މިއަދު ދިވެހި ރައްޔިތުންނަށް ދިމާވެފައިވާ ހިތްދަތި ހާލަތަށް ރައީސް ޔާމީނަށް ހުކުމް ކުރެއްވި ފަނޑިޔާރުން ޖަވާބުދާރީ ވާންޖެހޭ ކަމުގައި އިދިކޮޅު ޕީޕީއެމްގެ ނާއިބް ރައީސް އަހުމަދު ޝިޔާމް ވިދާޅުވެއްޖެއެވެ.

ޕްރޮގްރެސިވް ކޯލިޝަނުން މިރޭ ބާއްވާ އައްޑަނަ ޖަލްސާގައި ވާހަކަ ދައްކަވަމުން ޝިޔާމް ވިދާޅުވީ ރައީސް ޔާމީނަށް ކުރިހުކުމުގެ އަނިޔާ ލިބެނީ އެމަނިކުފާނަށާއި، އެމަނިކުފާނުގެ އާއިލާއަށް އެކަނި ނޫންކަމަށެވެ. އެހުކުމުގެ ހިތްދަތި ތަޖުރިބާ މިއަދު މުޅި ދިވެހި ޤައުމު ކުރަމުންދާކަމަށެވެ. ރައީސް ޔާމީނަށް ހުކުމް ކުރެއްވި ފަނޑިޔާރުންގެ ތެރެއިން 3 ފަނޑިޔާރެއްގެ އޯޑިއޯ ލީކުވެ އެބޭފުޅުން ދައްކަވާފައިވާ ވާހަތަކުން މިއަދު އެތައް ސުވާލެއް ދިވެހި ރައްޔިތުން ހިތުގައި އުފެދެމުންދާކަމަށް ޝިޔާމް ވިދާޅުވިއެވެ.

ރައީސް ޔާމީނަށް ހުކުމް ކުރެއްވި ދުވަހުން ފެށިގެން މިއަދާއި ހަމައަށް ދިވެހި ރައްޔިތުންނަށް އެތަކެއް ހިތްދަތިކަމެއް ކުރިމަތިވަމުންދާކަމަށް ޝިޔާމް ވިދާޅުވިއެވެ. އެތައް ބަޔަކު ވަޒީފާއިން ވަކިކޮށް، ޤައުމުގެ ހަރުމުދާތަކާއި، ފަޅުތަކާއި ރަށްތައް ވިއްކަމުން ދިއުމާއި، އަޑިނޭގޭ އެގްރީމަންޓްތައް ހަދަމުންދާއިރު، މިކަންކަމަކީ ހުކުމް ކުރެއްވި ފަނޑިޔާރުންނަށް ޖަވާބު ދެވޭނެ ވަރުގެ ކަންތައްތަކެއްތޯ ޝިޔާމް ސުވާލު ކުރެއްވިއެވެ.

މިއަދު ޤައުމުގެ ހާލަތު ދަށްވެ، މަސްވެރިންނާއި، ދަނޑުވެރިންނަށް ކައިގެން ބޮއިގެން ނޫޅެވޭ ހާލަތަށް ގޮސްފައިވާއިރު، މިހާލަތުން އަރައިގަތުމަށް މިސަރުކާރުން އެއްވެސް މަސައްކަތެއް ކުރާތަން ނުފެންނަކަމަށެވެ. ސަރުކާރުން ކުރާހާވެސް ކަމަކީ ކޯލިޝަން ހިމާޔަތް ކުރުން ކަމަށާއި، ރައްޔިތުންނަކީ ކޮބައިކަމެއްވެސް މިސަރުކާރަކަށް ނޭގޭކަމަށް ޝިޔާމް ވިދާޅުވިއެވެ.

ޝިޔާމް ވިދާޅުވީ މިހާލަތުގައި ރައީސް ޔާމީނަށް ސަރުކާރުގެ ކޯލިޝަންތެރެއިން ފާޑުވިދާޅުވާ ބޭފުޅުންނަކީ އަމިއްލަ މަސްލަހަތުގައި ފާޑުކިޔާ މީހުންކަމަށެވެ. ކޯވިޑްގައި ލިބުނު ހުރިހާ މަންފާއެއް ހޯދައިގެން އަނެއްކާވެސް ވެރިކަމަށް އަންނަން ކުރާ މަސައްކަތަކީ ދިވެހި ރައްޔިތުން ބަލައިގަންނާނެ ކަމެއްނޫންކަމަށް ޝިޔާމް ވިދާޅުވިއެވެ. މިއަދު މުޅި ގައުމު ފެނިގެންފަނީ ބިކަހާލުގައި އޮތްތަން ކަމަށާއި، ރައްޔިތުންނަަށް އަޅާނެ އެއްވެސް މުއައްސަސާއެއް މިޤައުމުގައި ނެތްކަމަށް ޝިޔާމް ވިދާޅުވިއެވެ.