އަފްއާނިސްތާންގެ 20،000 ރެފިއުޖީން، ދުނިޔޭގެ އެކި ކަންކޮޅުތަކުގެ ހޮޓާތަކުގައި ހިލޭ ބޭއްތިއްބުމަށް ނިންމާފައިވާކަން، އެއަރ ބީއެންބީގެ ސީ.އީ.އޯ އަންގާރަ ދުވަހު ކުރެއްވި ޓުވީޓެއްގައި ހާމަ ކުރައްވާއިފިއެވެ.
"އެމެރިކާގައައި އަދި ދުނިޔޭގެ އެހެން ކަންކޮޅުތަކުގައިވެސް، އަފްއާނިސްތާންގެ ރެފިއުޖީން އާބާދު ކުރުވުމަށާއި، ބޭތިއްބުމަށް މިހާރު ކުރެވެމުންދާ މަސައްކަތަކީ، ފަހުގެ ތާރީޚެއްގައި ދުނިޔެއަށް ކުރިމަތިވެފައިވާ އިންސާނީ އެންމެ ބޮޑު އެއް ކާރިސާ. މިކަމަށް އެހީތެރި ވެދިނުމުގެ ޒިންމާއެއް އޮތްކަމުގައި އަހަރެމެން ދެކެން،" އެއަރ ބީއެންބީގެ ސީ.އީ.އޯ ޗެސްކީ ކުރެއްވި ޓުވީޓުގައި ވިދާޅުވެފައި ވެއެވެ.
The displacement and resettlement of Afghan refugees in the US and elsewhere is one of the biggest humanitarian crises of our time. We feel a responsibility to step up.
— Brian Chesky (@bchesky) August 24, 2021
އޭނާ ވިދާޅުވި ގޮތުގައި، އަފްއާނިސްތާނުގެ ރެފިއުޖީން ހޮޓާތަކުގައި ތިބުމަށް އެއަރ ބީއެންބީން ފައިސާ ދައްކާދޭނެ ކަމަށާއި، އެހެންނަމަވެސް، މިކަން ހަގީގަތަކަށް ވެގެން ދަނީ، ހޯޓާތައް ހިންގާ ފަރާތްތަކުގެ އެހީތެރިކަން ލިބިގެން ދިއުމުގެ ސަބަބުން ކަމުގައެވެ.
އަދި ޗެސްކީވަނީ، ވަގުތު ބޭކުރެވެން ނެތްކަމުގައި ވިދާޅުވެ، އެހެނިހެން ވިޔަފާރިތަކަށްވެސް، މި ކާރިސާގައި އެހީތެރިކަން ފޯރުކޮށް ދިނުމަށް ގޮވާލާފައެވެ.
ޗުއްޓީ ހޭދަކުރުމަށް ހޮޓާތައް ކުއްޔައްދޭ، މަޝްހޫރު އެއަރ ބީއެންބީ ކުންފުނީގެ ކޯ-ފައުންޑަރއެއް ކަމުގައިވާ ޗެސްކީ ވިދާޅުވެފައިވަނީ، އެންމެ ބޮޑަށް ބޭނުންވެފައިވާ ކަންކަމުގައި އެހީތެރިކަން ފޯރުކޮށް ދިނުމަށް އެކުންފުނިން މަސައްކަތް ކުރަމުންދަނީ، ކޮމިއުނިޓީ ޕާރޓްނަރުންނާއި އަދި ހިލޭސާބަހަށް މަސައްކަތް ކޮށްދޭ ޖަމްއިއްޔާތާކާ އެނޫންވެސް ތަފާތު ޖަމާއަތްތަކާ ގުޅިގެން ކަމުގައެވެ.
I hope this inspires other business leaders to do the same. There’s no time to waste.
— Brian Chesky (@bchesky) August 24, 2021
މީގެ އެއް ހަފްތާކުރިން ތާލިބާން ޖަމާއަތުން އަފްއާނިސްތާނުގެ ވެރިރަށް ކާބުލް އެމީހުންގެ ބާރުގެ ދަށަށް ގެނައުމާއެކު، އެތައްހާސް އަފްއާން ރައްޔިތުންދަނީ ގައުމު ދޫކޮށް ދަމުންނެވެ. އަދި މީގެއިތުރުން، އެގައުމުގައި ހަރަކާތްތެރިވަމުން ދިޔަ ގައުމުން ބޭރުގެ ސިފައިންނަށް އެހީތެރިކަން ފޯރުކޮށްދިން އަފްއާނިސްތާނުގެ ރައްޔިތުން އެގައުމުން ބޭރަށް ގެންދިއުމުގެ މަސައްކަތް އެމެރިކާއާއި އަދި އެނޫން ގައުމުތަކުންވެސް ދަނީ ކުރަމުންނެވެ.
އަދި އެތައްހާސް އަފްއާން ރައްޔިތުންނެއް ދަނީ، އެމެރިކާ ސިފައިން އަގައުމުން ފޭބުމަށް އެއްބަސްވެފައިވާ ތާރީޚު ކަމުގައިވާ 31 އޮގަސްޓުގެ ކުރިން އަފްއާނިސްތާނުން ބޭރަށް ދިއުމަށް މަަސައްކަތް ކުރަމުންނެވެ.
