ވެރިކަން ކުރާ މައި ޕާޓީ އެމްޑީޕީ އޮފީސް ތެރޭގައި މާރާމާރީ ހިންގި މީހުން ހައްޔަރުކޮށް، އިންސާފު ޤާއިމްކޮށްދެއްވުމަށް އެޕާޓީން ރައީސް މުހައްމަދު ނަޝީދު ގޮވާލައްވައިފިއެވެ.

އެމްޑީޕީ އޮފީހަށް ބަޔަކު ވަދެ މިއަދު މެންދުރުވަނީ މާރާމާރީ ހިންގައި، ކަނބަލެއްގެ ބޯފަޅާލާފައެވެ. މިކަމާއި ގުޅިގެން ރައީސް ނަޝީދު ކުރެއްވި ޓްވީޓެއްގައި ވިދާޅުވީ މިއީ އެއްވެސް ގޮތަކަށް ބަލައި ގަނެވޭނެ އަމަލެއް ނޫންކަމަށެވެ. މިކަން ކުރިބަޔަކު މިހާރު މިހާރަށް ހިފާ ހައްޔަރުކޮށް އިންސާފު ގާއިމް ކޮށްދެއްވުމަށް ރައީސް ނަޝީދު ވަނީ ގޮވާލާފައެވެ.

އެމްޑީޕީ އޮފީހުގައި މާރާމާތީ ހިންގުން ބަލައެއް ނުގަނެވޭނެ. އެކަންކުރި މީހުން ހައްޔަރުކޮށް އަނިޔާއާއި ގެއްލުންވި ފަރާތްތަކަށް އިންސާފު ލިބެންޖެހޭ. އޮފީސް ސްޓާފް މަންދީ ޒުބައިރާއި، ޝާމިންއަށް އަވަސް ޝިފާއަކަށް އެދެން.

– ރައީސް ނަޝީދު ވިދާޅުވިއެވެ.

MDP Office gai maaraamaari hingun balaeh nuganeveyne. Ekankuri meehun hayyarukoh aniyaa aai gellunvi faraiythakah insaaf libeyn jeheyne. Office staff @MandhyZubair aai Shamin ah avas shifa akah edhen

— Mohamed Nasheed (@MohamedNasheed) September 2, 2021

ފުލުހުންގެ މީޑިއާ އޮފިޝަލް ވަނީ މިއަދު މެންދުރުގެ ވަގުތެއްގައި އެ އޮފީސް ތެރޭގައި މާރާމާރީއެއް ހިންގައިގެން ފުލުހުންނަށް ރިޕޯޓްކޮށްފައިވާ ކަމަށް ވިދާޅުވެފައެވެ. ފުލުހުންގެ މީޑިއާ އޮފިޝަލް ވިދާޅުވީ، އެ އޮފީސް ތެރޭގައި މާރާމާރީއެއް ހިންގި ކަމުގެ މައުލޫމާތު މިއަދު މެންދުރު 12:30 ހާއިރު ފުލުހުންނަށް ލިބިފައިވާ ކަމަށެވެ.

މަންދީއަކީ އެމްޑީޕީގެ އިދާރީ ކަންކަން ފެށުނީސުރެއް ބެލެހެއްޓުމުގައި އެންމެ އިސްކޮށް ހަރަކާތްތެރިވާ އެއްބޭފުޅާއެވެ. އެމްޑީޕީ އޮފީސް ތެރޭގައި މާރާމާރީ ހިންގާފައިވާއިރު، އެޕާޓީން ތައްޔާރުވަމުންދަނީ މިމަހުގެ 25 ވަނަ ދުވަހު ޤައުމީ މަޖިލީހުގެ އިންތިޚާބު ބޭއްވުމަށެވެ. މި އިންތިޚާބުގައި ރައީސް ޞާލިހުއާއި، ރައީސް ނަޝީދުގެ ވާދަވެރިކަން ބޮޑުވެ ދެބޭފުޅުނަށް ތާއީދު ކުރައްވާ ބޭފުޅުން ގެންދަވަނީ ވަރަށް ވަރުގަދައަށް ކެމްޕެއިން ކުރައްވަމުންނެވެ.