އެމްޑީޕީގެ ވެރިކަމެއް އޮތް ނަމަވެސް މިއަދު އެންމެ ބޮޑަށް މާޔޫސްވެފައިވަނީ އެމްޑީޕީގެ މެމްބަރުން ކަމުގައި ރައްޔިތުންގެ މަޖިލީހުގެ ނައިފަރު ދާއިރާގެ މެމްބަރު އަހުމަދު ޝިޔާމް ވިދާޅުވިއެވެ.

އިދިކޮޅު ކޯލިޝަނުން ރޭ ބޭއްވި ޖަލްސާގައި ވާހަކަ ދައްކަވަމުން، ޝިޔާމް ވިދާޅުވީ މިސަރުކާރު ވެރިކަމަށް ގެނައުމަށް އެންމެ ބޮޑަށް މަސައްކަތް ކުރީ އެމްޑީޕީން ކަމަށެވެ. ނަމަވެސް މިއަދު ފެނިގެންދަނީ ކޯލިޝަންގެ ހިމާޔަތުގައި މުޅި ސަރުކާރު އޮތްތަން ކަމަށެވެ. އެންމެ ފަހުން ހުވަދު އަތޮޅުގެ ރަށްތަކަށް ކުރި ދަތުރުގައި އެމްޑީޕީ މެމްބަރުންގެ ފަރާތުން ލިބުނު ޝޫޢޫރުތަކުން މިސަރުކާރާއިމެދު އެމްޑީޕީ މެމްބަރުން މާޔޫސްވެފައިވާ މިނިްވަރު ހާމަވާކަމަށް ޝިޔާމް ވިދާޅުވިއެވެ.

އޭނާ ވިދާޅުވީ ވެރިކަން ލިބުމުން އެމްޑީޕީ މެމްބަރުންނަށް ވަރަށް ބޮޑަށް މިސަރުކާރުން އިހުމާލު ވެފައިވާކަމަށެވެ. ކޯލިޝަން ހިމާޔަތް ކުރި ނަމަވެސް އެމްޑީޕީ މެމްބަރުންނަށް ސަރުކާރުން އިހުލާމުވުުމުން ދެން މިރައްޖޭގައި ހުލާސްތެރިވެވޭނެ ރައްޔިތަކު ނުހުންނާނެކަމަށް ޝިޔާމް ވިދާޅުވިއެވެ.

ޝިޔާމްވަނީ ރޭގެބައްދަލުވުމުގައި ރާއްޖޭގެ މިނިވަންކަމާއި ސިޔާދަތާއި އިސްތިޤުލާލަށް ގެއްލުންވާގޮތަށް ސަރުކާރުން ކުރާ ގިނަ ކަންތައްތަކެއް ފާހަގަކޮށް އެކަންމަމަށް ވާހަކަ ދައްކާފައެވެ. ބިންތައް ވިއްކުމާއި، އިންޑިއާގެ ސިފައިން ރާއްޖޭގެ އެކި ކަންކޮޅުތަކުގައި ބައިތިއްބައިގެން ހިންގަމުންދާ ކަންކަމަކީ ރައްޔިތުން ނުހަނު ކަންބޮޑުވުން އޮތްކަންތައްތަކެއްކަމަށް ޝިޔާމް ވަނީ ވިދާޅުވެފައެވެ.

ޝިޔާމްވަނީ މިހާރު އޮތް ވެރިކަން ބަދަލުކޮށް ރައްޔިތުން އެދޭފަދަ ވެރިކަމެއް 2023 ވަނަ އަހަރު ރާއްޖޭގައި ގާއިމް ވެގެންދާނެކަމަށް ވިދާޅުވެފައެވެ.