އެމެރިކާގެ C-17 މަރުކާގެ އަސްކަރީ މަތިންދާ ބޯޓު، މިހަފްތާގެ ހޯމަ ދުވަހު، ކާބުލްގެ ރަންވޭއިން އުދުއްސާލިއިރު، ބޯޓުގެ ފިޔަގަޑުއައާއި އަދި ފުރޮޅުގައި އެލިގަނެގެން ތިއްބާ ބިމަށް ވެއްޓި މަރުވި 3 މީހުންގެ ތެރެއިން އެކަކީ، އަގައުމުގެ ޖޫނިއަރ ފުޓް ބޯޅަ ޓީމު ކުޅުންތެރިއެއްކަން، އަފްއާނިސްތާނުގެ ޖެނެރަލް ޑިރެކްޓޮރޭޓް އޮފް ފިޒިކަލް އެޑިއުކޭޝަން އެންޑް ސްޕޯޓްސްއިން ހާމަ ކޮށްފިއެވެ.
ޒުވާން ފުޓްބޯޅަ ކުޅުންތެރިޔާ، އަންވަރި އަކީ، ތާލިބާނުން އާދިއްތަ ދުވަހު ވެރިރަށް ކާބުލް ހިފުމާއެކު، އެގައުމުގައި ދިރިއުޅެން ބޭނުން ނުވެ، އެމެރިކާގެ އަސްކަރީ މަތިންދާ ބޯޓުގައި ފުރައިގެން ދާން ބޭނުންވެގެން ޖެހިގެން އައިދުވަހު ކާބުލްގެ އިންޓަރނޭޝަނަލް އެއަރޕޯޓަށް އެއްވި އެގައުމުގެ އެތައްހާސް އަންމުންގެ ތެރޭގައި ހިމެނޭ ޒުވާނެކެވެ.
އަދި އެމެރިކާގެ އަސްކަރީ މަތިންދާ ބޯޓު އެއަރޕޯޓުގެ ރަންވޭއިން ނައްޓާލިއިރުވެސް ބޯޓުގެ ފިޔަގަޑުގައި ހިފަހައްޓާލައިގެ ތިބި 3 މީހަކުވަނީ، ބޯޓު ޖައްވުގެ ތެރެއަށް އުދުއްސާއިގަތުމާއިއެކު ބިމަށް ވެއްޓި މަރުވެފައެވެ. އޭގެތެރޭގައި ހިމެނޭ އެކަކީ، އަފްއާނިސްތާނުގެ ޖޫނިއަރ ފުޓްބޯޅަ ޓީމުގެ ޒުވާން ކުޅުންތެރިޔާ ޒަކީ އަންވަރި ކަން ހާމަކޮށްފައިވަނީ އޮގަސްޓު މަހުގެ 18ވަނަ ދުވަހު އަފްއާން ގައުމީ ޓީމުގެ ފޭސްބުކް ޕޭޖުގައެވެ.
އޮގަސްމަހުގެ 16ވަނަ ދުވަހު ސޯޝަލް މީޑިއާގައި އާންމު ވެގެން ގޮސްފައިވާ ވީޑިއޯއަކުންވަނީ، އެމެރިކާގެ އަސްކަރީ މަތިންދާ ބޯޓު ފުރުމަށް ރަންވޭ މަތިން ދުއްވާފައި ދިޔައިރު، ބޯޓުގެ ލޭންޑިން ގިޔަރުގެ މަތީގައި އެތައްބަޔަކު ތިބިއިރު، ބޯޓުވެ ވަށައިގެންވެސް އެތަބަޔަކު ދުވަމުން ދިޔަ މަންޒަރު ފެނިފައެވެ.
އަދި އެދުވަހު އާންމުވެގެން ދިޔަ އެހެން ވީޑިއޯތަކުންވަނީ، ބޯޑު ޖައްވަށް އުދުއްސާ ގަތުމާއެކު ފިޔަގަޑުގައި ހިފަހައްޓާއިގެން ތިބި މީހުން އެތައް ސަތޭކަ ފޫޓު މަތިން ބިމަށް ވެއްޓިގެންދިޔަ މަންޒަރު ފެނިފައެވެ.
އަންވަރިގެ މަރުގެ ޚަބަރު އާންމުވެގެން ދިއުމާއެކު އެތައްބަޔަކު ދަނީ ސޯޝަލް މީޑިއާގައި ހިތާމަ ފާޅުކުރަމުންނެވެ.
އެމެރިކާއިން ފަހުން ބުނެފައިވަނީ، C-17 މަރުކާގެ މި ބޯޓުގެ ފޮރުޅު ދަށުން އިންސާނުންގެ ބައިތައް ފެނިފައިވާތީ ޔޫއެސް އެއަރފޯރސްއިން މިހާދިސާ ތަހުގީގު ކުރަމުން ދާކަމުގައެވެ.
