީ ދައުލަތް ހިންގުމުގެ ތިންބާރު ވަކި ކުރެވިފައިވާ ރިޔާސީ ނިޒާމު ފިޔަވައި އެހެން ނިޒާމަކަށް އެމް.އާރް.އެމް ތާއީދު ނުކުރާ ކަމަށާއި، އެނޫން ގޮތަކަށް އެއްވެސް ފަރާތަކާ އެކު އެއްބަސް ވެފައިވެސް ނުވާނެކަމަށެވެ.
