ކުރީގެ ރައީސް ޢަބްދުﷲ ޔާމީން ޢަބްދުލްޤައްޔޫމުގެ މައްޗަށް ދައުލަތުން އުފުލާފައިވާ މަނީ ލޯންޑަރިންނާއި ރިޝްވަތު ގަބޫލުކުރުމުގެ ދައުވާގެ އަޑުއެހުމެއް މާދަމާއަށް ތާވަލްކޮށްފިއެވެ.
މާދަމާ 9:00އަށް ކްރިމިނަލް ކޯޓުގައި ތާވަލްކޮށްފައިވާ މި އަޑުއެހުމަކީ ރައީސް ޔާމީން ދަޢުވާއަށް ޖަވާބުދާރީވުމަށް ބާއްވާ އަޑުއެހުމެކެވެ. މި މައްސަލައިގައި އެންމެ ފަހުން ބޭއްވި އަޑުއެހުމުގައި މި މައްސަލާގައި ދައުލަތުންނާއި ދިފާއުން ހުށަހަޅާފައިވާ ހުށަހެޅުންތައް ވަނީ ޝަރީއަތާ ހިއްސާކޮށްފައެވެ. އެގޮތުން ދައުލަތުން ވަނީ އެއް ހުށަހެޅުމެއް ހުށަހަޅާފައެވެ. އެއީ ޖިނާއީ އިޖުރާއަތުގެ ޤާނޫނުގެ 117 ވަނަ މާއްދާގެ ދަށުން ހުށަހަޅާފައިވާ ހުށަހެޅުމެކެވެ. އެގޮތުން ދައުލަތުން ހުށަހެޅި ރިޕޯޓުގައިވާ ސީޑީއެއްގައި ހިމެނޭ މައުލޫމާތުތަކެއް ރައްކާތެރި ކުރުމުގެ އަމުރަކަށް ވަނީ އެދިވަޑައިގަންނަވާފައެވެ.
މިއަޑުއެހުމުގައި ރައީސް ޔާމީންގެ ފަރާތްޕުޅުން ވަނީ ދަޢުލަތުން ޝަރީއަތަށް ހުށަހަޅުއްވާފައިވާ ގިނަ ޝަފަވީ ހެކިތަކާއި ކިތާބީ ހެކި ބަލައިނުގަތުމަށް ހުށަހަޅުއްވާފައެވެ. ސަބަބަކީ އެމްއެމްޕީއާރުސީގެ ކޮރަޕްޝަންގެ މައްސަލާގައިގައި ކުރީގެ ނާއިބު ރައީސް އަޙުމަދު އަދީބް އަބްދުލްޤަފޫރާއި، އެމްއެމްޕީއާރުސީގެ ކުރީގެ އެމް.ޑީ އަބްދުﷲ ޒިޔަތަކީ ކުށަށް އިއުތިރާފްވެ ޙުކުމް ތަންފީޒުކުރައްވަމުންދާ ދެ ބޭފުޅުންކަމަށް ވުމުންކަމަށާ، އަދި އެއީ ފާސިޤުންކަމަށް ދެކެވަޑައިގަންނަވާކަމަށްވެސް ރައީސް ޔާމީންގެ ވަކީލުން ވިދާޅުވިއެވެ.
މި ހުށައެޅުއްވުންތަކާ ގުޅިގެން ރައްދުގައި ދަޢުލަތުގެ ވަކީލުވަނީ ޔާމީންގެ ޝަރީއަތަށް ދައުލަތުން ހުށަހެޅުއްވި ހުރިހާ ހެއްކަކީވެސް މައްސަލާގައި މުހިންމު ހެކިތަކެއްކަމަށް ވިދާޅުވެ އަދީބާއި ޒިޔަތުގެ ހެކިބަސް މުހިންމުވާ ސަބަބު ހާމަކުރައްވާފައެވެ. ޝަފަވީ ހެކީގެ އިތުރުން ދަޢުލަތުން ހުށަހަޅުއްވާފައިވާ އެހެނިހެން ކިތާބީ ހެކިތައްވެސްމައްސަލައާ ނުގުޅޭކަމަށް ރައިސް ޔާމީންގެ ވަކީލުން ވިދާޅުވުމުން ދަޢުލަތުންވަނީ އެގޮތަށް ރައީސް ޔާމީންގެ ވަކީލުން ވިދާޅުވަނީ ޤާނޫނީ ކޮން އަސާސެއްގެ މައްޗަށްބުރަވެގެންކަން ވިދާޅުވެފައިނުވާކަން ފާހަގަކުރައްވާފައެވެ.
ފަސް އަހަރުގެ ޖަލު ޙުކުމެއް ތަންފީޒުކުރައްވަމުން ގެންދަވާ ރައީސް ޔާމީންގެ މައްޗަށް މަނީ ލޯންޑްރިންގއާ ރިޝްވަތު ޤަބޫލުކުރުމުގެ ކުށުގެ ދައުވާ އުފުލާފައިވަނީ ރިސޯޓެއްގެ ގޮތުގައި ފުއްގިރި ތަރައްގީކުރަން ކުއްޔަށް ދޫކުރުމުގެ މުޢާމަލާތުގައި މަޤާމުގެ ނުފޫޒު ބޭނުން ކުރައްވައި 1.1 މިލިއަން ޑޮލަރު ހޯއްދަވައި ސަން ކޮންސްޓްރަކްޝަން އެންޑް އިންޖިނިއަރިން ޕްރައިވެޓް ލިމިޓެޑާއި ސަން އިންވެސްޓްމެންޓް ޕްރައިވެޓް ލިމިޓެޑް މެދުވެރިކޮށް އެ ފައިސާ ލޯންޑަކުރުމަށް ފަށަލަކޮށްފައިވާ މައްސަލާގައެވެ. ޔާމީންގެ އިތުރުން މިމައްސަލައިގައި މއ.ކުރިކީލަހިޔާ އަހްމަދު ކްރިކް ރިޒާއާއި ސަން ކޮންސްޓްރަކްޝަނާއި ސަން އިންވެސްޓްމެންޓްގެ މައްޗަށްވެސް ވަނީ ދައުވާ އުފުލާފައެވެ.
