ތިންވަނަ ޑިވިޝަންގެ ޗެމްޕިއަންކަން ބުރު ސްޕޯޓްސް ކްލަބް ހޯދައިފި

އެފްއޭއެމް ތިންވަނަ ޑިވިޝަން ފުޓްބޯޅަ މުބާރާތުގެ ޗެމްޕިއަންކަން ބުރު ސްޕޯޓްސް ކްލަބް ހޯދައިފިއެވެ.

ބުރު ސްޕޯޓްސް ކްލަބުން މުބާރާތުގެ ޗެމްޕިއަންކަން ހޯދީ ރޭ ކުޅުނު ފައިނަލް މެޗުގައި ބިސް ބުރުގެ މައްޗަށް 0-11 ގެ ނަތީޖާއަކުން ކުރި ހޯދައިގެންނެވެ. ބުރު ސްޕޯޓްސް ކްލަބުން މުބާރާތުގެ ޗެމްޕިއަންކަން މި ހޯދީ ކުޅުނު އެއްވެސް މެޗަކުން ބަލިނުވެކަން ފާހަގަކޮށްލެވެއެވެ.

މި މެޗުގައި ބުރު ސްޕޯޓްސްގެ ލަނޑުތައް ޖަހާދީފައިވާ ކުޅުންތެރިންނަކީ ފަސް ލަނޑު ޖެހި އެ ޓީމުގެ ޔޫކްރެއިން ކުޅުންތެރިޔާ ޕެޓްރޯވް އާއި މުހައްމަދު ތަޝްމީން، އަބްދުﷲ ޝާފިއު މިއިން ކޮންމެ ކުޅުންތެރިއަކު ޖެހި ދެ ލަނޑުގެ އިތުރުން އެއް ލަނޑު ޖެހި ކުރިން ކުލަބް ގްރީންސްޓްރީޓްސް ގައި މޮޅު ކުޅުމެއް ދެއްކި ސުބޮލް އިލިއާ އެވެ. ބުރު ސްޕޯޓްސްއިން ކާމިޔާބުކުރި އަނެއް ލަނޑަކީ ބިސް ބުރުގެ މުޙައްމަދު އާމިރު އަތުން ބައިކޮޅަށް ވަން ލަނޑެކެވެ.

މި މުބާރާތުގެ އެންމެ މޮޅު ކުޅުންތެރިޔާގެ މަގާމް ހޯދާފައިވަނީ ބުރު ސްޕޯޓްސް ކްލަބުގެ މުހައްމަދު ތަސްނީމްއެވެ. އެންމެ މޮޅު ކީޕަރުގެ މަގާމް ބިސް ބުރުގެ ޢަބްދުﷲ ވިސާމްއެވެ. އަދި ފެއަރ ޕްލޭ ޓީމަކީ ބުރު ސްޕޯޓްސް ކްލަބެއެވެ.

މި އަހަރުގެ ތިންވަނަ ޑިވިޝަނުގެ ކުޅުން ނިންމާލިއިރު، ކޮވިޑް-19 އާ ގުޅިގެން މި މުބާރާތް ވަރަށް ބޮޑަށް ދިގުލައިގެން ދިޔައެވެ. އެގޮތުން ތިން ފަހަރެއްގެ މަތިން މުބާރާތް ފަސްކުރުމަށްފަހު އޭޕްރީލް މަހުގެ ތެރޭގައި މުބާރާތުގެ ކުޅުން ފެށިއިރު، މެއި މަހު ވަނީ ދެވަނަ ފަހަރަށް މުބާރާތް މެދުކަނޑާލާފައެވެ.