އެމްޑީޕީގެ އޮފީހުގައި މިއަދު އަނިޔާ ދިން މީހާ ޖަލަށް ލާން ނޭދޭކަމަށާއި، އޭނާއަށް ފަރުވާ ބޭނުންވާކަމަށް އަނިޔާގައ ޒަޚަމްވި މަރްޔަމް ޒުބައިރު (މަންދި ޒުބައިރު) ބުނެފިއެވެ.

މިއަދު މެންދުރު އެމްޑީޕީގެ މައި އޮފީހުގައި ހިނގި މާރާމާރީއެއްގައި ވަނީ ދެމީހަކު ޒަޚަމްވެފައެވެ. އެންމެ ބޮޑަށް އަނިޔާވީ ގަލޮޅު ދެކުނު ދާއިރާގެ މެންބަރު މީކާޢީލް އަޙްމަދު ނަސީމްގެ މަންމަ މަންދި ޒުބައިރަށެވެ.

މި ޒަޚަމްތަކާއި ގުޅޭގޮތުން މަންދި ބުނީ، މިއަދު އޭނާއަށް އަނިޔާދިން  ޖަޒީލް ގެންގޮސް ގޮޅިއަކަށްލާ އެތައްދުވަހެއްވަންދެން ބޭއްވުމަށްފަހު ޖަލު ގޮަޅިއަކަށް ހުކުމް ކުރާކަށް ނޭދޭކަމަށާއި، އޭގެ ބަދަލުގައި އޭނައަށް ފަރުވާބޭނުންވާކަމަށެވެ. ބައެއް ފަރާތްތަކުން ތުހުމަތުކުރާގޮތުގައި ޖަޒީލް މާރާމާރީ ހިންގާފައިވަނީ މަސްތުގެ ހާލުގައި ހުރެގެންނެވެ. ނަމަވެސް އޭނާ ވަނީ އެކަން ދޮގުކޮށްފައެވެ.

މަންދި ބުނީ އެކަހަލަ ކުއްޖެއްނެތް އާއިލާއެއް މަދުވާނެކަމަށާއި، އެކުދިންގެ މައިންބަފައިންނާ އާއިލާތަކުން ތަހައްމަލުކުރާ އޭނައަށް އެނގޭކަމަށެވެ.

މިއަދު އަޅުގަނޑަށް އަނިޔާގެ ސަބަބުން މިއަޅާ ވޭނަށްވުރެ ޖަޒީލް ގައިގަ މިރޭ އަޅާނެވޭން ބޮޑުވާނެކަން އަޅުގަނޑަށް އެނގޭ. އަޅުގަނޑު ވަރަށް އެދެން ފުލުހުން މިޜޭ އޭނަ އެކަނި ގޮޅިއަކަށްލާ ދޫކޮށްނުލުން. އޭނައަކީ ގޯސްކުއްޖެއް ނޫން ފަރުވާ ބޭނުންވާ ކުއްޖެއް

– މަންދި ޒުބައިރު

މިއަދު އަޅުގަނޑަށް އަނިޔާގެ ސަބަބުން މިއަޅާ ވޭނަށްވުރެ ޖަޒީލް ގައިގަ މިރޭ އަޅާނެވޭން ބޮޑުވާނެކަން އަޅުގަނޑަށް އެނގޭ.

އަޅުގަނޑު ވަރަށް އެދެން @PoliceMv މިޜޭ އޭނަ އެކަނި ގޮޅިއަކަށްލާ ދޫކޮށްނުލުން. އޭނައަކީ ގޯސްކުއްޖެއް ނޫން ފަރުވާ ބޭނުންވާ ކުއްޖެއް ? 2/2

— Mariyam Zubair (@MandhyZubair) September 2, 2021

މަންދި މިހެން ބުނެފައިވާއިރު، މާރާމާރި ހިންގި މީހާ މިއަދު ބައެއް މީޑިއާގައި ބުނެފައިވަނީ އޭނާ މާރާމާރި ހިންގީ، އޭނާއަށް ކެނޑިނޭޅި ފުރައްސާރަކުރަމުން ދާތީ އެކަމަށް ކެތްނުކުރެވިގެންކަމަށެވެ. އެމްޑީޕީގެ އޮފީހުގައި ހިނގި މާރާމާރީ އެމްޑީޕީއާއި، އެޕާޓިގެ ރައީސް މުޙައްމަދު ނަޝީދުވެސް ވަނީ ކުށްވެރިކޮށްފައެވެ. އަދި އަވަސް މައްސަލައެއްގެ ގޮތުގައި އެމައްސަލަބަލައި ހައްގު އަދަބު ދިނުމަށް ގޮވާލާފައިވެސްވެއެވެ.