އަންނަ މަހުގެ 25 ވަނަ ދުވަހު ބޭއްވުމަށް ހަމަޖެހިފައިވާ އެމްޑީޕީގެ ޤައުމީ މަޖިލީހުގެ އިންތިޚާބުގައި ވަދަކުރެވޭ ކެންޑިޑޭޓުންގެ ދާއިމީ ލިސްޓު އާންމުކޮށް، ލިސްޓަށް ޝަކުރާ ހުށަހެޅުމުގެ ފުރުސަތު ހުޅުވާލައިފިއެވެ.
އެމްޑީޕީން ބުނެފައިވަނީ އިއްޔެ އާންމުކުރި އެޕާޓީގެ އިންތިޚާބުގައި ވާދަކުރެވޭ ކެނޑިޑޭޓުންފެ ލިސްޓަށް ޝަކުވާ ހުށަހެޅުމުގެ ފުރުޞަތު މިއަދު، 27 އޯގަސްޓް 2021 ހުކުރު ދުވަހުން ފެށިގެން 30 އޯގަސްޓް 2021 (ހޯމަ) ދުވަހާ ހަމައަށް ހުޅުވާލައިފައިވާކަމަށެވެ.
ޝަކުވާ ބަލައިގަތުމުގެ ސުންގަޑި އަކީ ހޯމަ ދުވަހުގެ ހަވީރު 4.00 އެވެ. ޝަކުވާ ބަލައިގަތުމަށް ހަމަޖެހިފައިވަނީ، ސިޓީގެ އަސްލު، އާދިއްތަ އަދި ހޯމަ ދުވަހުގެ ހެނދުނު 9.00 ން ހަވީރު 4.00 އަށް ސެކްރެޓޭރިއެޓްގެ 2 ވަނަ ފަންގިފިލާއިންނެވެ. އޮންލައިންކޮށް ހުށަހަޅުއްވާ ފަރާތްތަކަށް މިއަދުން ފެށިގެން ސުންގަޑި ހަމަވަންދެން [email protected] އީމެއިލް މެދުވެރިކޮށް ޝަކުވާ ހުށަހެޅޭނެ ފުރުސަތު ވަނީ ދީފައެވެ.
މިފުރުޞަތަކީ، 16 އޯގަސްޓް 2021 ގައި ހުޅުވާލި ޝަކުވާ ހުށަހެޅުމުގެ ފުރުޞަތުގެ ތެރޭގައި ޝަކުވާ ހުށަހެޅުއްވި ފަރާތްތަކަށް އެފަރާތްތަކުގެ ޝަކުވާ ކެންޑިޑޭޓުންގެ ދާއިމީ ލިސްޓު އާންމު ކުރިއިރު ހިމެނިފައި ނުވާ ފަރާތްތަކަށް ހުޅުވާލެވުނު ފުރުޞަތެއް ކަމަށް އެމްޑީޕީން ބުނެއެވެ. އަދި މިއަދު މިހުޅުވާލި ފުރުޞަތުގެ ތެރޭގައި، ކުރިން ހުށަހަޅާފައި ނުވާ ޝަކުވާއަކާ ގުޅޭ ޝަކުވާއެއް (އައު ޝަކުވާ އެއް) ބަލައިނުގަނެވޭނެކަމަށް އެޕާޓީން ބުނެއެވެ.
އިންތިޚާބުގައި އެކި ދާއިރާތަކަށާއި، އެކި މަޤާމުތަކަށް 730 ކެނޑިޑޭޓުން ވާދަކުރެއެވެ. އިންތިޚާބުގައި ވޯޓުލުމުގެ ފުރުސަތު ދެވިގެންދާނީ އެހެން އިންތިޚާބުތަކުގައިވެސް އަމަލުކުރާ އުސޫލުން ޕާޓީގެ ދަފްތަރުގައި ހިމެނޭ މީހުންނަށެވެ. ދަފްތަރުގައި ހިމެނޭ މީހުންގެ ތެރެއިން ވޯޓުލާން ފުރުސަތު ނުދޭނީ ބަލަންޖެހޭ ކަންކަން ބެލުމަށްފަހުކަމަށް އެޕާޓީގެ ޗެއާޕާސަން ހަސަން ލަތީފް ވަނީ ވިދާޅުވެފައެވެ.
އެމްޑީޕީއަކީ ރާއްޖޭގައި އެންމެ ބޮޑު ސިޔާސީ ޕާޓީއެވެ. އެޕާޓީގެ ދަފްތަރުގައި 93،354 މެމްބަރުން އެބަތިއްބެވެ. މި އިންތިޚާބަކީ އެމްޑީޕީގެ އެތެރޭގައި ބޭއްވޭ އެންމެ ބޮޑު އިންތިޚާބަށްވާއިރު، އިންތިޚާބުގައި 300 ވޯޓު ފޮށި އެކި ދައިރާތަކުގައި ބެހެއްޓިގެންދާނެއެވެ. މިއިންތިޚާބުގައި 900 އެއްހާ އޮފިޝަލުން ހަރަކާތްތެރިވާނެކަމަށާއި، އޮފިޝަލުން ހޯދުމުގެ މަސައްކަތްވެސް ވަރަށް އަވަހަށް ކުރެވޭނެކަމަށް ހަސަން ވަނީ ވިދާޅުވެއެވެ.
