އެމްޑީޕީ އޮފީހުގައި އެ އޮފީހުގެ މުވައްޒަފެއް ކަމަށްވާ މަރިޔަމް ޒުބައިރު (މަންދީ) އަށް ހަމަލާދިން މީހާ މިއަދު ހައްޔަރުކޮށްފިއެވެ.
ފުލުހުން ބުނީ އެ މައްސަލާގައި ތުހުމަތު ކުރެވޭ 39 އަހަރުގެ މީހާ ކޯޓު އަމުރެއްގެ ދަށުން މިއަދު ހައްޔަރުކޮށްފައިވާ ކަމަށެވެ.
ފުލުހުން އޭނާ ހައްޔަރު ކުރިއިރު، އެ ހާދިސާއަށް ފަހު މަންދީ ބުނެފައިވަނީ ޖަޒީލަކީ ގޯސް މީހެއް ނޫން ކަމަށާއި އޭނާއަށް ބޭނުން ވަނީ ފަރުވާ ކަމަށެވެ. އަދި އޭނާ ހައްޔަރުކޮށް، ބަންދު ނުކުރަން އޭނާ އެދޭ ކަމަށް މަންދީ ބުނެފައިވެ އެވެ.
ފުލުހުންގެ މީޑިއާ އޮފިޝަލް އިއްޔެ ވިދާޅުވީ، އެ މާރާމާރީ ހިންގީ މެންދުރު 12:30 ގައި ކަމަށެވެ. މި މާރާމާރީގެ މައުލޫމާތު އެނގޭ މީހަކު ބުނިގޮތުގައި، މަންދީއަށް ހަމަލާ ދިނީ ޗޭން ގަނޑަކުން، ބޮލުގެ ފުއްކިބައިގައި ޖަހައިގެންނެވެ. އެ މީހާ ވަނީ ވަނީ މަންދީއަށް ހަމަލާ ދިނުމަށްފަހު އެތަނުން ފިލައިފައެވެ. މަންދީ އަށް ހަމަލާދިނީ ހިނގި ދެބަސްވުމެއްގައި ކަމަށްވެއެވެ.
ޖަޒީލް ހައްޔަރުކޮށްފައިވާއިރު، މަންދީ ބުނީ،ޖަޒީލަށް އަދަބެއް ދޭން ބޭނުން ނުވާކަމަށެވެ. މަންދީ ކުރި ޓުވިޓެއްގައި ބުނެފައިވަނީ ޖަޒީލް ގެންގޮސް ގޮޅިއަކަށްލާ އެތައް ދުވަހެއް ވަންދެން ބޭއްވުމަށްފަހު ހުކުމެއް ކުރާކަށް އޭނާ ނޭދޭ ކަމަށާއި ޖަޒީލަށް ބޭނުން ވަނީ ފަރުވާ ކަމަށެވެ.
