މިހާރު އޮތް ވެރިކަން ކުރާ ކޯލިޝަން، ދަމަހައްޓައި ހިފަހައްޓަވަމުންދަނީ ބަރުލަމާނީ ނިޒާމެއްގައިވެސް ނުހިފެހެއްޓޭނެހާ ފުރިހަމައަށް ކަމުގައި އެމްޑީޕީގެ ޤައުމީ މަޖިލިސް މެމްބަރު އަދި އަރުޑީސީގެ މެނޭޖިންގ ޑިރެކްޓަރ މޫސާ އަލިމަނިކު (މޫކޭ) ވިދާޅުވެއްޖެއެވެ.
ބަރުލަމާނީ ނިޒާމަށް ތާއީދުކޮށް، އެނިޒާމުގެ ގެނައުމަށް އެމްޑީޕީ ތެރެއިން މަސައްކަތް ކުރަމުންދާއިރު، އެނިޒާމަށް ތާއީދު ނުކުރާ އެމްޑީޕީގެ ގިނަ މެމްބަރުން ދަނީ އެބޭފުޅުންގެ ޝުއޫރުތައް ފާޅު ކުރަމުންނެވެ. މޫކޭ ވިދާޅުވީ ބަރުލަމާނީ ނިޒާމެއްގައިވެސް މިހާރު އޮތް ކޯލިޝަން މިގޮތުގައި ދެމެހެއްޓުމަކީ ފަސޭހަ ކަމަކަށް ނުވާނެކަމަށެވެ. ރައީސް ޞާލިހު ކޯލިޝަން ހިފަހައްޓައި، ވެރިކަން ކުރައްވަމުންދަނީ އެހާވެސް ފުރިހަމައަށް ކަމުގައި މޫކޭ ވިދާޅުވިއެވެ. އޭނާ ވަނީ މިކަން ފާހަގަކޮށް ކުރި ޓްވީޓުގައި ދައުރުގެ މެދުން އިތުރު އިންތިޚާބެއް ގެނައުމަށް ތާއީދު ނުކުރާކަމަށް ރައީސް ނަޝީދު ދެއްކެވި ވާހަކަކޮޅުވެސް ހިއްސާ ކުރައްވާފައެވެ.
ރައީސުލްޖުމްހޫރިއްޔާ އިބްރާހިމް މުހައްމަދު ޞާލިޙު ކޯލިޝަން ހިފަހައްޓަވަނީ ބަރުލަމާނީ ނިޒާމެއްގައިވެސް ނުހިފެހެއްޓޭހާ ފުރިހަމައަށް. އެއީ އިޚްލާޞްތެރިކަން. އެއްވެސް ނިޒާމަކީ އިންސާނުން އިޚްލާޞްތެރި ނުވާހާ ހިނދަކު ރަނގަޅު ނިޒާމެއް ނޫން.
– މޫކޭ ވިދާޅުވިއެވެ.
ރައީސުލްޖުމްހޫރިއްޔާ އިބްރާހިމް މުހައްމަދު ޞާލިޙު ކޯލިޝަން ހިފަހައްޓަވަނީ ބަރުލަމާނީ ނިޒާމެއްގައިވެސް ނުހިފެހެއްޓޭހާ ފުރިހަމައަށް. އެއީ އިޚްލާޞްތެރިކަން. އެއްވެސް ނިޒާމަކީ އިންސާނުން އިޚްލާޞްތެރި ނުވާހާ ހިނދަކު ރަނގަޅު ނިޒާމެއް ނޫން. pic.twitter.com/tPGZgkpPCO
— Moosa Ali Manik ?? (@VMookey) August 24, 2021
ރައީސުލްޖުމްހޫރިއްޔާގެ އޮފީހުގައި މިހަފްތާގައި ބޭއްވި ނޫސްވެރިގެ ބައްދަލުވުމުގައި ތަރުޖަމާން މަބްރޫކް އަޒީޒް ވިދާޅުވެފައިވަނީ، މިހާރު ވެރިކަން ކުރަމުންދާ ކޯލިޝަނުން އަމަލު ކުރަމުންދަނީ، ކޯލިޝަން މެނިފެސްޓޯއަށް ކަމަށާއި، އެކޯލިޝަންގައި އެއްވެސް ހިސާބެއްގައި ބަރުލަމާނީ ނިޒާމު ގެނައުމަށް ބުނެފައި ނުވާކަމަށެވެ.
ދިވެހިރާއްޖޭގެ ވެރިކަމުގެ ނިޒާމު ބަރުލަމާނީ ނިޒާމަކަށް ބަދަކުރުމަށް ސިޔާސީ މަސްރަހުގައި އަދި ވަކާލާތު ކުރަމުންދާތަން ފެންނަނީ، އެމްޑީޕީގެ ރައީސް ނަޝީދު ގިނިކަންޏާއެވެ. ޚުދު އެމްޑީޕީގެ އެންމެ އިސްފަރާތް ކަމުގައިވާ، ރައީސުލްކުމްހޫރިއްޔާ އިބުރާހިމް މުހައްމަދު ސޯލިހުވެސް، ބަރުލަމާނީ ޒިނާމަކަށް ދިއުމަށް ތާއީދު ނުކުރައްވާކަން ވަނީ ފާއިތުވެދިޔަ ތަނުގައި ދައްކަވާފައިވާ ވާހަކަފުޅުތަކުން ސާފުވެގެން ގޮސްފައެވެ.
ރައީސް ސޯލިހު ވިދާޅުވެފައިވަނީ، ވެރިކަމުގެ ނިޒާމު ބަރުލަމާނީ ނިޒާމަކަށް ބަދަލުކުރުމުގެ ފުރުސަތު އޮންނާނީ ރައްޔިތުންގެ ފެންނަ ނުފެންނަ ވޯޓަކުން އެކަން ކުރުމަށް ނިންމައިފި ހާލަތެއްގައި ކަމުގައެވެ. އަދި އޭގެ ކުރިން ވިދާޅުވެފައިވަނީ، ވެރިމުގެ ނިޒާމު ބަދަލުކުރުމާ މެދު ވިސްނެވުމަށް ވުރެ، ވައްދުތައް ފުއްދެވޭތޯ މަސައްކަތް ކުރެއްވުން މިވަގުތަށް އެމަނިކްފާނަށް މާމުހިންމު ކަމުގައެވެ.
