ކުރިއަށް އޮތް އެމްޑީޕީގެ ޤައުމީ މަޖިލިސް އިންތިޚާބުގައި ބަރުލަމާނީ ނިޒާމަށް ތާއީދު ނުކުރައްވާ ކެންޑިޑޭޓުންނަށް ތާއީދު ކުރައްވާނެ ކަމުގައި އެމްޑީޕީގެ ކުރީގެ ރައީސް އިބްރާހިމް އިސްމާއިލް (އިބްރާ) ވިދާޅުވެއްޖެއެވެ.

ކުރިއަށް އޮތް އެމްޑީޕީގެ ޤައުމީ މަޖިލިސް އިންތިޚާބުގައި ކުރިމަތިލައްވާ ކެނޑިޑޭޓުންގެ ތެރެއިން ތާއީދު ކުރައްވާނީ ބަރުލަމާނީ ނިޒާމަށް ތާއީދުކުރާ ކެނޑިޑޭޓުންނަށް ކަމުގައި އެމްޑީޕީގެ ރައީސް މުހައްމަދު ނަޝީދުވަނީ ވިދާޅުވެފައެވެ. ނަޝީދު މިހެން ވިދާޅުވެފައިވާއިރު، އެމްޑީޕީ ތެރޭގައި މިހާރު ގެންދަވަނީ ބަރުލަމާނީ ނިޒާމަށް ތާއީދުކޮށް ރައީސުލްޖުމްހޫރިއްޔާ އަށް ޕެޓީޝަނެއް ހުށަހެޅުމުގެ މަސައްކަތްވެސް ކުރަމުންނެވެ.

އެމްޑީޕީގެ ކުރީގެ ރައީސް އިބްރާ ވިދާޅުވީ ޤައުމީ މަޖިލިސްގައި ވާދަކުރައްވާ ކެނޑިޑޭޓުންގެ ތެރެއިން ބަރުލަމާނީ ނިޒާމާއި ދެކޮޅު ހައްދަވާ ކެނޑިޑޭޓުންނަށް އޭނާ ތައީދު ކުރައްވާނެކަމަށެވެ. އެމްޑީޕީގެ ލީޑަރޝިޕްގައި ހިމެނި ވަޑައިގަންނަވާ މެމްބަރުންގެ ތެރެއިން ބަރުލަމާނީ ނިޒާމަށް ތާއީދުކޮށް ވާހަކަ ދައްކަވަމުން ގެންދަވަނީ މަދު ބަޔެކެވެ.

އެމްޑީޕީގެ ޤައުމީ މަޖިލިހަށް ކުރިމަތިލައްވާފައިވާ ކެނޑިޑޭޓުންގެ ތެރެއިން ބަރުލަމާނި ނިޒާމާއި ދެކޮޅު ހައްދަވާ ކެނޑިޑޭޓުންނަށް އަޅުގަނޑު ތާއީދު ކުރަން.

– އިބްރާ ކުރެއްވި ޓްވީޓުގައި ވިދާޅުވިއެވެ.

#MDP ge Qaumee Majlihah kurimathilavvaifaivaa candidate in ge therein Barulamaanee nizaam akaai dhekolhu hadhdhavaa candidate innah alhugan'du thaaeedhu kuran.

— Ibra – Unapologetically for Justice (@ibramandhu) August 23, 2021

ސެޕްޓެމްބަރު މަހުގެ 25 ވަނަ ދުވަހު ބޭއްވުމަށް ހަމަޖެހިފައިވާ އެމްޑީޕީގެ ޤައުމީ މަޖިލީހުގެ އިންތިޚާބުގައި ކުރިމަތިލާފައިވާ ބޭފުޅުންގެ ލިސްޓު އާންމުކޮށް، ޝަކުވާ ހުށަހެޅުމުގެ ފުރުސަތު މިހާރު ވަނީ ދީފައެވެ. މިއިންތިޚާބަކީ އެމްޑީޕީގެ ތެރޭގައި ބާއްވާ އެންމެ ބޮޑު އިންތިޚާބެވެ.

ބަރުލަމާނީ ނިޒާމު ގެނައުމަށް އެމްޑީޕީގެ ތެރެއިން މަސައްކަތް ކުރައްވާއިރު، އެޕާޓީގެ އެނެމް އިސްލީޑަރު އަދި ރައީސުލްޖުމްހޫރިއްޔާ އިބްރާހިމް މުހައްމަދު ޞާލިހު ވިދާޅުވެފައިވަނީ ރާއްޖޭގައި އޮންނަން ފެންނަ ނިޒާމެއް ކަނޑައަޅާފައިވަނީ ރައްޔިތުންގެ ވޯޓަކުންކަމަށެވެ. އެކަން ބަދަލުކުރެވޭނީވެސް ރައްޔިތުންނަށް ކަމަށާއި، ނަމަވެސް މިއީ ނިޒާމު ބަދަލު ކުރުމަށް އެންމެ ރަނގަޅު ވަގުތު ނޫންކަމަށް ރައީސް ޞާލިހު ވަނީ ވިދާޅުވެފައެވެ.

ރާއްޖޭގައި ވެރިކަން ކުރާނީ ރިޔާސީ ނިޒާމަށް ކަމަށް ކަނޑައެޅީ 2007 ވަނަ އަހަރު ރައްޔިތުންގެ ފެންނަ ނުފެންނަ ވޯޓަކުންނެވެ. ވެރިކަމުގެ ނިޒާމު ކަނޑައެޅުމަށް ނެގި ރައްޔިތުންގެ ފެންނަ ނުފެންނަ ވޯޓުގައި 155890 މީހުން ވޯޓުދިންއިރު، 95619 މީހުން ވަނީ ރިޔާސީ ނިޒާމަށް ވޯޓްދީފައިވެއެވެ. ބަރުލަމާނީ ނިޒާމު އޮންނަން ފެންނަކަމަށް ވޯޓުދީފައިވަނީ 58،504 މީހުންނެވެ.