ހއ. ދައްޕަރު ފިއްލަދޫ ކައުންސިލްގެ އިޚްތިޞާޞްގެ ތެރެއިން ވަކިކުރުމުމަށް ރައީސުލްޖުމްހޫރިއްޔާ އިބްރާހީމް މުޙައްމަދު ޞާލިޙުގެ ޤަރާރަކުން ނިންމި ނިންމުމަކީ ވަރަށް ޚުދުމުޚުތާރު އަދި ލާމަރުކަޒީ ޤާނޫނާއި ލާމަރުކަޒު ކުރުމުގެ މަފްހޫމާއި މުޅިން ތަޢާރަޒް ނިންމުމެއް ކަމަށް ޕްރޮގްރެސިވް ކޮންގްރެސް ކޯލިޝަނުން ބުނެފިއެވެ.
އެކޯލިޝަނުން ބުނެފައިވަނީ ދައްޕަރަކީ ޒަމާނުއްސުރެއް ފިއްލަދޫ ރައްޔިތުންނަށް މަންފާލިބޭ ރަށެއްގެ ގޮތުގައި އަދި ފިއްލަދޫގެ ބައެއްގެ ގޮތުގައި ރައްޔިތުން ބަލަމުންދާ ރަށަކަށްވެފައި، ލާމަރުކަޒީ ޤާނޫނަށް ގެނެވުނު އިސްލާހާއެކު ފިއްލަދޫ ކައުންސިލްގެ އިޚްތިޞާޞްގެ ތެރޭގައި ހިމެނި، ރަށުގެ ތަރައްޤީގެ ޕްލޭންތައްޔާރުކޮށް ކައުންސިލަށް އާމްދަނީ ލިބޭނެ މުހިއްމު ވަސީލަތެއްގެ ގޮތުގައި ދައްޕަރު ވެފައިވަނިކޮށް ކައުންސިލާއި އަދި ރައްޔިތުންނާއި އެއްވެސް މަޝްވަރާއެއް ކުރުމެއްނެތި ރައީސުލްޖުމްހޫރިއްޔާގެ ޤަރާރަކުން ދައްޕަރު ވަކިކޮށްލުމަކީ ފިއްލަދޫގެ ރައްޔިތުންނަށް ދެވޭ ވަރަށްބޮޑު އަނިޔާއެއްކަމަށެވެ.
މިކަމާ ގުޅިގެން ފިއްލަދޫގެ ރައްޔިތުންގެ ހިތްހަމަނުޖެހުމާއި ކަންބޮޑުވުން އިންތިހާއަށްވަނީ އުފެދިފަ. މީގެ އިތުރުން ސެކަންޑް ހޯމް ޕްރޮޖެކްޓްގެ ދަށުން ކަމަށްބުނެ ރާއްޖެއިން ބޭރުން އަންނަ ބަޔަކު ދިރިއުޅުމަށް ދައްޕަރު ވިއްކާލުމަކީ ރައްޔިތުން އެއްގޮތަކަށްވެސް ބޭނުންވާ ކަމެއް ނޫން.
– އިދިކޮޅު ކޯލިޝަނުން ބުނެފައިވެއެވެ.
ލާމަރުކަޒީ ޤާނޫނުގެ ދަށުން ކައުންސިލްތަކަށާއި ރައްޔިތުންނަށް އެންމެ ފައިދާއާއި މަންފާ ލިބޭނެ އަދި ރައްޔިތުން ބޭނުންވާ ގޮތަށް މިފަދަ ކަންކަން ނިންމުމަށް ރައީސުލްޖުމްހޫރިއްޔާއަށް އިދިކޮޅު ކޯލިޝަނުން ވަނީ ގޮވާލާފައެވެ. އަދި ލާމަރުކަޒު ކުރުމުގެ ނަމުގައި މިފަދަ ޚުދުމުޚުތާރު ޢަމަލުތައް ހިންގުން ހުއްޓާލުމަށާއި ދައްޕަރު ފިއްލަދޫ ކައުންސިލްގެ އިޚްތިޞާޞްގެ ތެރެއިން ވަކިކުރުމަށް ނިންމެވި ޤަރާރު އަނބުރާ ގެންދަވާ، ސެކަންޑް ހޯމް ޕްރޮޖެކްޓްގެ ނަމުގައި ދައްޕަރު ބޭރުގެ ބަޔަކަށް ވިއްކާލައިގެން ނާޖާއިޒްގޮތުގައި މަންފާ ހޯދުމަށް ކުރަމުންދާ މަސައްކަތް ހުއްޓާލުމަށް ވަނީ ގޮވާލާފައެވެ.
ރާއްޖޭގެ ރައީސުލްޖުމްހޫރިއްޔާގެ މަޤާމުގައި ހުންނަވައިގެން ޤައުމުގެ މިނިވަންކަމާއި ސިޔާދަތަށް ގެއްލުންވާފަދަ ކަންކަން ނުކުރުމަށާއި، ޤާނޫނުއަސާސީއާއި ޤާނޫނުތަކާއި އަދި ކުރައްވާފައިވާ ހުވައާއި ޚިލާފުނުވުމަށްވެސް އިދިކޮޅު ކޯލިޝަނުން ވަނީ ގޮވާލާފައެވެ.
