ހއ.ފިއްލަދޫގެ އިހްތިސާސްގެ ތެރޭގައި އޮތް ދައްޕަރުގެ މައްސަލާގައި ގޮތެއް ނިންމާނީ އެރަށު ކައުންސިލާ މަޝްވަރާކޮށްގެންކަމަށް ސަރުކާރުން ބުނެފިއެވެ.
2010 އަހަރު ހއ.ދައްޕަރަކީ ފަޅުރަށެއްގެ ގޮތުގައި ކަނޑައަޅައި، އެރަށުގައި ރިސޯޓެއް ތަރައްޤީކުރުމަށް ބަޔަކާއި ހަވާލުކުރިއެވެ. ނަމަވެސް ރިސޯޓް ތަރައްޤީކުރުން އެރަށުގައި ކުރިއަށް ގެންގޮސްފައެއް ނުވެއެވެ. އޭގެ ފަހުން މިދޔަ އަހަރުގެ މާރިޗް 18 ގައި ރައީސުލްޖުމްހޫރިއްޔާ އިބްރާހީމް މުޙައްމަދު ޞާލިޙް ވަނީ ފިއްލަދޫގެ އިހުތިޞާސްގެ ތެރޭގައި ދައްޕަރު ހިމަނުއްވާފައެވެ. ނަމަވެސް ފަހުން ރައީސް އޮފީހުން ނެރުނު ގަރާރެއްގައި ވަނީ ފިއްލަދޫގެ އިދާރީ ދާއިރާގެ އިހުތިޞާސްގެ ތެރެއިން ދައްޕަރު ވަކިކޮށްފައެވެ.
ހއ. ފިއްލަދޫގެ އިދާރީ ދާއިރާގެ އިޙްތިޞާސްގެ ތެރޭގައޮ ހިމެނޭ ހއ.ދައްޕަރު، އެ އިދާރާގެ އިހުތިޞާސުން ވަކިކޮށްފައި ވަނީ ފިއްލަދޫ ކައުންސިލާ މަޝްވަރާ ކުރުމަކާ ނުލާ ކަމަށް ދެކެވޭ ވާހަކަތަކާއި ގުޅިގެން ރައީސް އޮފީހުގެ ތަރުޖަމާން މުޙައްމަދު މަބްރޫކް ޢަޒީޒް ވިދާޅުވީ ހއ.ދައްޕަރަކީ ރިއަލް އެސްޓޭޓް ޓޫރިޒަމްގެ އައު ޕްރޮޑަކްޓެއް ތަރައްޤީކުރުމަށް ނިންމާފައިވާ ރަށެއްކަމަށެވެ. އެރަށުގެ އެއްވެސްކަމެއް ކައުންސިލާއި މަޝްވަރާނުކޮށް ސަރުކާރުން ކުރިއަށް ނުގެންދާނެކަމުގެ ޔަޤީންކަން ދެއްވަމުން މަބްރޫކް ވިދާޅުވީ، ފިއްލަދޫ ކައުންސިލާއި މަޝްވަރާތައް ކުރިއަށްދާކަމަށެވެ. އަދި އެކަމުގައި ލާމަރުކަޒީ ޤާނޫނުގައި ހުރި އަސާސްތަކާއި ޚިލާފުވުމުގެ ވިސްނުމެއް ސަރުކާރުގެ ނެތްކަމަށްވެސް މަބްރޫކް ވިދާޅުވިއެވެ.
ވިސްނުން މިހުރީ ރިއަލް އެސްޓޭޓް ޓޫރިޒަމް ތަރައްޤީކުރުމަށް އައް ޕްރޮޑަކްޓެއް ރާއްޖޭގައި ތަރައްޤީކުރުމަށް އެގޮތުގައި. މިހާރު ޤާނޫނުގެ ދަށުން ހަމަ ރިސޯޓްތަކުން ކުރަމުން އަންނަ އެއްކަންތައް އެއީ ރިސޯޓްތަކުގައި ހުންނަ ވިލާތަށް 99 އަހަރށް ނޫނީ ދިގުމުއްދަތަށް ބޭރުގެ އިންވެސްޓަރުންނަށް ދޭ. އެނގިވަޑައިގަންނަވާނެ ރާއްޖޭގެ އެންމެ ބޮޑެތި ނަން މަޝްހޫރު ރިސޯތްތަކުގައި ހުންނާނެ ވިލާތައް ދިގު މުއްދަތަކަށް ދޫކޮށްފަ. މަޝްވަރާ ކުރެވިގެންދާނީ، އެކަމުގައި ލާމަރުކަޒީ ޤާނޫނުގައި ހުރި އަސާސްތަކާއި ޚިލާފުވުމުގެ ވިސްނުމެއް ހަމަނެތް ދައްޕަރުގެ އިޝޫގަ ހަމަ ކައުންސިލުން މަޝްވަރާކޮށް ގޮތް ނިންމާނީ.
– މުހައްމަދު މަބްރޫކް އަޒީޒް
ދައްޕަރަކީ ހއ.ފިއްލަދޫގެ އުތުރުން އެރަށާގުޅިފައި އޮންނަ ރަށެކެވެ.ފިއްލަދޫގެ އިހްތިސާސްގެ ތެރޭގައި އޮތް ދައްޕަރު އެރަށުގެ އިގްތިސާސް އިން ވަކިކުރުމާ ގުޅިގެން ޓްރާންސްޕޭރެންސީ މޯލްޑިވްސްއިންވެސް ވަނީ ކަންބޮޑުވުން ފާޅުކޮށްފައެވެ.
