އެމްޑީޕީގެ މައި އޮފީހުގައި މިއަދު ހިނގި މާރާމާރީކުށްވެރިކޮށް، އެ މައްސަލައިގެ އަވަސް ޖިނާޢީ ތަޙްޤީޤެއް ހިންގުމަށް އެޕާޓީން ގޮވާލައިފިއެވެ.

ސޯސަން މަގުގައި ހުންނަ އެމްޑީޕީގެ މައި އޮފީސް ހިންގާ އިމާރާތުގައި މިއަދު މާރާމާރީ ހިނގާފައިވަނީ މެންދުރު 12:30 ހާއިރު އެވެ. މި މާރާމާރިއާއި ގުލިގެން އެމްޑީޕީން ނެރުނު ބަޔާނެއްގައި ވަނީ އެޕާޓިގެ ސެކްރެޓޭރިއެޓްގައި ހިމެނޭ ފިރިހެން މުވައްޒަފަކު މިއަދު އޮފީސްތެރޭގައި އަންހެން މުވައްޒަފަކަށް ޙަމަލާދީ ވަރަށް ބޮޑަށް އަނިޔާކޮށްފައިވާތީ، އެ އަނިޔާވެރި މާރާމާރީގެ ޢަމަލު ހަރުއަޑުން ކުށްވެރިކުރާކަމަށެވެ. އެފަދަ ޢަމަލުތައް އެޕާޓީން ޓޮލަރޭޓް ނުކުރާނެކަންކަން ކަމަށާއި، މި މައްސަލައިގެ އަވަސް އަދި ފުރިހަމަ ޖިނާޢީ ތަޙްޤީޤެއް ކޮށްދެއްވުމަށް މޯލްޑިވްސް ޕޮލިސް ސަރވިސަށް ގޮވާލާކަމަށް އެމްޑީޕީގެ ބަޔާނުގައިވެއެވެ. މިގޮތުން މި މައްސަލަ އެޕާޓިގެ ފަރާތުން ފުލުހަށް އަންގައި ހުށަހަޅާފައިވާކަމަށާއި، މި މާރާމާރީގައި އެ ޕާރޓީގެ އޮފީހުގެ އެހެން ފިރިހެން މުވައްޒަފަކަށް ވެސް އޭނާ ޙަމަލާދީފައިވާކަމަށް ބަޔާނުގައިވެއެވެ.

އަނިޔާ އެންމެ ބޮޑަށް ލިބުނު އަންހެން މުވައްޒަފު، އޭޑީކޭ ހޮސްޕިޓަލަށް ގެންގޮސް، ލިބުނު ޒަޙަމްތަކަށް މިހާރު ދަނީ ފަރުވާދެމުންނެވެ. އަދި އަނިޔާލިބުނު ދެ މުވައްޒަފަށް މިޕާޓީން އަވަސް ޝިފާއަކަށް އެދެމެ.

– އެމްޑީޕީގެ ބަޔާނުގައިވެއެވެ.

އެމްޑީޕީ އޮފީހުގައި ހިނގި މާރާމާރީގައި އެންމެ ބޮޑު ޒަޚަމެއް ވެފައިވަނީ ގަލޮޅު ދެކުނު ދާއިރާގެ މެންބަރު މީކާޢީލް އަޙްމަދު ނަސީމްގެ މަންމަ މަރިޔަމް ޒުބައިރު (މަންދި ޒުބައިރު)އަށެވެ.