"ބިގް ބޮސް 13″ ކާމިޔާބުކުރި އިންޑިއާގެ މަގުބޫލު އެކްޓަރ ސިދާތު ޝުކުލާ ހާޓްއެޓޭކެއް ޖެހިގެން މިއަދު މަރުވެއްޖެއެވެ.
މަރުވި އިރު އޭނާގެ އުމުރަކީ 40 އަހަރެވެ.
ބައެއް މީޑިއާތަކުން ރިޕޯޓްކޮށްފައިވާ ގޮތުގައި އޭނާ މިއަދު ހެނދުނު މުމްބާއީގެ ކޫޕާ ހޮސްޕިޓަލަށް ގެންދިއަ އިރުވެސް ވަނީ މަރުވެފައިއެވެ. ސިދާތަކީ އާންމުންގެ ވަރަށްބޮޑު ސަޕޯޓް އޮންނަ ޓީވީ ތަރިއެކެވެ.
ސިދާތު މުނިފޫހިފިލުވުމުގެ ދާއިރާއަށް ވަދެފައިވަނީ 2008 ވަނަ އަހަރު ޓީވީ ޑްރާމާ "ބާބުލް ކާ އާގަން ޗޯޓޭނާ" އިންނެވެ. ނަމަވެސް އާންމުންގެ މެދުގައި އޭނާ މަޤުބޫލުވެފައިވަނީ ޑްރާމާ ސިލްސިލާ "ބާލިކާ ވަދޫ" އިންނެވެ.
View this post on Instagram
"ޚަތުރޯކޭ ކިލާޅީ 7″ އާއި "ބިގް ބޮސް 13″ ކާމިޔާބު ކުރުމާއި އެކު އޭނާއަށް އަންނަނީ ފިލްމުތަކުން ރަނގަޅު ހުށައެޅުންތަކެއް ވެސް ލިބެމުންނެވެ. އެގޮތުން މަރުވި އިރު އޭނާ އަށް ވަނީ ސައިފް އަދި ޕްރަބާސް އެކީގައި ފެނިގެންދާ ފިލްމް "އަދީޕުރުޝް" އިންވެސް ރޯލެއް ލިބިފައިއެވެެ.
ސިދާތު ބޮޑަށް މަގުބޫލުވީ ޓީވީ ޑްރާމާތައް ކުޅެގެންނެވެ. އެމަގުބޫލު ކަމުގައި އޭނާ ވަނީ ބޮލީވުޑައަށްވެސް ނުކުމެފައެވެ. އެގޮތުން އޭނާގެ އެންމެ ފުރަތަމަ ފިލްމަކީ 2014 ގެ ފިލްމް "ހަމްޓީ ޝަރްމާކީ ދުލްހަނިޔާ" އެވެ.
ސިދާތު ފަހަކަށްއައިސް ވަނީ ގިނަ ވީޑިއޯ ލަވަތަކެއްވެސް ކުޅެފައެވެ. ޓީވީ އިންޑަސްޓްރީގައި ޑްރާމާ ސީރީޒްގެ އިތުރުން ސިދާތު ވަނީ ރިއަލިޓީ ޝޯވް ތަކުންވެސް ފެނިފައެވެ. އަދި އޭނާ ވަނީ ބައެއް ޝޯވްތައް ހޯސްޓްވެސް ކޮށްދީފައެވެ.
ސިދާތުގެ ކުއްލި މަރާއި އެކު ބޮލީވުޑަށް ވަނީ ބޮޑު ޝޮކެއް ލިބިފައެވެ. އަދި އެތައް ބަޔަކު އަންނަނީ އޭނާއަށް ތައުޒިޔާ ކިޔައި ޓްވިޓާގައި ހިތާމަ ފާޅު ކުރަމުންނެވެ.
