ޖަރުމަނު ލީގުގައި ރޭ ހާތާ ބާލިން އާއި ބަަޔާން މިއުނިކް ބައްދަލުކުރި މެޗުގެ ހެދި ހެޓްރިކާއެކު ރޮބާޓް ލެވަންޑޯސްކީ ބަޔާން މިއުނިކުގައި ޖެހި ލަނޑުގެ ޢަދަދު 300 އަށް އަރައިފިއެވެ.
ބަޔާންގެ އަމިއްލަ ދަނޑުގައި ރޭ ހާތާ ބާލިން އާއި ބަޔާން ވާދަކުރި މެޗު ބަޔާނުން ކާމިޔާބުކުރީ 0-5 ގެ ނަތީޖާއަކުންނެވެ.
ބަޔާންގެ ފަރާތުން މޮޅު ކުޅުމެއް ފެނިގެންދިޔަ މި މެޗުގެ ވަރަށް ކުރީކޮޅު އެޓީމުން ވަނީ ލަނޑު ޖަހާ ލީޑު ނަގާފައެވެ. މި ލަނޑު މެޗުގެ 6 ވަނަ މިނެޓުގައި ބަޔާން މިއުނިކަށް ކާމިޔާބުކޮށްދިނީ، ތޯމަސް މުލާއެވެ. އަދި ފުރަތަމަ ހާފް ނިމުމުގެ ކުރިން ބަޔާނުން ވަނީ އިތުރު ލަނޑެއް ޖަހާ ލީޑު ފުޅާކޮށްފައެވެ. މެޗުގެ 35 ވަނަ މިނެޓުގައި މި ލަނޑު އެޓީމަށް ކާމިޔާބުކޮށްދިނީ ލެވަންޑޯސްކީއެވެ.
މެޗުގެ ދެވަނަ ހާފުގައިވެސް ބަޔާނުން ގިނަ ހަމަލާތަކެއް އުފެއްދިއިރު، ދެވަނަ ހާފް ފަށައިގެން ހަތަރުވަނަ މިނެޓުގައި އެ ޓީމުން ވަނީ ތިންވަނަ ލަނޑެއް ޖަހާފައެވެ. މި ލަނޑު އެ ޓީމަށް ކާމިޔާބުކޮށްދިނީ ޒުވާން ތަރި ޖަމާލް މުސިއާލާއެވެ. އަދި މެޗުގެ 70 ވަނަ މިނެޓުގައި ލެރޯއި ސާނޭ ދިން ޕާހަކުން ލެވަންޑޯސްކީ ބަޔާނުގެ ހަތަރުވަނަ ލަނޑު ޖަހައިދިންއިރު، އޭގެ 14 މިނެޓު ފަހުން ލެވަންޑޯސްކީ ވަނީ އިތުރު ލަނޑެއް ޖަހައި، މެޗުގައި ހެޓްރިކް ހަދާފައެވެ.
މި މެޗުގައި ލެވަންޑޯސްކީ ޖެހި 3 ލަނޑާއެކު ބަޔާން މިއުނިކަށް އޭނާ ޖެހި ލަނޑުގެ ޢަދަދު ވަނީ 301 އަށް އަރާފައެވެ.
