ތާލިބާންގެ ސިޔާސީ ގޮފީގެ އިސް ވެރިއެއްކަމުގައިވާ އަންސް ހައްޤާނީއާއި އަދި ތާލިބާނުންގެ އިސް އިތުރު އޮފިޝަލުން، އަފްއަނިސްތާނުގެ ކުރީގެ ރައީސް ހާމިދު ކަރުޒާއީއާއި އަދި، ކުރީގެ ސަރުކާރުގެ ސުލްހައާއިބެހޭ އެންމެ މަތީ ކައުންސިލްގެ ޗެއަރމަން އަބުދުﷲ އަބުދުﷲ އާއި، ވެރިރަށް ކާބުލްގައި ބައްދަލު ކުރައްވައިފިއެވެ.
މި ބައްދަލުވުގައި ކުރެވުނު މަޝްވަރާތަކާބެހޭ މައުލޫމާތު އަދި މީޑިއާތަކާ ހަމައަށް އައިސްފައި ނުވިނަމަވެސް، މީޑީއާތަކުން ރިޕޯޓު ކޮށްފައި ވާގޮތުގައި، ބައްދަލު ކުރެއްވުން ބޭއްވިފައިވަނީ، ކާބުލްގައި ހުންނަ އަބުދުﷲ އަބުދުﷲގެ ގޭގައެވެ.
އެމެރިކާއިން 20 އަހަރުވަންދެން ފޯރުކޮށްދެމުން އައި އަސްކަރީ އެހީތެރިކަން ހުއްޓުމަކަށް އައުމާއެކު، ތާލިބާނުންވަނީ، އެމެރިކާއިން ތާޢީދުކޮށްގެން އަފްއާނިސްތާނުގައި ވެރިކަން ކުރަމުން އައި ސަރުކާރު، މިހަފްތާގެ އާދީއްތަދުވަހު ވައްޓާލާފައެވެ.
މިހާރު ކަންދަހާރުގައި ހުންނެވި، ޤަތަރުގެ ދޯހާގައި ހުންނަ ތާލިބާނުންގެ ސިޔާސީ އޮފީހުގެ އިސްވެރިއެއް ކަމުގައިވާ މައުލާވި ޚައިރުﷲ ޚައިރުވާޙް ބައެއް މީޑިއާތަކަށް މައުލޫމާތު ދީފައިވާ ގޮތުގައި، ތާލިބާންގެ ޑެޕިއުޓީ ލީޑަަރު މުއްލާ އަބުދުލް ޢަނީ ބަރާދަރު އާއި އަދި ތާލިބާންގެ އިތުރު 8 މެމްބަރަކުވަނީ، މިހަފްތާގެ އަންގާރަ ދުވަހު ޤަތަރުން ކަންދަހާރަށް ވަޑައިގެންވައެވެ.
"އެއްވެސް ބަޔަކީ އަހަރެމެންގެ ދުޝަމަނުންގެ ގޮތުގައި އަހަރެމެން ނުދެކޭނަން،" ޚައިރުވާޙް ވިދާޅުވެފައި ވެއެވެ.
ތާލިބާން ޑެޕިއުޓީ ލީޑަރު ބަރާދަރުގެ ކަންދަހާރު ދަތުރުފުޅުގެ އިތުރު އެއްވެސް މައުލުމާތެއް އޭނާ މީޑިއާތަކާ ޙިއްސާ ކުރައްވާފައެއް ނުވެއެވެ.
އަފްއާނިސްތާނުގެ ކުރީގެ ރައީސް ކަރުޒާއީގެ ގާތް ބައެއް ފަރާތްތަކާ ހަވާލާދީ ބައެއް މީޑިއާތަކުން ރިޕޯޓު ކޮށްފައިވާ ގޮތުގައި، ތާލިބާން ލީޑަރޝިޕްގެ ސީނިއަރ މެމްބަރެއް ކަމުގައިވާ އާމިރު ޚާން މުތަޤީ އަފްއާނިސްތާނުގެ ސިޔާސީ އިސް ބައެއް ފަރާތްތަކާ ބައްދަލު ކުރެއްވުމަށްފަހު ވަނީ، އެގައުމުގެ ހުރިހާ ފިކުރެއްގެ އެންމެންނަށްވެސް ތަމްސީލު ކުރެވޭ ސަރުކާރެއް ތާލިބާނުން އެކުލަވާލާނެ ކަމުގެ ޔަގީންކަން ދީފައެވެ.
