ހުސްވެފައިވާ އިންފޮމޭޝަން ކޮމިޝަނަރުގެ މަޤާމަށް އަލްއުސްތާޛް އަހުމަދު އާހިދު ރަޝީދު އައްޔަން ކުރުމަށް ރައްޔިތުންގެ މަޖިލީހުގެ މިނިވަން މުއައްސަސާތަކާއި ބެހޭ ކޮމެޓީން ފާސްކޮށްފިއެވެ.
އިންފޮމޭޝަން ކޮމިޝަނަރުގެ މަޤާމަށް އާހިދު އައްޔަން ކުރުމަށް ކޮމެޓީން ފާސްކޮށްފައިވަނީ، މިމަޤާމަށް ކުރިމަތި ލެއްވި ބޭފުޅުންގެ ތެރެއިން ރައީސުލްޖުމްހޫރިއްޔާގެ އޮފީހުން ފޮނުވި 4 ބޭފުޅުންނާއި އިންޓަރވިއު ކުރުމަށްފަހުގައެވެ.
އިންފޮމޭޝަން ކޮމިޝަނަރަކަށް އައްޔަން ކުރުމަށް ކޮމެޓީން ރުހުންދިން އާހިދުއަކީ ރައީސުލްޖުމްހޫރިއްޔާ އިސްކަންދެއްވި ލިސްޓުގެ ދެވަނައިގައި އޮން ނަމެވެ. އިންފޮމޭޝަން ކޮމިޝަނަރުގެ މަޤާމަށް ރައީސުލް ޖުމްހޫރިއްޔާ ފޮނުވި 4 ނަމަކީ އަލްއުސްތާޛް ޝިހާމް މުހައްމަދު ވަހީދު އާއި، އަލްއުސްތާޛް އަހުމަދު އާހިދު ރަޝީދު، އައި، އަޒްލީމާ އަހުމަދު، އިތުރުން މަރިޔަމް އަލީމް، އެވެ.
ކޮމިޓީން މި ހަތަރު ބޭފުޅުންނާ އިންޓަވިއު ކުރުމަށް ފަހު އިންފޮމޭޝަން ކޮމިޝަނަރު ކަމަށް އައްޔަން ކުރަން ކޮންމެ ބޭފުޅަކަށް ރުހުން އޮތްތޯ ވަކިވަކިން ވޯޓަށް އަހާފައިވެ އެވެ. އިންފޮމޭޝަން ކޮމިޝަނަރު ކަމަށް އާހިދު އައްޔަން ކުރަން ކޮމިޓީން ފާސްކުރީ އެ ވަގުތު ކޮމިޓީގައި ތިއްބެވި 10 މެންބަރުންގެ އިއްތިފާގުންނެވެ. އަނެއް ތިން ނަމަށް އެ އަދަދަށް މެންބަރުންގެ ވޯޓު ލިބިފައެއް ނުވެ އެވެ.
އިންފޮމޭޝަން ކޮމިޝަނަރުގެ މަޤާމު ހުސްވީ ކުރިން އެ މަޤާމުގައި ހުންނެވި ޙުސައިން ފިޔާޒް މޫސާ މިދިޔަ މާރިޗު މަހުގެ 21 ވަނަ ދުވަހު އިސްތިއުފާދެއްވާފައިވާތީއެވެ.
